ޗައިނާ މީހުން މީހުންނާ އިނުން އިތުރު ކުރުމަށް ސަރުކާރުން ހިތްވަރު ދެމުން ދިޔަނަމަވެސް އެކަން ކާމިޔާބެއް ނުވެއެވެ. ހިނގަމުން މިދާ އަހަރުގެ ތިން ކުއާޓާގެ ތަފާސްހިސާބަށް ބަލާއިރު މިދިޔަ އަހަރަށް ވުރެން މިއަހަރު މީހުންނާ އިނދެފައިވާ މީހުންގެ އަދަދު މަދުކަމަށް ދައްކައެވެ. ތިން ވަނަ ކުއާޓާގައި މީހުންނާ އިނދެފައިވާ މީހުންގެ އަދަދަކީ 1.72 މިލިއަން އެވެ.
ޗައިނާގެ އާބާދީ މަދުވަމުން ދިއުމާއި މުސްކުޅިންގެ އާބާދީ އިތުރު ވުމުގެ ސަބަބުން ޗައިނާ ސަރުކާރުން ވަނީ ކަންބޮޑުވުން ފާޅުކޮށްފައެވެ. އަދި އެއް ދަރި ހޯދުމަށް ރައްޔިތުންނަށް މަޖުބުރުކުރި ސިޔާސަތުގެ ނޭދެވޭކަން ޗައިނާއިން މިހާރު ދަނީ އިހުސާސް ކުރަމުންނެވެ. އެއް ދަރި ހޯދުމަށް ދެމަފިރިންނަށް ސަރުކާރުން މަޖުބުރު ކުރުމުން ޗައިނާގައި އަހަރަކު 13 މިލިއަން ކުދިން ވައްޓާފައިވާކަމަށް ދިރފާސާތަކުން ބުނެއެވެ.
ރޭޑިއޯ ފްރީ އޭޝިއާއިން ރިޕޯޓް ކޮށްފައިވާ ގޮތުގައި ކޮވިޑާ ގުޅިންގެންނާއި އިގްތިސާދީ ދަތިތަކާ ހެދި އަދިވެސް މީހުން މީހުންނާ އިންނަ ނިސްބަތާއި ދަރިން ހޯދާ ނިސްބަތް ދާނީ މަދުވަމުންނެވެ.
ކޮމިއުނިސްޓް ޕާޓީން ހޯދާފައިވާ ޚިޔާލު ހޯދުމެއްގައި ޒެން ޖީލުގެ މީހުންގެ ތެރޭން 34 ޕަސެންޓް މީހުން ބުނެފައި ވަނީ އެމީހުން ދަރިން ހޯދަން ނުވިސްނާ ކަމަށެވެ. ޒެން ޖީލަކީ 1995އާއި 2009އާ ދެމެދު އުފަންވެފައިވާ މީހުންނެވެ.
މި ސާވޭގައި 43 އިންސައްތަ އަންހެނުން ބުނެފައި ވަނީ އެމީހުން ދަރިން ހޯދާނެ ކަމާއި މީހުންނާ އިންނާނެ ކަމާމެދު އެމީހުންނަށް ޔަގީންކަމެއް ނެތް ކަމަށެވެ. ދިރާސާ ބުނާ ގޮތުން އިގްތިސާދު ތަރައްގީ ވަމުން ދިއުމުން މީހުން ބޭނުން ވަނީ އެކަހެރިކަންމަތީގައި ދިރިއުޅޭ ށެވެ.
