ޗައިނާގެ ރީތި މަންޒަރުތަކާ ބެހޭ ފޮޓޯއެއް ނުވަތަ ވީޑިއޯ ކޮޅެއް ދުށިން ހެއްޔެވެ؟ ނުވަތަ ޓިކްޓޮކްގައި ޗައިނާގެ މީހެއްގެ އާދަޔާ ޚިލާފް ހުނަރުވެރި އުކުޅުތައް ދުށީން ހެއްޔެވެ؟ އެއީ ޗައިނާ ޓޯކު މަޖައްލާ ބުނާ ގޮތުން ސަރުކާރުން ގަސްތުގައި ފަތުރާ ޕްރޮޕެގެންޑާގެ މެސެޖްތަކެވެ.
ޗައިނާއިން ފޭސްބުކްގައި ޕްރޮޕެގެންޑާ ކުރާ ގޮތާބެހޭ ގޮތުން ޗައިނާ ޓޯކްއިން ކޮށްފައިވާ ދިރާސާއެއްގައި ބުނާ ގޮތުން ޗައިނާއިން ދޭން ބޭނުންވާ މެސެޖްތައް ދިނުމަށް މިހާރު ސަރުކާރު މުވައްޒަފުންނާއި ޕާޓީގެ މެންބަރުންގެ ކިބައިންނެއް ނޭދެއެވެ. މި ދިރާސާ ކޮށްފައިވާ ފަރާތުން ވަނީ 2013ން ފެށިގެން 2020އާ ހަމައަށް ޗައިނާ ސަރުކާރުން ޕްރޮކިއުމެންޓަށް ބޭނުންކޮށްފައިވާ ޑޭޓާ ތަހުލީލު ކޮށްފައެވެ. މި ޑޭޓާއިން ފެންނަ ގޮތުން ޗައިނާ ސަރުކާރުން ވަނީ މީސްމީޑިއާގައި ޕްރޮޕެގެންޑާ ކޮށްދޭނ ކުންފުނިތައް ހޯދަން އިއުލާން ކޮށްގެން ކުންފުނިތައް ހޯދައި މަސައްކަތް ހަވާލުކޮށްފައެވެ.
މި ޕްރޮކިއޮމެންޓް ޑޭޓާއިން އެނގޭ ގޮތުން ޗައިނާގެ އެކި ޕްރޮވިންސްތަކުންނާއި އެކި އިދާރާތަކުން ވަކިވަކިން ކުންފުނިތަކުގެ ޚިދުމަތް ބޭނުންކޮށްފައި ވެއެވެ.
ޗައިނާ ސަރުކާރުން އެދިފައިވާ ޚިދުމަތްތަކުގެ ތެރޭގައި ސަރުކާރާ ބެހޭ ގޮތުން އެދެވޭ މެސެޖްތައް ޕޯސްޓް ކުރުމާއި ޗައިނާގެ އެކި ސަރަހައްދުތަކުގެ ސަގާފަތާއި ޗައިނާގެ އިގްތިސާދު ކުރިއަށްދާ ގޮތާއި ޗައިނާގެ ސިޔާސީ މަސްރަހާއި ޗައިނާގެ މީހުންގެ ދިރިއުޅުމުގެ ކަންކަމާ ބެހޭ މެސެޖްތައް ދިނުން ހިމެނެއެވެ.
މި ޕްރޮޕެގެންޑާގެ މަސައްކަތަށް ކުއްޔަށް ހިފާ ކުންފުނިތަކަކީ މީޑިއާގެ ވާސާގެ ތަފާތު ދާއިރާތަކުގައި ހަރަކާތްތެރިވާ ކުންފުނިތަކެވެ. އޭގެތެރޭގައި ޓެކްނޮލޮޖީގެ ކުންފުނިތަކާއި ޕަބްލިޝަރުންނާއި ވީޑއޯ އުފައްދާ މީހުންނާއި މާކެޓިންގ ކުންފުނިތަކާއި އެޖެންސީތައްވެސް ހިމެނެއެވެ.
