ކޮރޯނާވައިރަސް ގެ ބަލިމަޑުކަމުގެ ސަބަބުން ދުނިޔޭގައި ފަގީރުންނާއި މުއްސަނދީގެ ހަމަހަމަކަން ގެއްލިފައި ވާއިރު ފަގީރުންނަށް ވެކްސިން ފޯރުވައި ދިނުމަށް ދުނިޔޭގެ ބިލިއަނަރުންގެ އަތުން އެއް ފަހަރަކަށް ނަގާ 99 ޕަސެންޓްގެ ޓެކްސްއެއް ނެގުމަށް އޮކްސްފާމް އިން ގޮވާލައިފިއެވެ. ޔޫކޭގެ އޮކްސްފާމަކީ ފަގީރުކަމާ ދެކޮޅަށް މަސައްކަތްކުރާ ޖަމްއިއްޔާއެކެވެ.
އެ ޖަމުއިއްޔާއިން ބުނެ ފައިވަނީ، ކޮވިޑްގެ ބަލިމަޑުކަމުގެ ތެރޭގައި ދުނިޔޭގެ އެންމެ މުއްސަނދިން ވަނީ ވަރަށް ބޮޑެތި މުއްސަނދިންނަށް ވެގެން ގޮސްފައެވެ. ސަރުކާރުތަކުން އިގްތިސާދު ދިރުވުމަށް އާންމުންނާއި ފަގީރުންނަށް ދިން ޕެކޭޖްތަކުންވެސް ފައިދާ ކޮށްފައިވާ ބަޔަކީވެސް މި މުއްސަނދިންކަމަށް އޮކްސްފާމް އިން ބުނެއެވެ.
އޮކްސްފާމް އިން ބުނާ ގޮތުން ވެކްސިން އުފެއްދުމަށް ހޭދަތަކެއް ކޮށްފައިވާއިރުވެސް މުއްސަނދިން ވަނީ ވެކްސިންތައް ގަނެ ބައްކޮށްފައެވެ.
އޮކްސްފާމް އިން އެކުލަވާލި ރިޕޯޓްގައި ބުނެފައި ވަނީ 2020 ވަނަ އަހަރުގެ މާޗް މަހު ބަލިމަޑުކަން ފެތުރެން ފެށި ފަހުން، ކޮންމެ ދުވަހަކު ވެސް ގާތްގަނޑަކަށް އާ ބިލިއަނަރަކު ދުނިޔޭގައި މަހުޖަނުންގެ ލިސްޓަށް އިތުރު ވެފައި ވެއެވެ. އޮކްސްފާމް އިން ބުނި ގޮތުގައި އީލޮން މަސްކް، ޖެފް ބޭޒޯސް އަދި ބިލް ގޭޓްސް ހިމެނޭ ގޮތަށް ދުނިޔޭގެ އެންމެ މުއްސަނދި 10 ފިރިހެނުންގެ ނަސީބު ވަނީ ދެގުނަ އަށް އިތުރުވެގެން ގޮސްފައެވެ. މިމީހުންގެ މުއްސަނދިކަން 1.5 ޓްރިލިއަން ޑޮލަރަށް ވުރެ އިތުރުވެގެން ގޮސްފައި ވެއެވެ. އަދި އެ މީހުންނަކީ ދުނިޔޭގެ އެންމެ ފަގީރު 3.1 ބިލިއަން މީހުންނަށް ވުރެ ހަ ގުނައަށް މުއްސަނދި ބައެކެވެ.
އޮކްސްފާމް އިން ބުނީ މި ބަލިމަޑުކަމުގެ ތެރޭގައި އިތުރު 160 މިލިއަން މީހުން ފަގީރުކަމުގެ ތެރެއަށް ވެއްޓެން މަޖުބޫރުވެފައިވާ ކަމަށެވެ.
