ތާލިބާނުންގެ މެދުގައި ކްރިކެޓް ބޯޑް ކޮންޓްރޯލު ކުރުމުގައި އަރައިރުންތަކެއް އުފެދިއްޖެއެވެ. ތާލިބާނުންގެ ބޮޑު ވަޒީރުގެ ނާއިބު މުއްލާ ބިދާރަރުގެ ސަޕޯޓަރުން ވަނީ އަފްޣާނިސްތާން ކްރިކެޓް ބޯޑަށް އައްޔަން ކުރި މަސްއޫލުވެރިއާ މަގާމާ ޙަވާލުވާން ދިއުމުން، އޭނާގެ ގައިގައި ތަޅައިގަނެ، އެތަނަށް އޭނާ ވަދެ ނުދީ ހިފަހައްޓާފައެވެ.
އަފްޣާން ކްރިކެޓް ކޮންޓްރޯލު ބޯޑަށް އަލަށް އައްޔަން ކުރި މަސްއޫލުވެރިއާ މީރްވާއިޒް އަޝްރަފްއަކީ ކުރިން ކްރިކެޓް ކުޅެފައިވާ މީހެކެވެ. އޭނާ އެ މަގާމަށް އައްޔަން ކުރީ، ދާޚިލީ ވަޒީރު ސިރާޖުއްދީން ހައްގާނީ އެދިގެން، ތާލިބާންގެ ބޮޑު ވަޒީރު މުއްލާ ޙަސަން އަޚުންދުޒާދާ ސޮއިކޮށްފައިވާ ގަރާރަކުންނެވެ.
ސިރާޖުއްދީން ހައްގާނީއާއި އޭނާގެ ޙައްގާނީ އާއިލާއަކީ ކާބުލްއާއި ކާބުލް ކައިރި ސަރަހައްދު ކޮންޓްރޯލު ކުރާ ހަނގުރާމަވެރިންގެ ޖަމާއަތެވެ.
ބައިނަލްއަގްވާމީ ދުނިޔެއިން ޓެރަރިސްޓް ޖަމާއަތެއްކަމަށް ކަނޑައަޅާފައިވާ ހައްގާނީ ނެޓްވަރކުގެ އިސްފަރާތް ކަމަށްވާ ސިރާޖުއްދީން ހައްގާނީއަކީ އަފްޣާނިސްތާންގެ ހަފްލާތަކުން އޭނާގެ ފޮޓޯ ދެއްކުން މަނާކޮށްފައިވާ މީހެކެވެ.
އަފްޣާނިސްތާން މީޑިއާއިން ބުނާ ގޮތުގައި މިހާރު އަފްޣާން ކްރިކެޓް ބޯޑުގައި ދެ ވެރިންނާއި ދެ ފެކްޝަނެއް އެބަ އޮތެވެ.
އަޝްރަފްގެ ކުރިން އެމަގާމުގައި ހުރިމީހާއަކީ ތާލިބާނުން ކާބުލް ހިފުމާއެކު މުއްލާ ބިރާދަރު އައްޔަން ކޮށްފައިވާ މީހެކެވެ.
މުއްލާ ބިރާދަރަކީ ތާލިބާންގެ ސަރުކާރުގެ އެންމެ އިސްމީހާ ކަމަށް ނަންކިޔައި އުޅުނު ފަރާތެވެ. ނަމަވެސް ގައުމުގެ އިސްމަގާމު ލިބެންވާނީ މައިދާނުގައި އެމެރިކާއާ ދެކޮޅަށް ހަނގުރާމަ ކުރި މީހުންނަށް ކަމަށާއި ދޯޙާގައި ފިނި ކޮޓަރީގައި އެމެރިކާގައި ވާހަކަ ދައްކަން ތިބި މީހުންނަށް ނޫންކަމަށް ބުނެ ހައްގާނީގެ އާއިލާއިން ވަނީ ބިރާދަރު އައްޔަން ކުރުމާ ދެކޮޅު ހަދާފައެވެ. އެހެންވެ، އޭނާއަށް ލިބުނީ ބޮޑު ވަޒީރުގެ ނާއިބުގެ މަގާމެވެ.
