އަންހެނުންނާ ދެކޮޅަށް އިހާނެތި ކޮމެންޓްތައް ކުރި ކަމަށް ބުނެ މުމްބާއީ ފުލުހުންގެ ސައިބަރ ކްރައިމް ބްރާންޗުން ހަރިޔާނާގެ ތިން ޒުވާނަކު ހައްޔަރު ކޮށްފިއެވެ. މި ތިން މީހުން ވާހަކަ ދައްކާފައި ވަނީ ކްލަބް ހައުސްގެ ޗެޓް ރޫމެއްގައެވެ.
ފުލުހުން ވަނީ ޔުއްތުރަ ޕްރަދޭޝްގެ ލަކްނައު އިން މި ޗެޓްރޫމް ކްރިއޭޓް ކުރި އުމުރުން 20 އަހަރުގެ ޒުވާނާވެސް ގެނަސް އޭނާއާ ވެސް ސުއާލު ކޮށްފައެވެ.
ފުލުހުން ބުނިގޮތުގައި މި ތިން މީޙުން ވަނީ އަންހެނުންގެ ގުނަވަންތަކަށް ސިފަ ކިޔައި އަންހެނުންގެ ގުނަވަންތައް ނީލަން ކިޔުމަށް ވާހަކަ ދައްކައި މަލާމާތް ކޮށްފައެވެ.
ކްލަބްހައުސްގައި މިމީހުން ދައްކާފައިވާ ވާހަކަތަކުގެ ވީޑިއޯ ވެސް ވަނީ ވައރަލް ވެފައެވެ. ފުލުހުން މިމީހުން ހައްޔަރުކުރީ މި މައުލޫމާތުގެ މައްޗަށް ބިނާކޮށް، ގާނޫނުލްއުގޫބާތާއި އިންފޮމޭޝަން ޓެކްނޮލޮޖީ ގާނޫނުގެ ދަށުންނެވެ.
