ހިއުމަން ރައިޓްސް ވޮޗުން ނެރެފައިވާ ވޯލްޑް ރިޕޯޓް 2022 ގައި ބުނެފައި ވަނީ 2021 ވަނަ އަހަރު ލަންކާ ސަރުކާރުން ބައި މަދު ދަރިކޮޅުތަކުގެ މީހުން ނިކަމެތިކޮށް، އިންސާނީ ހައްގުތަކުގެ ދާއިރާގައި ހަރަކާތްތެރިވި އެކްޓިވިސްޓުންނަށް ފުރައްސާރަކޮށް، ޑިމޮކްރެޓިކް މުއައްސަސާތައް ނިކަމެތިކޮށްފައިވާ ކަމަށެވެ. ރައީސް ގޯޓާބަޔަ ރާޖަޕަކްސަގެ ސަރުކާރުން، ބައިނަލްއަގްވާމީ ބައިވެރިންނަށް ވައުދުވި ގާނޫނީ އިސްލާހީ ބަދަލުތައް ގެނައުމުގައި ނާކާމިޔާބުވެފައިވާ ކަމަށެވެ. އަދި ހަނގުރާމައިގެ ބޮޑެތި ޖަރީމާތައް ހިންގާފައިވާ ފަރާތްތައް ޖަވާބުދާރީ ކުރުވުމަށް ހުރަސް އެޅި ކަމަށެވެ.
752 ސަފުހާގެ ވޯލްޑް ރިޕޯޓް 2022 ގައި އިންސާނީ ހައްގުތަކާ ބެހޭ މައްސަލަތައް ރިވިއުކޮށްފައިވަނީ ގާތްގަނޑަކަށް 100 އެއްހާ ގައުމެއްގަ އެވެ. ހިއުމަން ރައިޓްސްގެ އެގްޒެކެޓިވް ޑިރެކްޓަރ ކެނެތު ރޮތް، ވިދާޅުވި ގޮތުގައި ޚުދު މުޚުތާރު ގޮތްތައް އާންމުވުމަކަށް ފުރުސަތެއް ނެތެވެ. ޤައުމަކަށ ްފަހު ގައުމެއްގައި ޑިމޮކްރަސީގެ ބާރުގަދަކަން ދައްކައިދޭ ހެއްކަކީ މީހުން މަގުތަކަށް ނިކުމެ، އަދި އެމީހުން ހައްޔަރުކޮށް ފާނެ ކަމުގެ ނުވަތަ ބަޑި ޖަހައި މަރާލާނެ ކަމުގެ ނުރައްކާ އޮތް އިރުވެސް ސަރުކާރުތަކާ ދެކޮޅަށް ބަސްބުނަމުންދާ ކަމެކެވެ. ހަމައެއާއިއެކު އިންތިޚާބުތައް އޮޅުވާލުމަކީ ވެރިކަމުގައި ތިބި މީހުންނަށް އުދަނގޫކަމެއްކަމަށްވެސް ދަނީ ފެންނަމުންނެވެ. ޑިމޮކްރެޓިކް ލީޑަރުން، ޤައުމީ އަދި ދުނިޔޭގެ ފެންވަރުގައި ކުރިމަތިވާ ގޮންޖެހުންތަކާ ކުރިމަތިލލުމަށާއި ޑިމޮކްރެސީގެ ވަޢުދުތަކުން ރައްޔިތުންނަށް ފައިދާ ހޯއްދަވައިދެއްވުމަށް މިހާރަށްވުރެ ރަނގަޅަށް މަސައްކަތް ކުރައްވަން ޖެހޭނެ ކަމުގައި ވިދާޅުވިއެވެ.
ސްރީލަންކާގެ ވާހަކައިގައި މިރިޕޯޓްގައި ބުނެފައި ވަނީ ރާޖަޕަކްސަގެ ސަރުކާރުން ވަނީ އިސްލާހީ ވައުދުތަކަށް އިހުމާލުވެފައި ކަމަށެވެ، މައިނޯރިޓީ ތަމަޅައިންނާއި މުސްލިމުންނަށް އަމާޒުކޮށް ހަމަލާތައް ދެމުން ގެންދާކަމަށެވެ. ޓެރަރިޒަމް މަނާކުރުމުގެ ގާނޫނާއި، އެ ގައުމުގައި ޒަމާނުއްސުރެ ނަހަމަ ގޮތުގައި ބޭނުން ކޮށްފައިވާ ޓެރަރިޒަމް ހުއްޓުވުމުގެ ގާނޫނާއި، ދީނީ މިނިވަންކަމާއި ބައި މަދު މީހުންގެ ހައްގުތަކަށް ނުރައްކާވާ ފަދަ ސިޔާސަތުތައް ސަރުކާރުން ބޭނުން ކުރަމުންދާ ކަމަށެވެ.
2021 ވަނަ އަހަރުގެ މާޗް މަހު އދގެ އިންސާނީ ހައްގުތަކާ ބެހޭ ކައުންސިލުން ވަނީ، ސްރީލަންކާގައި ހިންގާފައިވާ ބޮޑެތި ޖަރީމާތަކުގެ ހެކި، މުސްތަގުބަލުގައި ދައުވާތަކުގައި ބޭނުންކުރުމަށް އެއްކުރުމަށާއި، ތައްޔާރުކުރުމުގެ މަސައްކަތް ކުރުމަށް އދގެ އިންސާނީ ހައްގުތަކާބެހޭ ހައިކޮމިޝަނަރުގެ އޮފީހަށް ލާޒިމުކޮށްފައެވެ. އެކަމަކު ލަންކާގެ ގާނޫނު ހަދާ މަޖިލީހުގައި ގަރާރެއް ފާސްކޮށްގެން ސަރުކާރުން ވަނީ ކުރީގެ ސަރުކާރުން ފެށި އިންސާނީ ހައްގުތަކާ ބެހޭ ތަހުގީގުތައް ހުއްޓުވުމަށް މަސައްކަތް ކޮށްފައެވެ.
މީގެ އިތުރުން، ސްރީލަންކާގެ ހިއުމަން ރައިޓްސް ކޮމިޝަނާއި، ގެއްލިފައިވާ މީހުންގެ މައްސަލަތައް ބަލާ އޮފީސް ހިމެނޭ ގޮތަށް، މިނިވަން މުއައްސަސާތަކަށް، ހުރަސް އެޅުމުން ރާޖަޕަކްސަގެ ސަރުކާރަށް މީހުންގެ އިތުބާރު ގެއްލިފައިވާ ކަމަށްވެސް ބުނެަފއި ވެއެވެ.
ފައިބެ އަހަރު، ސްރީލަންކާގެ ސަލާމަތީ ބާރުތަކުން ވަނީ އިންސާނީ ހައްގުތަކަށް ވަކާލާތު ކުރާ ފަރާތްތަކާއި، ނޫސްވެރިންނާއި، ގާނޫނީ ވަކީލުންނާއި، ކުރީގެ އަނިޔާތަކުގެ ޝިކާރައަކަށްވި އާއިލާތަކަށް ފުރައްސާރަކޮށް، ބިރުދައްކައި ހަދާފައެވެ. އަދި ސުލްހަވެރި މުޒާހަރާތައް ރޫޅާލާފައެވެ. ފުލުހުންގެ ޓެރަރިޒަމް އިންވެސްޓިގޭޝަން ޑިވިޜަން ހިމެނޭގޮތަށް ސަލާމަތީ އިދާރާތަކުން ވަނީ މަދަނީ ޖަމްޢިއްޔާތައް މޮނިޓަރކޮށް، ބިރުދައްކައި، ޓެރަރިޒަމަށް ފައިނޭންސްކުރުން ހުއްޓުވުމުގެ ނަމުގައި މި ތަންތަނަށް ފަންޑުކުރާ ފަރާތްތަކަށް ނުފޫޒު ފޯރުވާފައި ކަމަށްވެސް މި ރިޕޯޓްގައި ބުނެފައި ވެއެވެ.
