ޕްރޮމޯބޮޓް ޓެކް ކުންފުންޏަކުން ދަނީ އިންސާނުންނާ ވައްތަރު ރޮބޮޓްތަކުގެ އާ ޖީލެއް ނެރުމަށް ތައްޔާރުވަމުންނެވެ. އަދި އެކުންފުނިން ބޭނުންވަނީ އިންސާނުންނާ ރައްޓެހި މޫނުތަކެއް ހުންނަން ކަމަށް އެ ރޮބޮޓްތައް ހަދާށެވެ.
ޓެކް ފާމްތަކުން 2023 ވަނަ އަހަރު އަންނަންވާއިރަށް ހޮޓާތަކާއި ޝޮޕިން މޯލްތަކާއި އެއާޕޯޓްތަކުގައި މަސައްކަތް ކުރާނެ ރޮބޮޓްތައް އުފެއްދުމަށް ވަނީ ނިންމާފައެވެ.
ޕްރޮމޯބޮޓްގެ ރޮބޮޓްތަކުގެ މޫނުގެ ސިފަ ޖައްސަން ބޭނުންވަނީ އިންސާނުންނާ އެއް ވައްތަރަކަށެވެ. އެހެންވެ، އަމިއްލައަށް އެދިގެން ތިމާގެ މޫނުގެ ސޫރަ ވިއްކަން ބޭނުންވާ ފަރާތްތަކަށް އެ ފުރުސަތު އެބަ އޮތެވެ. މިކަމަށް ކުރިމަތިލާ ފަރާތުގެ ސޫރަ ކޮޕީ ކުރުމުގެ އަގެއްގެ ގޮތުގައި 280،000 ޑޮލަރު ކަނޑައަޅާފައި ވެއެވެ.
އެ ކުންފުނިން ބުނީ ރޮބޮޓްގެ މޫނުގައި ޖެއްސުމަށް "އޯގާތެރި އަދި ރަހުމަތްތެރި" އިންސާނެއްގެ ސިފައެއް ހޯދުމުގެ މަސައްކަތް ކުރަމުން އަންނަ ކަމަށެވެ. އެ ގޮތުން އަމިއްލަ ސޫރަ ކޮޕީ ކުރުމަށް ހުއްދަ ދޭމީހާ ވާންވާނީ އުމުރުން 25 އަހަރުން މަތީގެ މީހެއް ކަމަށް ބުނެއެވެ.
ޕްރޮމޯބޮޓްގެ އުންމީދަކީ 2023 ވަނަ އަހަރުން ފެށިގެން އުތުރު އެމެރިކާ އާއި މެދުއިރުމަތީގެ ހޮޓާތަކާއި ޝޮޕިން ސެންޓަރުތަކާއި އެއާޕޯޓްތަކުގައި އެ ކުންފުނީގެ ރޮބޮޓްތައް ލޯންޗުކުރުން ކަމަށް އެ ކުންފުނިން ބުންޏެވެ.
އެ ކުންފުނީގެ ވެބްސައިޓްގައި ބުނެފައި ވަނީ "އަޅުގަނޑުމެންގެ ކުންފުނިން ފޭޝަލް ރިކޮގްނިޝަންގެ ދާއިރާއިން ޓެކްނޮލޮޖީތައް ތަރައްގީ ކުރަމުން އަންނަ ކަމަށާއި އޭގެ އިތުރުން ސްޕީޗް، އޮޓޮނޮމަސް ނެވިގޭޝަން، އާޓިފިޝަލް އިންޓެލިޖެންސް އަދި ރޮބޮޓިކްސްގެ އެހެން ދާއިރާތަކުން ވެސް ޓެކްނޮލޮޖީ ތައް ތަރައްގީ ކުރަމުން އަންނަ ކަމަށެވެ."
2019 ވަނަ އަހަރުން ފެށިގެން ޕްރޮމޯބޮޓް އިން ދަނީ އިންސާނުންގެ ސިފައާ ގާތް ރޮބޮޓްތައް އުފައްދައި ބާޒާރަށް ސަޕްލައި ކުރުމުގައި އަމަލީ ގޮތުން ހަރަކާތްތެރިވަމުންނެވެ.
