ޗައިނާއިން އުއިގޫރު މުސްލިމުންގެ ނަސްލު ނައްތާލުމަށް އެމީޙުންނާ ދެކޮޅަށް ގަތުލުއާންމު ހިންގާކަމަށް ތުހުމަތުކޮށް އެމައްސަލަ ތަހުގީގުކޮށް ދެއްވުމަށް އެދިގެން އިންޓަރނޭޝަނަލް ކްރިމިނަލް ކޯޓަށް މައްސަލާގެ ތިން ވަނަ ފައިލެއް ހުށަހަޅައިފިއެވެ.
މި ފައިލް ހުށަހަޅާފައިވަނީ އީސްޓާން ތުރުކިސްތާން އިން އެގްޒައިލް އިންނެވެ. އީސްޓަން ތުރުކިސްތާނަކީ ޗައިނާގެ ޝިންޖިއާން ސަރަހައްދުގެ ކުރީގެ ނަމެވެ.
މި ފައިލްގައި ހިމަނާފައިވާ މައުލޫމާތަކީ ތަޖިކިސްތާންގައި ދިރިއުޅުނު އުއިގޫރު މުސްލިމުން ހައްޔަރުކޮށް، ވަގަށް ނަގައި އެމީހުން ގެއްލުވާލާފައިވާ ކަމަށް ބުނެއެވެ.
ތަޖިކިސްތާނަކީ އިންޓަރނޭޝަނަލް ކްރިމިނަލް ކޯޓުގެ މުއާހަދާގައި ބައިވެރިވާ ގައުމެކެވެ. އެހެންވެ، މި މައްސަލަ ބެލުމަކީ އެކޯޓުގެ އިޚްތިސާސްގެ ތެރޭގައި ހިމެނޭނެ ކަމެކެވެ.
މިއިން ދައްކައި ދެނީ ތާޖިކް ސަރަހައްދުގައި ޗައިނާއިން އުއިގޫރު މީހުންނާ ދެކޮޅަށް ހިންގާ ޖަރީމާއެވެ. މީގައި ޗައިނާއަށް އުއިގޫރު މީހުންނާ ދެކޮޅަށް މަސައްކަތް ކޮށްދީފައިވާ މީހުންގެ އިންޓަރވިއުވެސް ހެކީގެ ގޮތުގައި ހިމަނާފައި ވެއެވެ.
ޝިންޖިއާންއަކީ ޗައިނާގައި ކަފަ އުފެއްދުމުގައި މަޝްހޫރު ސަރަހައްދެކެވެ. މިއީ ގިނަ ވަލީ ވެރިންގެ ޒިޔާރަތް ހިމެނޭ އަދި އިސްލާމް ދީން ފެތުރިފައިވާ ބޮޑު ސަރަހައްދެކެވެ. ޗައިނާއިން ދޮޅު މިލިއަން މުސްލިމުން އިސްލާހު ކުރުމަށް ހުރަގެތަކަށް ލައިގެން ސިކުނޑި ދޮވުމާއި އަންހެނުން ދަރިމައި ނުވާ ގޮތް ހަދައި ރޭޕްކޮށް ޖީންސީ އެދުމަށް އަޅުދާސްކޮށްގެން ގެންގުޅޭކަމަށް ބައިނަލްއަގްވާމީ ފަރާތްތަކުން ތުހުމަތު ކުރެއެވެ.
އެމެރިކާގެ ހޮލޮކޯސްޓް މިއުޒިއަމުންވެސް ބުނަނީ ހެކި ތައް ދައްކާ ގޮތުން ޗައިނާއިން ދަނީ ޖެނޮސައިޑެއް ހިންގަމުންނެވެ.
