އިންޑިއާ ކަނޑަށް ފޭބުމަށްޓަކައި ޗައިނާއަށް މިޔަންމާރަކީ މުހިންމު ގައުމެކެވެ. ޗައިނާގެ މުދާ ކަނޑިމަގުން ދިގު ދަތުރުތައް ކޮށްފައި ބާރު ބޮޑު މަލަކާ ކަނޑު އޮޅި ހުރަސް ކުރުމުން ޗައިނާގެ އެކްސްޕޯޓަށް ލިބެންވާ މަންފާތަކެއް ނުލިބެއެވެ.
2020ގެ ޖަނަވަރީގައި ޗައިނާގެ ރައީސް ޝީ ޖިންޕިންގ މިޔަންމާރަށް ކުރެއްވި ދަތުރުފުޅުގައި މިމައްސަލައަށް ހައްލެއް ހޯއްދެވިއެވެ. އޭނާ ސޮއިކުރެއްވީ ސްޕެޝަލް އިކޮނޮމިކް ޒޯނެއް ގާއިމްކޮށް ޗައިނާ މިޔަންމާ އިކޮނޮމިކް ކޮރިޑޯ ފުޅާކުރާށެވެ. މިޔަންމާރުގެ މުސްލިމުން ފައްސާލާފައިވާ ރާކިން ސްޓޭޓްގައި ހަދާ ޗައިނާގެ ސްޕެޝަލް އިކޮނޮމިކް ޒޯންގައި އެންމެ ބޮޑެތި އާގު ބޯޓު ބަނދަރު ކުރާ ޒާތުގެ ފުން ބަނދަރެއް ހެދުން ހިމެނެއެވެ.
މީގެ މަގްސަދަކީ ޗައިނާގެ ޔުއްނާން ޕްރޮވިންސްގެ އުފެއްދުންތައް މިޔަންމާ ތެރޭން ލައިގެން މަގު ކުރުކޮށް އިންޑިއާ ކަނޑަށް ވާ ގޮތަށް އޮންނަ ބަނދަރަށް ފަސޭހަކަމާއެކު ފޮނުވާލުމެވެ.
ސްޝަލް އިކޮނޮމިކް ޒޯންގެ 4300 އޭކަރުގެ ބިމުގައި ހިމެނެނީ، ފޭރާން އުފެއްދުމާއި ކާނާ ބަންދުކުރުމާއި ކޮންސްޓްރަކްޝަންއާ ގުޅުން ހުރި ތަކެތި އުފެއްދުމާއި ބޭސްބަންދުކުރުމުގެ މަސައްކަތް ކުރާނެ ޗައިނާގެ ވިޔަފާރި ތަކެވެ.
ޗައިނާގެ ކުންފުންޏަކުން ބިނާ ކުރާ އިކޮނޮމިކް ޒޯނަށް ދިހަ ބިލިއަން ޑޮލަރު އިންވެސްޓް ކުރާނެ ކަމަށްވެއެވެ.
މިޔަންމާގެ ކުރީގެ ސަރުކާރުން ޗައިނާގައި އެދިފައި ވަނީ މި އަދަދު މަދު ކުރުމަށެވެ. ދިހަ ބިލިއަން ޑޮލަރު ޗައިނާއިން މި އިކޮނޮމިކް ޒޯންގައި އިންވެސްޓް ކުރުމުން މިޔަންމާރުން ޗައިނާއަށް ދަރާފައިވާ ދަރަނި ދެއްކުން ދަތިވެ، ޗައިނާގެ ދަރަނީގެ ދަންތުރައި ޖެހިދާނެ ކަމުގެ ބިރުންނެވެ.
