ބަނގްލަދޭޝަކީ ޕާކިސްތާނަށް ވުރެން 24 އަހަރު ހަގު ގައުމެކެވެ. މިއަދު ބަންގްލަދޭޝަކީ ދެކުނު އޭޝިއާގެ އިގްތިސާދީ ތަރައްގީގެ މުއުޖިޒާއެވެ. އަދި ބަނގްލަދޭޝަކީ ޕާކިސްތާނަށް ވުރެން މިއަދު މުއްސަނދި ގައުމެކެވެ.
ޕާކިސްތާންގެ ބޮޑު ވަޒީރު އިމްރާން ޚާން ވިދާޅުވަނީ ސަރަހައްދުގެ އެހެން ގައުމުތަކަށް ވުރެން ޕާކިސްތާންގައި ތަރުކާރީގެ އަގުތައް ހެޔޮ ކަމަށެވެ. މިއާ ވިއްދައިގެން ޕާކިސްތާން މީހުން ބުނަނީ ޕާކިސްތާންގެ ޖީޑީޕީއަށް ވުރެން ބަނގްލަދޭޝްގެ ޖީޑީޕީ މާ ބޮޑަށްވެސް އިތުރު ކަމަށެވެ.
ގައުމީ އުފެއްދުންތެރިކަމުގެ ނިސްބަތުން ޕާކިސްތާންގައި ބޮލަކަށް ޖީޑީޕީ ޖެހެނީ، އަހަރަކަށް 1543 އެމެރިކާ ޑޮލަރެވެ. ޕާކިސްތާންގެ ދަ ނިއުސް އިންޓަރނޭޝަނަލް އިން ރިޕޯޓް ކުރިގޮތުގައި ބަނގްލަދޭޝްގައި އަހަރަކު ބޮލަކަށް 2554 ޑޮލަރު ޖީޑީޕީގެ ގޮތުގައި ޖެހެއެވެ.
ޕާކިސްތާންގައި މުދަލާއި ޚިދުމަތުގެ އަގު މަތިވާ ނިސްބަތް އުޅެނީ ރަސްމީ އިދާރާތައް ބުނާ ގޮތުން 9 އިންސައްތައިގައެވެ. ބަނގްލަދޭޝްގައި މި ނިސްބަތް އުޅެނީ 5.56 އިންސައްތައިގައެވެ.
ޕާކިސްތާނުން މުދާ އެކްސްޕޯޓް ކުރާ މިންވަރު އުޅެނީ 25.63 ބިލިއަން އެމެރިކާ ޑޮލަރުގައެވެ. އަދި މިއާ އަޅާ ބަލާއިރު ބަނގްލަދޭޝްއިން މުދާ އެކސްޕޯޓް ކުރާ ނިސްބަތް އުޅެނީ 37.88 ބިލިއަން ޑޮލަރުގައެވެ.
