ހޮވުނަސް ވެރިކަން ހަވާލު ނުކުރާން ގަދަ ދައްކައި އެމެރިކާއަށް އިންގިލާބެއް ގެންނަން އުޅުމަށް އެމެރިކާގެ ރައީސް ޓްރަމްޕަށް ވާގިވެރިވި ބައެއް މަސްއޫލުވެރިން ތަހްގީގަށް ހާޒިރުވުމަށް ޗިޓް ފޮނުވައިފިއެވެ.
މީގެ ތެރޭގައި ޓްރަމްޕްގެ ފަހުކޮޅު ގައުމީ ސަލާމަތާ ބެހޭ މުޝީރަކަށް ހުންނެވި މަސްއޫލުވެރިޔާއާ ސުއާލު ކުރަން ބޭނުންވަނީ އިންތިޚާބުގެ ނަތީޖާ ބާތިލުކޮށް ގައުމުގައި ކުއްލި ހާލަތު އިއުލާން ކުރުމަށް މަޝްވަރާ ދެއްވާފައިވާތީ އެކަމާ ބެހޭ ސުއާލުތައް ކުރުމަށެވެ.
ޓްރަމްޕްގެ އިލެކްޝަން ޓީމުގެ ތިން މީހަކާވެސް ސުއާލުކުރުމަށް އެދި ޗިޓް ފޮނުވާފައި ވެއެވެ. އަދި އިންތިޚާބުގެ ނަތީޖާ ބަލައި ނުގަތުމަށް ހުއްޖަތް ދައްކާނޭ ގޮތް ލިޔެދިން ގާނޫނީ ވަކީލަކަށްވެސް ޗިޓް ފޮނުވާފައި ވެއެވެ.
އެމެރިކާގެ މަސްއޫލުވެރިން ދެކޭ ގޮތުގައި ނަތީޖާ ބަލައި ނުގަތުމަށް 6 ޖެނުއަރީގެ ކުރިން ޓްރަމްޕާއި އޭނާގެ މަސްއޫލުވެރިންނާއި އައުވާނުން މަސައްކަތް ކޮށް އިންތިޚާބުގެ ނަތީޖާއާމެދު ޝައްކު އުފެއްދުމަށް މަސައްކަތް ކޮށް ގައުމު ގަޑުބަޑު ކުރުމަށް ރާވާފައި ވެއެވެ.
ޓްރަމްޕާއި އޭނާގެ ޓީމުން އިންތިޚާބު ގަޑުބަޑު ކުރުމަށް މަސައކްކުރި ކަމުގެ ތަހުގީގުތައް ހިނގަމުންދާއިރު ޓްރަމްޕް ވަނީ އައު ދައުރަކަށް ކުރިމަތިލުމަށް ނިންމާފައެވެ. އަނެއް ކޮޅުން އެމެރިކާގެ ރައީސް ޖޯ ބައިޑެންގެ މަގްބޫލުކަންވެސް އުޅެނީ 38 ޕަސެންތްގައެވެ. މީހުން ދެކޭ ގޮތުގައި ބައިޑެންއަށް އެމެރިކާގެ މައްސަލަތައް ޙައްލު ކުރެވިފައެއް ނުވެއެވެ.
