ކޮޅުނބުގައި ޓްރެފިކް ތޮއްޖެހުން ކުޑަކޮށް، ތެލަށް ކުރާ ހޭދަ ކުޑަ ކުރުމަށްޓަކައި ސްރީލަންކާއިން ބައިސްކަލް ދުއްވުން ޕްރޮމޯޓް ކުރުމަށް ޕްލޭނެއް ރާވައިފިއެވެ.
ސްރީލަންކާގެ ތިމާވެށްޓާ ބެހޭ ވަޒީރު މަހިންދަ އަމަރަވީރާ ވިދާޅުވީ، ވައި ނުސާފުވުން ކުޑަކުރުމަށާއި ސިއްޙަތަށް ފައިދާހުރި ގޮތަކަށް ބައިސިކަލް ބޭނުން ކރުމަށް މީހުންނަށް ހިތްވަރު ދިނުމަށް ސްރުކާރުން ތައްޔާރުވަމުންދާ ކަމަށެވެ.
އަމަރަވީރާ ވިދާޅުވީ ކޮލޮމްބޯއަށް އުޅަނދުތައް ވަދެ، ޓްރެފިކް ތޮއްޖެހުމުގެ ސަބަބުން ކިލޯމީޓަރަކަށް 103.56 ރުޕީސް ތެލަށް ޚަރަދުވެއެވެ. އޭނާ ވިދާޅުވީ ސަރުކާރުގެ އަމާޒަކީ، ބައިސްކަލް ދުއްވުން ޕްރޮމޯޓްކޮށް، އުޅަނދުގެ ތެލަށްދާ ހޭދަ ފައިދާއަކަށް ބަދަލުކުރެވޭނެ ފަދަ ގޮތަކަށް ސިޔާސަތު ބަދަލުކުރުމެވެ.
އަދި މަގުތައް ތަރައްގީ ކުރާއިރު ބައިސިކަލް ދުއްވާ މީހުންނަށް ޚާއްސަކޮށް ކޮންމެ މަގެއްގައި ވަކި ލޭނެއް ކަނޑައެޅުމާއި، ބައިސިކަލް ދުއްވާ މީހުންނަށް ޚާއްސަ އިނާޔަތްތަކެއް ލިބޭ ގޮތަށް ގަވާއިދުތަކަށް ބަދަލު ގެނައުމަށްވެސް ނިންމާފައިވާ ކަމުގައި އޭނާ ވިދާޅުވިއެވެ.
