ކުރީގެ އެޓާނީ ޖެނެރަލް އަދި ރައީސް އޮފީހުގެ މިނިސްޓަރު އައިޝަތު އާޒިމާ ޝުކޫރުގެ މައްޗަށް ކުރާ ދެ ދައުވާގެ އަޑުއެހުން ކެންސަންކޮށްފިއެވެ.
އާޒިމާގެ މައްޗަށް ދައުލަތުން އުފުލާފައިވަނީ ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އާއި މަނީ ލޯންޑަރިންއަށް މަގުފަހިކޮށް ދިނުމުގެ ދައުވާ އެވެ. އާޒިމާގެ މައްޗަށް ދައުލަތުން ދައުވާ އުފުލައިފައި ވަނީ 2019 ވަނަ އަހަރުގެ ފެބްރުއަރީ 17 ވަނަ ދުވަހު އެވެ.
ކްރިމިނަލް ކޯޓުން މި މައްސަލައިގެ އަޑުއެހުމެއް ތާވަލުނުކުރާތާ އަހަރެއް ފަހުން މިއަދުގެ 11:00 އަށް އަޑުއެހުމެއް ތާވަލުކުރި އެވެ. އެކަމަކު ކޯޓުން ބުނެފައި ވަނީ އަޑުއެހުން ކެންސަލްވެފައިވާ ކަމަށެވެ. ކެންސަލްކުރި ސަބަބެއް ނުބުނެ އެވެ.
މި މައްސަލައިގެ އަޑުއެހުމެއް އެންމެ ފަހުން ބާއްވާފައިވަނީ 2020 ވަނަ އަހަރުގެ އޮކްޓޯބަރު މަހުގެ 20 ވަނަ ދުވަހުއެވެ. އެދުވަހު ވަނީ މި މައްސަލައިގެ އިބްތިދާއީ އަޑުއެހުންތައް ނިންމާލައިފައެވެ.
މި މައްސަލަ ކުރިމިނަލް ކޯޓުގައި އެންމެ ފުރަތަމަ ބެއްލެވީ ގާޒީ އަހުމަދު ހައިލަމެވެ. ނަމަވެސް ހައިލަމް މަގާމުން ވަކިކުރުމުން އެ މައްސަލައާ ފަހުން ހަވާލުވެވަޑައިގެންނެވީ ގާޒީ ހަސަން ސައީދެވެ.
