ފިލިޕީންސަސް އިންޑިއާއިން ސިފައިން ފޮނުވަން ނިންމައިފިއެވެ. ފިލިޕީންސް އިން ވަނީ އިންޑިއާއާއެކު 375 މިލިއަނެއްހައި ޑޮލަރުގެ އަސްކަރީ ސާމާނު ގަތުމަށް އެއްބަސްވެފައެވެ.
ފިލިޕީންސްގެ ދިފާއީ ވަޒީރު ވިދާޅުވީ، ފިލިޕީންސްގެ ކަނޑުގެ ސިފައިންގެ ދިފާއު ވަރުގަދަ ކުރުމަށް މެނީލާއިން ދަނީ އިންޑިއާއިން އުފައްދާފައިވާ ބްރަހަމޯސް މިސައިލް ގަތުމުގެ ފަހު މަރުހަލާގައި މަސައްކަތް ކުރަމުންނެވެ.
އިންޑިއާއިން ބްރަހަމޯސް މިސައިލް ގަތުމުން ފިލިޕީންސް ސިފައިން މި މިމިސައިލް ބޭނުން ކުރުމަށް ތަމްރީނު ކުރުމަށާއި ލޮޖިސްޓިކް ޚިދުމަތް ދިނުމަށް އަދި މި ސައިލްގެ ޓެކްނީޝަނުންގެ ގޮތުގައި އިންޑިއާއިން ސިފައިން ގޮސް ތިބޭނެއެވެ.
ފިލިޕީންސްއިން ދަނީ 5 އަހަރު ދުވަހުގެ ތެރޭގައި 300 ބިލިއަން ޕޭސޯސް (5.85 ބިލިއަން އެމެރިކާ ޑޮލަރު) ހޭދަ ކޮށްގެން އެގައުމުގެ ސިފައިންނަށް ޒަމާންވީ އަސްކަރީ ސާމާނު ހޯދައިދޭން މަސައްކަތް ކުރަމުންނެވެ.
ފިލިޕީންސްއިން އިންޑިއާގެ ބްރަހަމޯސް މިސައިލް ގަތުމަށް ނިންމީ 2017 ވަނަ އަހަރު އެވެ. ނަމަވެސް ބަޖެޓްގެ ދަތިކަމާއި ކޮރޯނާ ވައިރަސްގެ ސަބަބުން މި އެއްބަސްވުން ކުރިއަށް ނުގޮސް ލަސްވީއެވެ.
ފިލިޕީންސްއިން މަސައްކަތް ކުރަނީ މަނަވަރުތަކާއި ކަނޑު އުޅަނދާ ދެކޮޅަށް ބޭނުން ކުރާ ނިޒާމަކާއެކު އެގައުމުގެ 200 ނޯޓިކަލް މޭލުގެ އެކްސްކްލޫސިވް އިކޮނޮމިކް ޒޯނަށް ފާރަވެރިވާށެވެ.
2018 ވަނަ އަހަރު ފިލިޕީންސްއިން ވަނީ އިސްރާއީލުން އުފެއްދި ސްޕައިކް އީއާރް މިސައިލްތަކެއްވެސް ގަނެފައެވެ.
ރައީސް ރޮޑްރިގޯ ޑުޓަރޓޭގެ ޒަޢާމަތުގައި ޗައިނާއާއި ފިލިޕީންސްއާ ދެމެދު ގާތް ގުޅުމެއް އޮތް ނަމަވެސް، ދެކުނު ޗައިނާ ކަނޑުގެ ބޮޑު ބައެއްގައި ޗައިނާއިން ބާރު ދައްކާތީ ދެގައުމުގެ ދެމެދު ދެބަސްވުންތައް އުފެދެއެވެ.
އަހަރެއްގެ މައްޗަށް 3.4 ޓްރިލިއަން ޑޮލަރުގެ މުދާ ދަތުރުކުރާ މި ކނަޑުއޮޅިއަށް ޗައިނާގެ ނުރައްކާތެރިކަން ބޮޑެވެ. ބްރޫނާއީ، މެލޭޝިއާ، ފިލިޕީންސް، ޓައިވާން އަދި ވިއެޓްނާމުންވެސް ވަނީ ދެކުނު ޗައިނާ ކަނޑުގެ ސަރަހައްދުތަކަށް ދައުވާ ކޮށްފައެވެ.
