އެމެރިކާގެ ރައީސް ޖޯ ބައިޑަންގެ ސަރުކާރުން ވަނީ މިދިޔަ ހަފްތާގައި ޔޫކްރެއިންއަށް ރަޝިޔާއިން ކުރިމަތިކުރަމުންދާ އަސްކަރީ ފިއްތުންތައް ދިރާސާ ކޮށްފައެވެ. އަދި ޕޫޓިން އިޚުތިޔާރު ކުރައްވަނީ، އިގްތިސާދީ ދަތިކުރުމުގެ ފިޔަވަޅުތައް ތޯ ނޫނީ ޑިޕްލޮމެސީގެ މަގުތޯ، އެމެރިކާއިން ވަނީ ސުއާލު ކޮށްފައެވެ.
އޭގެ ހަފްތާއެއް ފަހުން، ޔޫރަޕްގެ ތިން ސިޓީއެއްގައި އެތައް ގައުމެއްގެ އޮފިޝަލުން ހިމެނޭ ގޮތަށް ބޭއްވި މަޝްވަރާތަކަށް ފަހު، ވައިޓްހައުސްގެ އޮފިޝަލުންނާއި އިސް ޑިޕްލޮމޭޓުން ވިދާޅުވީ މޮސްކޯ އިން ދެން އަމަލު ކުރާނެ މަގެއް އަދިވެސް ނޭނގޭ ކަމަށެވެ. ހުޅަނގުންނާއި އެމެރިކާއިން ބުނާ ގޮތުން ޕޫޓިން ވިސްނަވާ ގޮތެއް މުޅިން ސާފެއް ނޫނެވެ.
"ސަލާމަތާއި ހަމަޖެހުން ކުރިއެރުވުމަށް ޑިޕްލޮމެސީއާއެކު ކުރިއަށް ދިއުމަށް އަޅުގަނޑުމެން މިތިބީ ތައްޔާރަށް،" އެމެރިކާގެ ގައުމީ ސަލާމަތާ ބެހޭ މުޝީރު ޖެކް ސުލިވަން ބުރާސްފަތި ދުވަހު ވިދާޅުވި އެވެ. ރަޝިޔާއިން އެހެން މަގެއް އިޚްތިޔާރުކޮށްފިނަމަ އަހަރެމެންވެސް މިތިބީ ހަމަހަމައަށް ތައްޔާރަށް" އޭނާ ވިދާޅުވިއެވެ.
ރަޝިޔާއާއި ހުޅަނގުގެ ޤައުމުތަކުގެ މެދުގައި ބޭއްވުނު މަޝްވަރާތައް ނިންމާލާފައިވަނީ ދެ ފަރާތަށް ވެސް މި މައްސަލަ އަށް ޙައްލެއް ނުފެނިއެވެ.
ހުކުރު ދުވަހު ޔޫކްރޭންގައި ނުތަނަވަސްކަން އިތުރަށް އިތުރުވެގެން ދިޔައެވެ. ޔޫކްރެއިން އިން ބުނީ ރަޝިއާ އިން އެގައުމަށް އަމާޒުކޮށް ދިން ބޮޑު ސައިބާ ހަމަލާއެއް އަމާޒުވި ކަމަށެވެ. ވައިޓްހައުސް އިން ބުނީ އިރުމަތީ ޔޫކްރެއިންގައި މޮސްކޯ އިން ހަމަލައަކަށް ތައްޔާރުވާކަމުގެ އިންޓެލިޖެންސް މައުލޫމާތު ލިބިފައިވާ ކަމަށެވެ.
ރަޝިޔާގެ ޚާރިޖީ ވަޒީރު ސަރްޖޭ ލާވްރޯވް ހުކުރު ދުވަހު ވިދާޅުވެފައި ވަނީ ހުޅަނގުން އަމަލު ކުރަމުންދާ ގޮތުން މޮސްކޯގެ ކެތްތެރިކަން ކުޑަވަމުންދާ ކަމަށެވެ.
ރަޝިޔާއިން ބޭނުންވަނީ ނޭޓޯއިން ޔޫކްރެއިންއާއި ކުރީގެ ސޯވިއެޓް އިއްތިހާދުގެ ގައުމުތަކަށް އެޖަމުއިއްޔާގެ މެމްބަރުންނަށް ވުމަށް ދޭ ދައުވަތު ދިނުން ހުއްޓާލުމަށެވެ.
އެމެރިކާގެ އޮފިޝަލުން ވިދާޅުވާ ގޮތުގައި ޔޫކްރެއިންއަށް ރަޝިޔާއިން އަރައިގަތުމުގެ ނުރައްކަލަކީ ހަގީގީ ނުރައްކަލެކެވެ. ރަޝިޔާއިން ޔޫކްރެއިންއާ ގުޅޭ ބޯޑަރު ސަރަހައްދުގައި ލައްކައަކަށްވުރެ ގިނަ ސިފައިން ބައިތިއްބާފައިވާ އިރު، ރަޝިޔާއިން ދަނީ އެގައުމުގެ ދުރު އިރުމަތީ ގައި ހުންނަ އެމީހުންގެ ބޭސްތަކުން ޓޭންކްތަކާއި، އިންފެންޓްރީ ހަނގުރާމަވެރި ފައުޖުތަކުގެ ވެހިކަލްތަކާއި، ރޮކެޓް ލޯންޗަރުތަކާއި، އެނޫންވެސް އަސްކަރީ އާލާތްތައް ހުޅަނގު ސަރަހައްދަށް ބަދަލުކުރަމުން ކަމަށް އެމެރިކާގެ އޮފިޝަލުންނާއި، ސޯޝަލް މީޑިއާ ރިޕޯޓްތައް ބުނެއެވެ.
2014ގައި ރަޝިޔާއިން ވަނީ ޔޫކްރެއިންގެ ކްރީމިއާވެސް ރަޝިޔާގެ އަތްދަށަށް ގެނަސްފައެވެ.
