އިނގިރޭސިވިލާތުގެ ބޮޑު ވަޒީރު ބޮރިން ޖޯންސަން ވަނީ އޭނާގެ ވެރިކަމުގެ މުއްދަތުގައި ކުރިމަތިލައްވާ ތިން ވަނަ ފަޟީހަތާ ކުރިމަތި ލައްވާފައެވެ. އިނގިރޭސިވިލާތުގައި ވެރިކަމުގެ ފަންތީގެ ބަހުސަކީ ބޮރިން މިހާރު މަގާމުން އިއސްތިއުފާ ދެއްވަން ވެއްޖެ ކަމަށެވެ. ބޮރިން އާއި ބައިވެރިން ވަނީ ޕްރިންސް ފިލިޕްގެ ޖަނާޒާ އޮތް ދުވަހުގެ ރޭވެސް ފަތިސްވަންދެން ޕާޓީ ބާއްވާފައެވެ.
ބޮރިސްއަށް ފަހު އިނގިރޭސި ބޮޑު ވަޒީރުގެ މަގާމަށް އެންމެ ބޮޑަށް ނަން ކިޔޭފަރާތަކީ އެގައުމުގެ މާލީ ވަޒީރު ރިޝީ ސޫނާކްއެވެ.
ރިޝީ ސޫނާކްއަކީ އިންޑިއާގެ އިންފޮމޭޝަން ޓެކްނޮލޮޖީގެ އެންމެ މުއްސަނދި މީހާ، ނަރަޔާނާ މުރްތީގެ ދަނބިދަރިފުޅެވެ. ސޫނާކްއަށް އިއުތިރާޒް ކުރާ ފަރާތްތަކުން ކުރާ ސުއާލަކީ އޭނާއަކީ ބޮރިސްއަށް ވަފާތެރި ބޭފުޅެއް ބާވައެވެ؟ އަދި ހިޖުރަ ކުރާ މީހުންނާ މެދު އޭނާ ގެން ގުޅުއްވާނީ ކޮން ސިޔާސަތެއް ބާވައެވެ؟
ސޫނާކްއަކީ، އޮކްސްފޯޑާއި ސްޓޭންފޯރޑް ޔުނިވަރސިޓީން ކިޔަވައި ވިދާޅުވެގެން ހުންނެވި ބޭފުޅެކެވެ. އަދި މިލިއަނަރެކެވެ.
އުމުރުން 41 އަހަރުގެ ރިޝީ ސޫނާކްއަށް މި މަގާމު ލިބިވަޑައިގެންފިނަމަ، އޭނާ ވެ ވަޑައިގަންނަވާނީ ކުލައިގެ ނަސްލަކުން އިނގިރޭސި ބޮޑުވަޒީރުކަން ކުރައްވާ އެންމެ ފުރަތަމަ މީހާއަށެވެ. އިނގިރޭސިވލާތުގެ ވެރިރަށް ލަންޑަންގެ މޭޔަރއަކީވެސް މިހާރު ޕާކިސްތާން ދަރިކޮޅުގެ މުސްލިމެކެވެ.
ސޫނާކްއަކީ ކެންޔާއާއި ޓެންޒާނިއަށް އުފަން އިންޑިއާ ދެމަފިރިއަކު އިނގިރޭސިވިލާތަށް ހިޖުރަކޮށްގެން އިނގިރޭސިވިލާތުގައި ވިހޭ މީހެކެވެ.
