ދުނިޔޭގެ ބަނޑުހައި ހޫނުކަން ފިލުވުމަށް 6 ބިލިއަން ޑޮލަރު ބޭނުންވާ ކަމަށް ވަރލްޑް ފުޑް ޕްރޮގްރާމުން ކުރި އިއުލާނަށް، މަހާ ސާދާގަރު އިލޯން މަސްކު ޖަދަލު ކުރުމުން އޭނާގެ އަނގަ ބަންދުކޮށްފިއެވެ.
މަހާ ސާދާގަރު ބުނެފައި ވަނީ ދުނިޔެއިން ބަނޑުހައި ހޫނުކަން ފިލުވުމަށް ހަ ބިލިއަން ޑޮލަރު ބޭނުންވާނަމަ، އަދި އެ ހަބިލިއަނުން ދުނިޔެއިން ބަނޑުހައި ހޫނުކަން ފިލުބވާނެ ގޮތް އޭނާއަށް ކިޔައި ދީފިނަމަ، އޭނާގެ ޓެސްލާ ކުންފުނީގެ ހިއްސާ ވިއްކައިގެން އެ ހަ ބިލިއަން ޑޮލަރު ހޯދައި ދީފާނެ ކަމަށެވެ.
ވަރލްޑް ފުޑް ޕްރޮގްރާމުގެ ރައީސް ޑޭވިޑް ބީސްލީ ވަނީ ދުނިޔޭގެ މަހާ ސާދާގަރުންނަށް، ބަނޑުހައި ހޫނުކަން ފިލުވުމަށް ދުނިޔެއަށް އެހީތެރިވެ ދިނުމަށް ގޮވާލައްވާފައެވެ.
މަސްކު، ހަ ބިލިއަން ޑޮލަރިގެ ވާހަކައާ ޖަދަލު ކުރުމުން ޓުއިޓާގައި މީހުން ވަނީ އުތުރި އަރާފައެވެ. ބީސްލީ ވިދާޅުވީ، ދުނިޔޭގައި 42 މިލިއަން މީހުން ބަނޑަށް ޖެހުމުގެ ޝިކާރައަކަށް ވެފައި ވެއެވެ. މި މީހުންނަށް ކާން ދޭން ބޭނުން ވަނީ ކޮންމެ މީހަކަށް ދުވާލަކަށް އެމެރިކާގެ 43 ސެންޓެވެ. އަހަރުގެ ހުރިހައި ދުވަހަކު މިވަރަށް ހޭދަކޮށްފިނަމަ، ޖުމުލަ ވާނީ 6.6 ބިލިއަން ޑޮލަރެވެ. މިއިން ދުނިޔެއިން ބަނޑުހައި ހޫނުކަން ފިލުވައެއް ނުލެވުނަސް މިމީހުން މަރުގެ ތުންފަތް މަތިން ސަލާމަތް ކުރެވެއެވެ.
ގްލާސްގޯގައި ކޮޕް26ގައި ވާހަކަ ދައްކަވަމުން ބީސްލީ ވިދާޅުވީ، ދުނިޔޭ ގެ މޫސުމަށް އަންނަ ބަދަލުތަކާ ގުޅިގެން ބަނޑުހައިހޫނުކަން އިތުރު ވަމުންދާ ކަމަށެވެ. އަދި ޖައްވު ހޫނުވުމާއި ހަނަފަސްކަމާއި ފެން ބޮޑުވުމުގެ މައްސަލަތަކާއި ތޫފާނާއި ފަނިފަކުސަ އާލާވުމާއި މޫސުމަށް އަންނަ ބަދަލާއި ބެކްޓީރިއާތަކަކީ ދަނޑުވެރިންނަށް ހުރިހައި ތަނެއްގައިވެސް ދިމާވެފައިވާ މައްސަލަތަކެވެ. މީގެ އިތުރުން ކޯވިޑް19ގެ ސަބަބުން ދަނޑުވެރިންނަށް އިތުރު ދަތިތަކާ ކުރިމަތިލާން ޖެހިފައި ވެއެވެ.
2020ގައި 650 މިލިއަން މީހުން ބަނޑުހައި ހޫނުކަމުގައި އުޅުމަށްފަހު، މިއަހަރު އެއަދަދު ވަނީ 810 މިލިއަނަށް އިތުރު ވެފައެވެ.
