ރަޝިޔާއާއި ޔޫކްރެއިންގެ ހަނގުރާމައިގެ ހާލަތު ފިނިކުރުމަށް ވާހަކަ ދައްކަމުން ދިޔަ މަސްއޫލުވެރިން އެއްބަސްވެވަޑައިގެންފައި ވަނީ، އިރުމަތީ ޔޫކްރެއިންގައި ދާއިމީ ގޮތެއްގައި ހަނގުރާމަ ހުއްޓާލުމުގެ އެއްބަސްވުމަށް ޝަރުތެއްނެތި ދެ ފަރާތުން އެއްބަސްވެ މަޝްވަރާތައް ކުރިއަށް ގެންދިއުމަށެވެ.
ޔޫކްރެއިން، ރަޝިއާ، ޖަރުމަނުވިލާތް އަދި ފަރަންސޭސިވިލާތުގެ މަންދޫބުން ބައިވެރިވެގެން ހަތަރު ފަރާތުން ޕެރިހުގައި ވަނީ އެތައް ގަޑިއިރުވަންދެން މަޝްވަރާތައް ބާއްވާފައެވެ. މިމަޝްވަރާތައް އޮތީ ފަރަންސޭސި ރިއާސީ ގަނޑުވަރު އެލީސީ ޕެލެސްގައެވެ.
މޮސްކޯއާއި ކިއޭވްއާ ދެމެދު އުފެދިފައިވާ ނުތަނަވަސްކަން އެންމެ ބޮޑީ ރަޝިޔާގެ ސިފައިންގެ ބޮޑު ފައުޖެއް ރަޝިޔާއިން ޔޫކްރޭންގެ ބޯޑަރަށް ޖަމާ ކުރުމުންނެވެ.
ބުދަ ދުވަހުގެ ބައްދަލުވުމަށްފަހު މޮސްކޯގެ އެންމެ އިސް ނެގޯޝިއޭޓަރ ޑިމިޓްރީ ކޮޒާކް ވިދާޅުވީ، ހަނގުރާމަ ހުއްޓާލުމުގެ އެއްބަސްވުން ޝަރުތެއްނެތި ބަލައި ގަންނަން ޖެހޭކަމަށާއި، ނަމަވެސް އިރުމަތީ ޔޫކްރެއިންގެ އެހެން ގިނަ މައްސަލަތަކަށް އަދިވެސް ހައްލެއް ލިބިފައި ނުވާ ކަމަށެވެ.
