ޔޫރަޕްގެ ގައުމުތަކުން އޮސްޓްރޭލިއާއިން ދަސްކުރާނެ އެއްޗެއް އޮވެދާނެ ބާވައެވެ؟ ޔޫރަޕްގައި ޚުދު މުޚުތާރު ގައުމުތަކުން ނުފޫޒު ފަތުރަމުންދާ މައްސަލަ ހައްލުކުރުމަށް ބޭނުންވާ ފިޔަވަޅުތައް ޔޫރަޕްގެ ޖަމާއަތުން ބޭނުން ވަނީ އޮސްޓްރޭލިއާއިން ލިބި ގަންނާށެވެ.
ޔޫރަޕްގެ ޕާލަމެންޓުން އެކުލަވާލާފައިވާ ރިޕޯޓެއްގައި ބުނެފައި ވަނީ ޗައިނާ ފަދަ ބޭރުގެ ޚުދުމުޚުތާރު ވެރިކަމުގެ ނިޒާމު އޮންނަ ގައުމުތަކުން ޔޫރަޕްގައި ހިންގާ ހަރަކާތްތައް ބަލައި ހުއްޓުވޭނެ ނިޒާމެއް ޔޫރަޕްގައި ނެތް ކަމަށެވެ. އަދި ޗައިނާގެ ޔުނައިޓެޑް ފްރޮންޓާ ކުރިމަތި ލުމަށް އޮސްޓްރޭލިއާއާއި ނިއުޒިލެންޑުން އަޅާފައިވާ ފިޔަވަޅުތައް ދަސްކުރަން ޖެހޭ ކަމަށެވެ.
ޗައިނާގެ ޔުނައިޓެޑް ފްރޮންޓަކީ ޗައިނާ ކޮމިއުނިސްޓް ޕާޓީގެ ދަ ޔުނައިޓެޑް ފްރޮންޓް ވޯކް ޑިޕާޓްމަންޓެވެ. މިއީ ބޭރުގައި ތިބޭ ޗައިނާ މީހުން މެދުވެރިކޮށް އެމީހުން ދިރިއުޅޭ ގައުމުތަކުގައި ޗައިނާއަށް ފަހިވާފަދަ ސިޔާސަތުތަކާއި ޚިޔާލާތުތައް އިންދުމަށް މަސައްކަތް ކުރާ ޖަމާއަތެކެވެ.
ޔޫރަޕްގެ ޕާލަމެންޓުން ބުނިގޮތުގައި ޔޫރަޕްގެ ސިޔާސަތަށް ނުފޫޒު ފޯރުވާ ލޮބީން ކޮންޓްރޯލު ކޮށް އެމީހުންގެ ކަންކަން ދެފުށްފެންނަ ގޮތަށް ބަލާނެ އުސޫލުތަކެއްވެސް ޔޫރަޕްގައި ގާއިމްވެފައެއް ނުވެއެވެ.
މި ރިޕޯޓްގައި ބުނެ ފައިވަނީ އޮސްޓްރޭލިއާއިން ގެންގުޅޭ ފޮރިން އިންފުލޫއެންސް ޓްރާންސްޕޭރެންސީ ސްކީމަކީ ޔޫރަޕުން ބަލައިގަންނަން ރަނގަޅު ގާނޫނެއް ކަމަށެވެ.
2018ގައި އޮސްޓްރޭލިއާއިން އެކުލަވާލި މި ގާނޫނުން އޮސްޓްރޭލިއާގެ ސިޔާސަތަށް ބޭރުގެ ފަރާތްތަކުން ނުފޫޒު ފޯރުވުން ކުޑަ ކޮށްލެވިފައި ވެއެވެ.
މީގެ އިތުރުން އޮސްޓްރޭލިއާގެ ސްޓޭޓްތަކުން ބޭރު ގައުމުތަކާއެކު ކުރާ އެއްބަސްވުންތަކަކީ އޮސްޓްރޭލިއާއަށް ގެއްލުން ހުރި އެއްޗެއްކަމުގައި އޮސްޓްރޭލިއާގެ ފޮރިން މިނިސްޓަރަށް ފާހަގަ ކުރެވޭނަމަ އެ އެއްބަސްވުންތައް ބާޠިލުކުރުމުގެ ބާރުވެސް މިނިސްޓަރަށް އޮސްޓްރޭލިއާއިން ދީފައި ވެއެވެ.
ޗައިނާއާއެކު ބައެއް ސްޓޭޓްތަކުން ކޮށްފައިވާ އެއްބަސްވުންތައް އޮސްޓްރޭލިއާއިން މީގެ ދަށުން ބާޠިލުކޮށްފައި ވެއެވެ.
