އިންޑޮނޭޝިއާގެ ގާނޫނު ހަދާ މަޖިލީހުން ވަނީ ޖެނުއަރީ މަހުގެ 18 ވަނަ ދުވަހު އެގައުމުގެ ވެރިރަށް އެހެން ސަރަހައްދަކަށް ބަދަލުކުރުމަށް ބިލެއް ފާސްކޮށްފައެވެ. އިންޑޮނޭޝިއާގެ މިހާރުގެ ވެރިރަށް ޖަކާޓާއިން ބޯނިއޯ ޖަޒީރާގައި ބިނާކުރާ އާސިޓީ ނުސާންތަރާއަށް އިންޑޮނޭޝިއާގެ ވެރިރަށް ބަދަލުކުރާނެއެވެ.
ނުސަންތަރާ ސިޓީ ބިނާކުރަމުންދަނީ ޖާވާކަނޑު ހުރަސްކޮށް ޖަކާޓާގެ އިރުއުތުރުން 2000 ކިލޯމީޓަރު ދުރުގައި އޮންނަ އިރުމަތީ ކަލިމަންޓާންގެ ފަރުބަދަމަތީ ޕްރޮވިންސަކަށެވެ.
އައު ވެރިރަށް ބަދަލު ކުރުމުގެ މަޝްރޫއަކީ އިންޑޮނޭޝިއާގެ އެންމެ ބޮޑު މަޝްރޫއެވެ. މިކަމަށް 30 ބިލިއަން ޑޮލަރަށް ވުރެ ބޮޑު އަދަދެއް ހޭދަ ވާނެކަމަށް ލަފާކުރެވެއެވެ. އައު މަޝްރުއުގެ ސަބަބުން ތިމާވެއްޓަށް ބޮޑު އަސަރެއް ކޮށްފާނެ ކަމުގެ ކަންބޮޑުވުންތައް ވަނީ އިންތިހާއަށް ބޮޑުވެފަ އެވެ.
ޖަކާޓާއަށް ދިމާވެގެން މިއުޅެނީ ކޮން މައްސަލައެއް؟.
ޖަކާޓާގައި ގާތްގަނޑަކަށް 10 މިލިއަން މީހުން ދިރިއުޅެއެވެ. ޖަކާޓާއަކީ އިންޑޮނޭޝިއާއަށް މިނިވަންކަން ލިބުނު ފަހުން އެގައުމުގެ ވެރިރަށުގެ ގޮތުގައި އޮތް ރަށެކެވެ. ޖަކާޓާއަކީ ތޮއްޖެހުމާއި ތިމާވެށި ކިލަނބުވުންފަދަ އުމްރާނީ ގޮތުން ގިނަ މައްސަލަތަކެއް ކުރިމަތިވެފައިވާ ސިޓީއެކެވެ. ދުނިޔޭގެ އެންމެ ތޮއްޖެހިފައިވާ މަގުތައް ވެސް އޮންނަނީ ޖަކާޓާގައެވެ.
ދިރާސާތަކުން ދައްކާ ގޮތުގައި 2050 ވަނަ އަހަރު އަންނަންވާއިރަށް ޖަކާޓާ އަޑިއަށް ދާނެއެވެ. ޖަކާޓާގެ އަޑީގައި އަދި މެދުތެރޭގައި އޮތީ ޗަސް ބިމެކެވެ. ފެންބޮޑުވުމުގެ މައްސަލައަކީވެސް އެ ސިޓީއަށް ތަކުރާރުކޮށް ދިމާވާ މައްސަލައެކެވެ.
ވެރިރަށް ޖަކާޓާއިން އާ ސިޓީއަކަށް ބަދަލުކުރައްވާނެކަން އެންމެ ފުރަތަމަ އިޢްލާން ކުރެއްވީ 2019 ވަނަ އަހަރުގެ އޯގަސްޓްމަހު ރައީސް ޖޮކޯ ވިޑޯޑޯއެވެ.
2022 ވަނަ އަހަރު ފާސްކޮށްފައިވާ އައު ގާނޫނުގެ ދަށުން ފަސް މަރުހަލާއަކަށް ބަދަލުކުރުމުގެ ޕްލޭނެއް ސަރުކާރުން ވަނީ އެކުލަވާލާފައެވެ. އެންމެ ފަހުގެ މަރުހަލާ ނިމޭނީ 2045 ވަނަ އަހަރުގައެވެ.
ތިމާވެށީގެ މާހިރުން ކަންބޮޑުވަނީ ކީއްވެ؟.
ތިމާވެށީގެ ޖަމާއަތްތަކުން ވަނީ އައު ވެރިރަށުގެ މްޝްރޫއާ ދެކޮޅު ހަދާފައވެ. ކަލިމަންޓާނަކީ ބަޔޯޑައިވާސިޓީއަށް މަޝްހޫރު ސަރަހައްދެކެވެ. މިތާނގެ ރެއިންފޮރެސްޓްތަކަކީ އޮރެންގްޓާންއާއި ސަން ބެއާޒް އަދި ނޭފަތް ދިގު ރާމާ މަކުނުފަދަ ނާދިރު އެތައް ޖަނަވާރެއް އުޅޭ ސަރަހައްދެކެވެ.
ފާޑުކިޔާ ފަރާތްތަކުން ވަނީ މި ޕްރޮޖެކްތްގެ ސަބަބުން ޒަމާންވީ ބިޔަ ގަސްތައް ކެނޑުމާއި އެ ސަރަހައްދުގެ ބަޔޯޑައިވާސިޓީ އަށް ނުރައްކާވެދާނެ ކަމުގެ އިންޒާރު ދީފަ އެވެ.
އެހެން ޤައުމުތަކުން މި ފަހުން ވެރިރަށް ބަދަލުކޮށްފައި އެބަހުރިބާ؟
މޫސުމުގެ ނުރައްކަލުގެ ސަބބުންނާއި އަސްކަރީ ސަލާމަތީ ސަބަބުތަކުން ފެށިގެން ބިޔަ މަޝްރޫއުތައް ހިންގުމުގެ މަގްސަދުގައި އަދި ސިޔާސީ ބޭނުމަށްވެސް ގައުމުތަކުން ވެރިރަށް ބަދަލުކޯށްފައި ވެއެވެ.
1997 ވަނަ އަހަރު ކަޒަކިސްތާނުން ވަނީ އެޤައުމުގެ ވެރިރަށް އަލްމާޓީއިން ނޫރުސުލްތާނަށް ބަދަލުކޮށްފައެވެ.
މިޔަންމާއިން 2005 ވަނަ އަހަރު ވަނީ ޔަންގޫން އިން އެގައުމުގެ ވެރިރަށް ނައިޕިޑޯއަށް ބަދަލުކޮށްފަ އެވެ.
މިސްރުން ވަނީ ވެރިރަށް ޤާހިރާ ނިއު ކެއިރޯއަށް ބަދަލު ކުރަން ފަށާފައެވެ.
