ޔޫކްރެއިންއާ ދެކޮޅަށް ރަޝިޔާއިން ކޮންމެ ހިނދެއްގައިވެސް ހަމަލައެއް ދީފާނެ ކަމުގެ އިންޒާރު އެމެރިކާއިން ދީފިއެވެ.
"އަޅުގަނޑުމެން ގަބޫލުކުރާ ގޮތުގައި މިހާރު މިތިބީ ޔޫކްރެއިންއަށް ކޮންމެ އިރެއްގައި ވެސް ރަޝިޔާއިން ހަމަލާއެއް ދީފާނެ ފަދަ މަރުހަލާއެއްގައި،" ވައިޓް ހައުސްގެ ޕްރެސް ސެކްރެޓަރީ ޖެން ޕަސާކީ ވިދާޅުވި އެވެ.
މި މައްސަލާގައި ނުތަނަވަސްކަން އިތުރުވެ، ރަޝިއާ އާއި ޔޫކްރެއިންގެ އަވަށްޓެރި ބެލަރޫސް އިން ވަނީ އަންގާރަ ދުވަހު ކުއްލި ގޮތަކަށް އަސްކަރީ ތަމްރީންތަކެއް ފަށާފަ އެވެ. ބެލަރޫސްގެ ދިފާއީ ވުޒާރާއިން ބުނީ މި އަސްކަރީ ތަމްރީން ތައް ބާއްވަނީ އެގައުމުގެ ހުޅަނގު އަދި ދެކުނުގެ ބޯޑަރު ތައް ހިމެނޭ ގޮތަށް އަސްކަރީ ނުތަނަވަސްކަން "އިތުރަށް ގޯސްވަމުން" ދާތީ ކަމަށެވެ.
ޔޫކްރެއިން އޮންނަނީ ބެލަރޫސްގެ ދެކުނުން، ނޭޓޯއާއި އީޔޫގެ މެމްބަރު ޕޮލެންޑްގެ އިރުމަތީގައެވެ.
މޮސްކޯއިންވެސް އަދި މިންސްކްއިންވެސް މި ތަމްރީންގައި ބައިވެރިވި ސިފައިންގެ އަދަދު ހާމަކޮށްފައި ނުވެއެވެ. ނަމަވެސް، ބެލަރޫސްއިން އާންމުކުރި ވީޑިއޯއިން ފެންނަ ގޮތުގައި، ޓޭންކްތަކާއި އަސްކަރީ އުޅަނދުތައް ރޭލުތަކުން ބާލަމުންދާ މަންޒަރު ފެނެއެވެ.
ރަޝިޔާގެ އެތައް ހާސް ސިފައިންނެއް ޔޫކްރެއިންގެ ބޯޑަރު ހުރަސްކޮށް ޔޫކްރެއިންގެ އެތެރޭގައި ތިބި ކަމަށް ވެއެވެ.
