ޕާކިސްތާނުގައި އެންމެ ގިނަ މީހުން ފައްސިވިކަމަށް މިފަހުން ރިޕޯޓް ކޮށްފައި ވަނީ ހުކުރު ދުވަހުއެވެ. ހުކުރު ދުވަހު 7678 މީހުންނަށް ކޮވިޑް-19 ޖެހިގެން ރިޕޯޓްކޮށްފައިވާއިރު، މިއީ 2020 ވަނަ އަހަރުގެ ފެބްރުއަރީ މަހު ބަލިމަޑުކަން ފެށުނު ފަހުން އެންމެ ގިނަ އަދަދަކަށް މީހުން ޕޮޒިޓިވްވި ދުވަހެވެ.
2020 ވަނަ އަހަރުގެ ޖޫން މަހުގެ 13 ވަނަ ދުވަހު ޕާކިސްތާނުން އެންމެ ފަހުން ކޮވިޑު-19 އަށް އެންމެ ގިނަ މީހުން ޕޮޒިޓިވްވެފައިވަނީ 6825 މީހުންނަށް ކަން ރިޕޯތް ކޮށްފައި ވެއެވެ.
މިހާރު ޕާކިސްތާންގައި ގައިމީ ފެންވަރުގައި ފައްސިވާ ނިސްބަތް އުޅެނީ 12.93 ޕަސެންޓަށް އިތުރު ވެފައެވެ.
އާންމު ކޮށް މީޙުން ފައްސިވާ ނިސްބަތް އިތުރު ވުމުން، ޕާކިސްތާންގެ ކޯވިޑް19 މޮނީޓާ ކުރާ އިދާރާ ނޭޝަނަލް ކޮމާންޑް އެންޑް އޮޕަރޭޝަންސް ސެންޓަރުން ވަނީ، މިސްކިތްތަކަށް ދާ މީހުންނަށް ވެކްސިން ސެޓްފިކެޓް ދައްކަން ލާޒިމްކޮށް، ނަމާދަށް ދާމީހުންނަށް އާ ފިޔަވަޅުތަކެއް އަޅާފައެވެ.
އިއްޔެ ނެރުނު ބަޔާނެއްގައި ބުނެފައި ވަނީ ވަބާއަށް އަޅާ ފިޔަވަޅެއްގެ ގޮތުން ކާޕެޓް ތައް ނަގައި ވައިރަސް ފެތުރުން ހުއްޓުވުމަށް ޓަކައި އަޅުކަން ކުރާ މީހުންގެ މެދުގައި ހަ ފޫޓުގެ ދުރުމިނެއް ބެހެއްޓުމަށްވެސް އަންގާފައެވެ.
މީގެ އިތރުން ވައިރަސް ފެތުރުން ހުއްޓުވުމަށްޓަކައި ގޭގޭގައި ނަމާދު ކުރުމަށްވެސް ބާރުއަޅާފައި ވެއެވެ. އަދި ނަމާދު ހޙޮލުތަކުގައި ކުރުމުގެ ބަދަލުގައި ހުޅުވާލެވިފައިވާ ތަންތާނގައި ކުރުމަށާއި މިސްކިތްތަކުގެ ކުޑަ ދޮރުތައް ހުޅުވައި ވައި ދައުރުވާ ގިތް ހެދުމަށްވެސް ބާރުއަޅާފައި ވެއެވެ.
އަދި މިދުވަސްވަރަށް ޚާއްސަކޮށް، ހުކުރު ޚުޠުބާ ތައް ކުރުކޮށް ބެހެއްޓުމަށާއި، ބަލިމީހުންނާއި އުމުރުން ދުވަސްވީ މީހުންނާއި ކުޑަކުދިން ނަމާދަށް ނުދިއުމަށް ހިތްވަރު ދިނުމަށް ވެސް އެދިފައި ވެއެވެ.
