ޚޯސްތު ޕްރޮވިންސްގެ އިސްމާއީލް ޑިސްޓްރިކްޓްގެ ރައްޔިތެއް ކަމަށްވާ އަދި ކުރީގެ ސަރުކާރުގެ ސިފައިންގެ ތެރޭގައި އުޅުނު ހަޔާތު ގުލް ވަނީ މީގެ ވިއްސަކަށް ދުވަސް ކުރިން އަތްމަތީގެ ދަތިކަމާއި ވަޒީފާއެއް ނުލިބުމުގެ ސަބަބުން އަމިއްލައަށް މަރުވެފަ އެވެ.
އޭނާގެ ހަތް ކުދިން ތިބެއެވެ. މި ކުދިން ބުނަނީ އާއިލާގައި ހުރި އާމްދަނީ ލިބޭ އަދި އާމްދަނީ ހޯދެން ހުރި ހަމައެކަނި ފަރާތް އެމީހުންނަށް ގެއްލުނީ ކަމަށެވެ. އަދި މިކަމުގެ ސަބަބުން އެކުދިން ބިކަ ވެފައިވާ ކަމަށެވެ.
"ބާރަ ޖަހާކަންހާއިރު، ބައްޕާ އޮތީ އެނދުގައި. އަހަރެން ކައިރީ ބޭރަށް ދާން ބުނީމާ، ބޭރަށް ނިކުތިން. ދެން އިވުނީ އެއްޗެއް ގޮވި އަޑު. ގެއަށް ވަން އިރު އެންމެން ރޮނީ، ބައްޕަ ފެނުނީ އެނދުމަތީގައި މަރުވެފައި އޮއްވާ،" ހަޔާތު ގުލްގެ ނުވަ އަހަރުގެ ދަރިފުޅު ނާސިބް ނޫރު ބުންޏެވެ.
ހަޔާތު ގުލްގެ އަންހެން ދަރިފުޅު ސުރައްޔާ ބުނަނީ ބައްޕަ ނިޔާވުމުން އޭނާއަށް ދެން ކިޔެވުން ކުރިއަށް ނުގެންދެވޭނެ ކަމަށެވެ.
"އަހަރެމެންގެ ބައްޕަ ދިރިހުރިއިރު، އަހަރެމެންނަށް ފޮތްތަކާއި ލިޔާ ފޮތްތަކާއި ބޭނުންވާ ހުރިހާ އެއްޗެއް ގެނެސްދޭނެ، މިހާރު ބައްޕަ މަރުވެއްޖެ، އަހަރެމެންނަށް ފޮތްތައް ގަނެދޭނެ މީހަކު ނެތް،" ސުރައްޔާ ބުންޏެވެ.
ހަޔާތު ގުލްގެ ކޮއްކޮ ބުނިގޮތުގައި މިހާރު ބޭބެގެ އާއިލާގެ ޒިންމާ ނަގަން ޖެހިފައި ވަނީ އޭނާއަށެވެ. މި ޚަބަރު ބަލާ ކޮންމެ މީހަކު ވެސް، އާއިލާއަށް އެހީތެރިވުމަށް އޭނާ އެދުނެވެ.
ހަޔާތު ގުލްގެ އަންހެނުން ބުނާ ގޮތުގައި ދަރިންގެ މުސްތަގުބަލު ކަށަވަރު ނުވާ ކަމަކީ އޭނާގެ އެންމެ ބޮޑު ކަންބޮޑުވުމެވެ.
ތާލިބާނުން ބުނަނީ ހަޔާތު ގުލްގެ އާއިލާގެ އިތުރުން އެ ގައުމުގައި ތިބި އެފަދަ އާއިލާތަކަށް ވެސް އެހީވުމަށް މަސައްކަތް ކުރަމުން އަންނަ ކަމަށެވެ.
ޚޯސްތުގެ އިންފޮމޭޝަން އެންޑް ކަލްޗަރ ޑިޕާޓްމަންޓްގެ ޑިރެކްޓަރ ޝަބީރު އަޙުމަދު އުސްމާނީ ބުނިގޮތުގައި އަމީރުލް މުއުމިނީ ވަނީ މިފަދަ އާއިލާތަކުގެ މައްސަލަތައް ހައްލުކޮށްދިނުމަށް އަމުރުކޮށްފައެވެ.
