ބުރްކީނާފާސޯއިން މަސައްކަތް ކުރަމުން ދިޔައީ 7 އަހަރު ވަންދެން އޮތް ޚުދުމުޚުތާރު ވެރިކަމުން ސަލާމަތް ވާށެވެ. 2014 ވަނަ އަހަރުގެ އޮކްޓޯބަރު މަހު މިކަން ކާމިޔާބުވީ، ރައީސް ބެލޭޒް ކޮމްޕާރޭ އިސްތިއުފާ ދެއްވައި ގައުމުން ބޭރަށް ވަޑައިގަތުމުންނެވެ. އެއަށްފަހު ބުރުކިނާފާސޯގައި ސިފައިން އިންތިގާލީ ސަރުކާރެއް އެކުލަވާލިއެވެ. މިއިންތިގާލީ ސަރުކާރު ވައްޓާލީވެސް ސިފައިންގެ އައު އިންގިލާބަކުންނެވެ. ފަހުން ބައްވާފައިވާ އިންތިޚާބުގައި ބުރުކިނާ މީހުން ވަނީ އެގައުމުގެ ތިންވަނަ މަދަނީ ރައީސްގެ ގޮތުގައި ރޮކް މާކް ކްރިސްޓިއަން ކަބޯރޭ 64އ އިންތިޚާބުކޮށްފައެވެ.
މި މަހުގެ 24 ވަނަ ދުވަހު، ބުރުކިނާފާސޯގެ ގައުމީ ޓީމުން އެފްރިކަން ކަޕް އޮފް ނޭޝަންސްގެ ކުއާޓާ ފައިނަލްގައި ޕެނަޓީ ޖަހައިގެން މޮޅު ހޯދިތާ އިރުކޮޅެއްގެ ތެރޭގައި ދުނިޔޭގެ މީޑިއާގެ ބްރޭކިންގ ނިއުސްއަށް ވެގެން ދިޔައީ މަދަނީ ރައީސްގެ ވެރިކަން އިންގިލާބަކުން ފުރޮޅާލި ވާހަކައެވެ.
ފުޓުބޯޅަ މެޗުގެ ކާމިޔާބީއާއެކު މީޙުން ވަނީ ވެރިރަށް ވަގަދޫގޯގެ މަގުތަކުގައި ބަޣާވާތަށް މަރުހަބާ ކިޔާފައެވެ.
ދެ ވަނަ ދައުރަކަށް ކަބޯރޭ އިންތިޚާބު ކޮށްފައި ވަނީ 2020 ވަނަ އަހަރުއެވެ. އޭނާގެ ސަރުކާރުގެ އިތުރުބާރު ގެއްލިފައި ވަނީ އެފްރިކާގެ މާލީއާއި ބުރުކިނާފާސޯ ހިމެނޭ ސަރަހައްދުގައި ހަނގުރާމަ ކުރަމުންދާ އަލްގައިދާ/ އައިސިސްގެ ޖިހާދީ ހަނގުރާމވެރިންގެ ހަމަލަތަކާ ހެދިއެވެ.
މި ހަމަނުޖެހުންތަކުގެ ސަބަބުން ބުރުކިނާ މީހުންގެ މިލިއަން މީހުން ވިއްސިވިހާލިވެފައި ވެއެވެ. އަދި އާބާދީގެ 21 މިލިއަން މީހުން ވަނީ އިގްތިސާދީ ކާރިސާއަކާ ކުރިމަތިލާނ ްޖެހިފައެވެ.
ސަލަފީ ފިކުރުގެ ޖިހާދީ ޓެރަރިސްޓް ހަނގުރާމަވެރިންގެ ސަބަބުން އިންގިލާބު އައި އެންމެ ފަހު ގައުމަކީ ބުރުކިނާފާސޯއެވެ. ނަމަވެސް އޭގެ ކުރިން މާލީއާއި ގިނީގެ ސަރުކާރުތައްވެސް ސިފައިން ވަނީ ހަމަ އެސަބަބާ ހެދި ވައްޓާލާފައެވެ. މިދިޔަ 18 މަސް ދުވަސްތެރޭ އެފްރިކާގެ ސާހިލް ސަރަހައްދުން މި މަންޒަރު ފެނެއެވެ.
މާލީގައި މީހުން ނުރުހެން ފެށީ ކުރީގެ ރައީސް އިބްރާހީމް ބޫބަކުރު ކީޓާގެ ލީޑަރޝިޕް ބަލިކަށި ވުމުންނެވެ. ކޮރަޕްޝަނާއި އިންތިޚާބު އޮޅުވާލުމާއި މަކަރު ހެދުމާއި ކޮރަޕްޝަން އޮތީ ހައްދުފަހަނައަޅާފއެވެ.
ހަމައެފަދައިން ގިނީގައި ގެނައި ބަޣާވާތަކީ، ރައީސް އަލްފާ ކޮންޑޭ ތިންވަނަ ދައުރަކަށް ހުންނެވުމަށް ގާނޫނުއަސާސީ ބަދަލުކުރުމަށް ކުރެއްވި މަސައްކަތަށް ރައްދު ދިނުމުގެ ގޮތުން ސިފައިން ކުރި ކަމެކެވެ.
އަވަށްޓެރި ގައުމުތަކުގައި ސަރުކާރު ވައްޓާލުން އާންމު ވެގެން ދިއުމުން އެކަމުން ހިތްވަރު ލިބިގެން ބުނުކިނާ މީހުން ކަބޯރޭގެ ސަރުކާރު ވައްޓާލީއެވެ. ބުރުކިނާފާސޯއަކީ އިންގިލާބު ގެނައުމުގައި މުއްސަނދި ތާރީޚެއް އޮތް ގައުމެކެވެ.
1980 ގެ އަހަރުތަކުގައި އެކަނިވެސް ހަތަރު އިންގިލާބު ގެނަސްފައި ވެއެވެ. އެގައުމުގެ އެންމެ މަގްބޫލު ރައީސް ތޯމަސް ސަންކަރާއަކީވެސް އިންގިލާބީ ލީޑަރެކެވެ.
މި ހުރިހައި އިންގިލާބަކަށް ބވުރެން ބުރުކިނާފާސޯގެ މިއަހަރުގެ އިންގިލާބު ތަފާތެވެ. މިދިޔަ އަހަރުގެ ނޮވެމްބަރު މަހު ޖިހާދީން ދިން އެއް ހަމަލާގައި 53 މީހުން މަރުވެފައިވެއެވެ. އދި އޭގެ ތެރޭގައި 49 ފުލުހުން ވެސް ހިމެނެ އެވެ.
2011 ވަނަ އަހަރު ލީބިޔާގެ މުއައްމަރުލް ގައްޒާފީ ގެ މަރަށްފަހު ލީބިޔާގައި ހިންގި ގަތުލުއާންމާ ގުޅިގެން ހުޅަނގު އެފްރިކާގައި އިންގިލާބު ގެނައުން އާންމު ވެފައި ވެއެވެ. މެދުއިރުމަތީގެ ހަމަނުޖެހުންތަކަށް ފަހު ނައިޖަރ، ޗާޑް އަދި މާލީއާ ދިމާއަށް ޓެރަރިޒަމާ ގުޅުން ހުރި ޖަމާޢަތްތައް ހިޖުރަކޮށްފައިވާ ކަމަށް ތަޖުރިބާކާރުން ބުނެއެވެ.
މުއްނސަދި އަވަށް ތެރި ގައުމުތައް ކަމަށްވާ ނައިޖޭރިއާ ނުވަތަ އައިވަރީކޯސްޓް (ކޫޑުޑިއުވާރ) ފަދަ ގައުމުތަކަށް މި އިންގިލާބުގެ އޮއިވަރު ފެތުރުމަކީ ދުރުކަމެއް ކަމަށް ބެލެވެއެވެ.
އެފްރިކާގެ އިންގިލާބުތަކަށް ފަހު ސަރަހައްދީ ޖަމުއިއްޔާތަކުން ދަތިކުރުމުގެ ފިޔަވަޅު އަޅައެވެ. މާލީއާއި ބުރުކިނާފާސޯއާ ދެކޮޅަށް ފިޔަވަޅުތައް އަޅާފައި ވެެއެވެ. މީގެ ސަބަބުންމި ގައުމުތަކުގެ އިގްތިސާދަށް ބޮޑެތި އަސަރުތައް ކޮށް ޕްރައިވެޓް ސެކްޓަރ އެއްކޮށް ބަންގުރޫޓް ވެދާނެ ބިރުވެސް އެބައޮތެވެ. އެހެންވެ އިންގިލާބީ ލީޑަރުން އަވަސް އިންތިޚާބަކަށް ދިއުމަކީ ގާތް ކަމެކެވެ.
