އިންޑިއާގެ މޮބައިލް ޚިދުމަތުގައި އުޅުނު ތިން ވަނަ ކުންފުނި، ވޮޑަފޯން-އައިޑިއާ ފަދަ ބަނގުރޫޓް ވެދާނެ ކަމުގެ ބިރު އޮތް ކުންފުނިތައް ސަލާމަތް ކޮށް ދިނުމަށް އިންޑިއާ ސަރުކާރުން ނިންމީ 2021 ވަނަ އަހަރުގެ ސެޕްޓެމްބަރު މަހުގެ ތެރޭގަ އެވެ. އެއިރު ބޮޑު ސުއާލަކަށްވީ، ސަރުކާރުން މިފަދަ ކުންފުނިތައް ސަލާމަތް ކުރާނީ ކިހިނެއް ހެއްޔެވެ؟
ވޮޑަފޯން އިންޑިއާ އަކީ މަޝްހޫރު ވިޔަފާރި ވެރިޔާ ކުމާރަ މަންގަލަމް ބައިރަލާގެ ކުންފުންޏެވެ. އޭނާ ވަނީ އިނގިރޭސިވިލާތުގެ ކުންފުންޏެއް ކަމަށްވާ ވޮޑަފޯންއާއެކު ޖޮއިންޓް ވެންޗަރއެއް ހަދާފައެވެ.
ދަރަނި ބޮޑުވުމުން، ވޮދަފޯން އައިޑިއާއިން ބުނަމުން ދިޔައީ ވިޔަފާރި ހުއްޓާލާނެ ކަމަށެވެ. ބައިރަލާއާއި ވޮޑަފޯނުންވެސް މިކަމަށް އެއްބަސްވިއެވެ. އެކަމކު މިއީ ބުނަން ފަސޭހަވިއަސް ކުރަން ފަސޭހަކަމެއް ނޫނެވެ. ކުންފުނީގެ ހިއްސާދާރުން ތިއްބެވެ. ކުންފުނީގެ ދަރަނިތައް ހުއްޓެވެ. ސްޕެކްޓްރަމް ބޭނުން ކުރުމުން، އިންޑިއާ ސަރުކާރަށް ދޭން ޖެހޭ ފައިސާތަކެއް ހުއްޓެވެ. އަދި އިންޑިއާ ސަރުކާރަށް ދައްކަން ޖެހި ނުދައްކާ ހުރި ޓެކްސްއާއި ރެވިއުވެސް ހުއްޓެވެ.
ވޮޑަފޯން އައިޑިއާ، ވެއްޓެމުން ދިޔަ ގޮތް ބަލާލަމާ ހެއްޔެވެ؟
މުކޭޝް އަމްބާނީގެ ރިލައެންސް ކުންފުނިން، އިންޑިއާގެ މޮބައިލް ވިޔަފާރީގެ ތެރެއަށް ވަދެގަތެވެ. އޭނާގެ ޖިއޯ އިން މުޅި ވިޔަފާރި ހިލާލައި، އަގު ހެޔޮކޮށް އިންޓަރނެޓާއި މޮބައިލްގެ ޚިދުމަތް ފެށިއެވެ. މުޅި މޮބައިލް ފޯނުގެ ޚިދުމަތް އަލުން އޭނާ ތަރުތީބު ކޮށްލިއެވެ.
2018 ވަނަ އަހަރު ވޮޑަފޯން އައިޑިއާގެ ކަސްޓަމަރުންގެ އަދަދަކީ 408 މިލިއަން އެވެ. 2021 ގެ ސެޕްޓެމްބަރުގެ ނިޔަލަށް މި ކަސްތަމަރުންގެ އަދަދު 253 މިލިއަނަށް ތިރިވެގެން ދިޔައެވެ.
އެއަށްފަހު އައިޑިއާ ވޮޑަފޯނުގެ ވިޔަފާރި ދަށަށް ގޮސް، ދަރަނި ބޮޑުވާން ފެށިއެވެ.
އިންޑިއާ ސަރުކާރަށް ފާހަގަވި ގޮތުގައި ސަރުކާރަށް ދައްކަން ޖެހޭ ފައިސާތަކެއް ވޮޑަފޯނުން އޮތީ ނުދައްކައެވެ. މައްސަލަ ކޯޓަށް ގެންދިއުމުން ޝަރީއަތުންވެސް ނިންމީ ސަރުކާރާއެއް ކޮޅަށެވެ.
އެއަށްފަހު އިންޑިއާ ސަރުކާރުން 2021 ވަނަ އަހަރުގެ ސެޕްޓެމްބަރު މަހު ވޮޑަފޯން އައިޑިއާ އަށް އައު ދިރުމެއް ދޭން ނިންމިއެވެ. ސަރުކާރަށް ދައްކަން ޖެހޭ ފައިސާ ދެއްކުމަށް ވަގުތު ދިނެވެ. އަދި ބޭނުންނަމަ ފައިސާގެ ބަދަލުގައި ކުންފުނީގެ ހިއްސާ ސަރުކާރަށް ދޭ ގޮތަށްވެސް ހަމަޖައްސައި ދިނެވެ.
ވޮޑަފޯން އައިޑީއަށް މި ގޮތް ކަމު ދިޔައެވެ.
ވޮޑަފޯނުގެ މެނޭޖްމަންޓުން ނިންމީ، އިންޑިއާ ސަރުކާރަށް ދައްކަން ޖެހޭ ފައިސާ ޙިއްސާއަށް ބަދަލުކުރާށެވެ.
އެހެންވެ، މިހާރު އިންޑިއާ ސަރުކާރަކީ ވޮޑާފޯން އައިޑިއާގެ އެންމެ ބޮޑު ހިއްސާދާރެވެ. 36 ޕަސެންޓްގެ ހިއްސާ އޮތީ އިންޑިއާ ސަރުކާރަށެވެ.
އިންޑިއާ ސަރުކާރުން މިކަން މި ގޮތަށް ނިންމީ، ރަށް ފުށުގައި ގިނަ އަދަދަކަށް ވޮޑާފޯން އައިޑިއާގެ ޚިދުމަތް ލިބޭ މީހުން ތިބޭ އިރު، ވޮޑަފޯން އައިޑިއާ ޚިދުމަތް ހުއްޓާލައިފިނަމަ، އިންޑިއާގެ މޮބައިލް އިންޓަރނެޓްގެ ޚިދުމތުގައި އޮންނާނީ އެންމެ ދެ ކުންފުންޏެވެ. އެއީ ރިލައެންސް ޖިއޯއާއި އެއަރޓެލްއެވެ. އެހެންވެ، ސަރުކާރުން ބޭނުންވީ މި ދެ ފަރާތަށް މިޚިދުމަތުގެ މޮނޮޕޮލީ ދޫކޮށްލުމުގެ ބަދަލުގައި ތިން ވަނަ ފަރާތަށްވެސް ދިރުމެއްދީފައި މި ވިޔަފާރި ވާދަވެރި ގޮތަކަށް ބާއްވާށެވެ.
