އެމެރިކާގެ ވައިގެ ދަތުރުފަތުރުގެ ވިޔަފާރި ސިއްރުތައް ވަގަށް ނެގުމުގެ ކުށުގައި ޗައިނާގެ ޖާސޫސަކަށް ޙުކުމް ކޮށްފިކަމަށް އެމެރިކާގެ ޖަސްޓިސް ޑިޕާޓްމެންޓުން ބުނެފިއެވެ.
ޗައިނާގެ ޖާސޫސް ޔާންޖުން ޝޫއަކީ، ޖަސްޓިސް ޑިޕާޓްމެންޓުން ބުނިގޮތުގައި ޖިއާންގ ސޫ ޕްރޮވިންސްގެ މިނިސްޓްރީ އޮފް ސެކިއުރިޓީގެ ޑެޕިއުޓީ ޑިވިޝަން ޑިރެކްޓަރ އެވެ. މިއީ އެމެރިކާގައި ޝަރީއަތް ކުރުމަށް ބޭރުގައުމަކުން އެމެރިކާއަށް ބޭރުކޮށްދިން ފުރަތަމަ މީހާ ކަމަށް ޖަސްޓިސް ޑިޕާޓްމަންޓުން ބުންޏެވެ.
އެމެރިކާގެ ބަންޑާރަ ނާއިބްގެ އޮފީހުން ބުނިގޮތުގައި ޗައިނާގެ ޖާސޫސީ އިދާރާގައި މަސައްކަތް ކުރާ އެ އިދާރާގެ ކާޑް ގެންގުޅޭ މުވައްޒަފަކު މިފަދަ މައްސަލައެއްގައި ޙުކުމް ކުރުމުން އެނގެނީ ޗައިނާއިން އެގައުމުގެ ސިނާއަތްތައް ޒަމާނީ ފެންވަރަށް ގެނައުމަށް އެމެރިކާގެ ފިކުރީ މުދަލަށް ޖާސޫސްކުރާ މިންވަރެވެ.
މި ޙުކުމުން އެމެރިކާއިން ދައްކައި ދޭން ބޭނުންވަނީ ޗައިނާއަށްވެސް އަދި އެހެން ގައުމަކަށްވިއަސް ޖާސޫސްކުރުމަށް އެމެރިކާއިން ފުރުސަތު ނުދޭނެ ކަމެވެ. އަދި އެފަދަ ކުށަކަށް އަރައިގެންފި ފަރާތެއްނަމަ، އެމީހެއްގެ ޝަރީއަތް ކުރާނެ ކަމަށް ދައްކަން އެމެރިކާއިން ބޭނުންވާ ކަމަށްވެސް ޖަސްޓިސް ޑިޕާޓްމަންޓުން ބުންޏެވެ.
ޝޫ ހައްޔަރުކޮށްފައި ވަނީ 2018ގައި ބެލްޖިއަމް އިންނެވެ.
އޭނާގެ މައްޗަށް ދެ ކުށަށް ޙުކުމް ކޮށްފައި ވެއެވެ. އެއީ ޖާސޫސް ކުރުމާއި ޖާސޫސް ކުރުމަށް ރޭވިކަމުގެ ކުށެވެ. އެއް ކުށަށް 15 އަހަރަށް ޖަލަށް ލާއިރު އަނެއް ކުށަށް 10 އަހަރުގެ ޖަލު ޙުކުމެއް އަންނާނެއެވެ. އަދި ފަސް މިލިއަން އެމެރިކާ ޑޮލަރުން ޖުރިމާނާ ކުރާނެއެވެ.
