ތަކެތީގެ އަގު އަތް ނުފޯރާ ފަށާސް ގޮސްފައިވާ ޕާކިސްތާނުގައި އާއިލާއަށް ކާންދިނުމަށް ފައިސާ އަށް އެދި އާދޭސް ކުރުމަށް އެތައް ބަޔަކަށް މަޖުބޫރުވެފައި ވެއެވެ. އާންމު ރައްޔިތުން ތަކެތީގެ އަގު ބޮޑުކަމުގެ ވާހަކަ ދައްކާއިރު، އަންނަ އަހަރު އާންމު އިންތިޚާބާ ކުރިމަތިލައްވަން ޖެހޭ ބޮޑުވަޒީރު އިމްރާން ޚާން، އަލުން އިންތިޚާބު ވެވަޑައިގަތުމުގެ ފުރުސަތު ހަނިކަމަށް މީހުން ދެކެއެވެ.
ޕާކިސްތާންގައި މިދިޔަ އަހަރު އިންފްލޭޝަން ހުރީ ގާތްގަނޑަކަށް 10 ޕަސެންޓްގައި ކަމަށް ވޯލްޑް ބޭންކުން ބުނެ އެވެ. އިމްރާން ޚާން ވެރިކަމާ ހަވާލުވެވަޑައިގެންނެވި ފަހުން ކުކިން އޮއިލްގެ އަގު 130 ޕަސެންޓަށް އުފުލިފައިވާއިރު ތެލުގެ އަގު ވަނީ އަހަރެއްގެ ތެރޭގައި 45 ޕަސެންޓަށް އުފުލިފަ އެވެ.
އިމްރާން ޚާން ވަނީ 2018 ވަނަ އަހަރު އޭނާގެ ޕާކިސްތާން ތަހްރީކޭ އިންސާފް (ޕީޓީއައި) ޕާޓީ، ވެރިކަމަށް އައިސްފިނަމަ، ކޮރަޕްޝަނާއި ކްރޮނިޒަމް ނައްތާލައްވާނެ ކަމަށް ވަޢުދުވެވަޑައިގެންފައެވެ. ނަމަވެސް އޭނާއަށް ވައުދުތައް ފުއްދަވައި ނުދެއްވުނު ކަމުގެ އިހުސާސް މީހުން ދަނީ ކުރަމުންނެވެ.
އިންސާނީ ހައްގުތަކަށް މަސައްކަތްކުރާ އެކްޓިވިސްޓު އަދި ސިޔާސީ ކޮމެންޓޭޓަރެއް ކަމަށްވާ ތައުސީފް އަހުމަދު ޚާން ބުނާގޮތުން ސަރުކާރުން ދަނީ އިގުތިސޯދީ ކާމިޔާބު ހޯދާފައިވާ ކަމަށް ބުނެ ފޮނިކަނޑަމުންނެވެ. އޭނާ ބުނަނީ ހަޤީޤަތުގައި ސަރުކާރަށް ވަނީ ވާނުވާ އޮޅިފައެވެ.
އިސްލާމިކް ވެލްފެއަރ ސްޓޭޓެއް އުފައްދަވާނެ ކަމުގެ ވައުދުގައި ބޮޑުވަޒީރު ޚާން ކެމްޕޭން ކުރެއްވީ، ފަޤީރުންނަށް ފައިދާވާގޮތަށް އިޖްތިމާޢީ މަޝްރޫޢުތައް ހިންގަވާނެ ކަމަށް ވައުދުވެ ވަޑައިގަންނަވަމުންނެވެ. އަދި ޓެކްސްގެ ނިޒާމު ހަރުދަނާ ކޮށް އެއިން އާންމުންނަށް މަޝްރޫއުތައް ހިންގަވާނެ ކަމަށްވެސް ވައުދުވެ ވަޑައިގަތެވެ.
ކޮވިޑް-19ގެ ބަލިމަޑުކަމުގެ ސަބަބުން ޚާނަށ ވަނީ އިތުރު ގޮންޖެހުންތަކާ ކުރިމަތިވެ ވަޑައިގެންފައެވެ. އަދި މުހައްލިލުންގެ ލަފައަކީ، ހާލަތު ބަދަލުކުރުމަށް ޚާން މާބޮޑު މަސައްކަތެއް ނުކުރައްވާ ކަމަށެވެ.
ބައެއް ފަރާތްތަކުން ބުނާ ގޮތުގައި ތަކެތީގެ އަގު ބޮޑުވެ، ވަޒީފާ ނެތް މީހުންގެ އަދަދު ވަނީ އިތުރު ވެފައެވެ. މިއަދުގެ ޕާކިސްތާންގެ ހަގީގަތަކީ މިއީ ކަމަށް އެފަރާތްތަކުން ބުނެއެވެ.
ހިނގަމުން މިދާ 2022 ވަނަ އަހަރު ޕާކިސްތާންގެ އިޤްތިޞާދު 4 އިންސައްތަ ކުރިއަރާނެކަމަށް ލަފާކުރި ނަމަވެސް، ފާއިތުވި 3 އަހަރު އިޤްތިޞާދު އޮތީ ވަރަށް ބޮޑަށް މަޑުޖެހިފަ އެވެ. ރުޕީސްގެ އަގު ވެސް ވަނީ 12 ޕަސެންޓަށް ދަށަށް ގޮސްފަ އެވެ.
ފުރަ ބަންދަށް ފަހު، ދީފައިވާ ލުއިތަކުން އުފެއްދުންތެރިކަމާއި ޚިދުމަތުގެ ދާއިރާއަށް ދިރުމެއް ލިބިފައި ވެއެވެ. އަދި މި އަހަރު ރަނގަޅަށް ވާރޭ ވެހުމުގެ ސަބަބުން ދަނޑުވެރިކަން ކުރިއަރައިމަތިވަރު ރަގަޅު ވާނެ ކަމަށް ވޯލްޑް ބޭންކުން ބުނެ އެވެ. އެކަމަކު އިގްތިސޯދަށް ކުރިމަތިވެފައިވާ އެންމެ ބޮޑު މައްސަލައަކީ ދަރަނީގެ ގޮތުގައި ގާތްގަނޑަކަށް 127 ބިލިއަން ޑޮލަރު ސަރުކާރަށް ދައްކަން ޖެހިފައި ވުމެވެ.
ެއސ
ބޮޑު ވަޒީރު އިމްރާން ޚާން ވަނީ 2019 ވަނަ އަހަރު 6 ބިލިއަން ޑޮލަރުގެ ލޯނެއް ހޯދަން އިންޓަރނޭޝަނަލް މަނިޓަރީ ފަންޑް (އައި.އެމް.އެފް) އާއެކު ކާމިޔާބުކަމާއެކު މަޝްވަރާކުރައްވާފައެވެ. އެފަރާތުން ވަނީ ޕެޓްރޯލާއި ކަރަންޓުގެ އަގު ބޮޑުކުރުން ފަދަ ވޭންދެނިވި ފިޔަވަޅުތަކެއް އެޅުމަށް ޕާކިސްތާނަށް އަންގާފައެވެ.
ޕާކިސްތާނުން ބޭރުގެ ފަރާތްތަކުން ނަގާފައިވާ ދަރަނި ދެއްކުމަށް ދަތިވުމުން އިސްލާމްއާބާދުން ދާދިފަހުން ވަނީ ޗައިނާއާއި ސަޢޫދީ ޢަރަބިއްޔާއިން ކުރެ ކޮންމެ ޤައުމަކުން 3 ބިލިއަން ޑޮލަރާއި، ޔުނައިޓެޑް އަރަބް އެމިރޭޓްސްއިން 2 ބިލިއަން ޑޮލަރު ހޯދާފައެވެ.
ޕާކިސްތާންގެ މިނިވަން އިކޮނޮމިސްޓެއް ކަމަށްވާ ގައިސަރު ބެންގާލީ ވިދާޅުވާ ގޮތުގައި މިހާރު ނަގަމުންދާ ހުރިހާ ލޯނަކީ ވެސް، ކުރީގެ ލޯނުތައް ދައްކަން ނަގަން ޖެހޭ ލޯނުތަކެކެވެ. "އަސްލު އިގްތިސޯދު އޮތީ ބަނގުރޫޓުވެފައި. ޕާކިސްތާނަށް ލޯނު ވެސް ނުދެއްކޭނެ."އޭނާ ޑޯން ނޫހާ ވާހަކަ ދައްކަމުން ބުންޏެވެ.
ޕާކިސްތާންގައި ޓެކްސްއަށް މަކަރު ޖެހުމަކީ ގައުމީ އާންމު ވައްކަމެކެވެ. 2020 ވަނަ އަހަރު ދެ މިލިއަނަށްވުރެ މަދު އަދަދެއްގެ މީހުން ޓެކްސް ދައްކާ ފައިވެއެވެ. މިހިނދު ޕާކިސްތާންގެ އާބާދީގައި ގިނައިން އާމްދަނީ ލިބޭ މީހުން މިއަށް ވުރެން 25 ގުނައަށް އިތުރު ކަމަށް ދައްކައެވެ.
