2018 ވަނަ އަހަރުގެ ރިޔާސީ އިންތިޚާބާ ގުޅިގެން ވަކިވަކި ފަރާތްތަކުން ހިންގާފައިވާ ޖިނާޢީ ކުށްތައް ފާހަގަކޮށް އެކުށްތައް ތަޙްޤީގު ކުރުމުގެ އަމުރެއް ނެރެ ދެއްވުމަށް ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުން ޕްރޮސެކިއުޓަރ ޖެނެރަލްގެ އަރިހުން އެދިފައިވާނެ ކަމަށް ޕީޕީއެމުން ބުނެފިއެވެ،
އެޕާޓީން އެކަމަށް އެދުނީ "ވަކިވަކި ފަރުދުން ހިންގާފައިވާ އެ މައްސަލަތަކަކީ ޖިނާޢީ މައްސަލަތަކަށް ވާތީވެ އެ މައްސަލަތައް ތަޙްޤީޤު ކުރުމުގެ ބާރު ޤާނޫނުން ލިބިދެނީ ދިވެހި ފުލުހުންގެ ޚިދުމަތަށް ކަމަށް ވެފައި އެފަރާތުން އެކަންކަން ތަޙްޤީޤު ކުރުމުގައި ލަސްތަކެއް ހުރުމުން ނުވަތަ އެފަރާތަށް ހުށަހަޅާފައިވާ މައްސަލަތައް ބަލަމުން ދާކަމުގެ އެއްވެސް މައުލޫމާތެއް ލިބިފައި ނުވާތީ،" ކަމަށް އެޕާޓީން ބުނެފައިވެއެވެ.
ޕީޕީއެމް ގެ ފަރާތުން ވަނީ ރިޔާސީ އިންތިޚާބާގުޅޭ 25 ކަމެއް ފާހަގަކޮށް އެމައްސަލަތައް ތަޙްޤީޤު ކޮށްދެއްވުން އެދި ދިވެހި ފުލުހުންގެ ޚިދުމަތުގައި މީގެ ހަފްތާއެއްގެ ކުރިން އެދިފައެވެ. ނަމަވެސް މިއަދާ ހަމައަށް އައިއިރުވެސް އެ މައްސަލަތައް ބެލުމުގައި އެއްވެސް ކަމެއް ދިވެހި ފުލުހުންގެ ޚިދުމަތުން ކޮށްފައިވާކަން ނޭނގޭ ކަމަށް ޕީޕީއެމުން ބުނެފައިވެއެވެ. އެހެންކަމުން ދިވެހިރާއްޖޭގެ ޤާނޫނު އަސާސީ ގެ 223 ވަނަ މާއްދާގައި، ޕްރޮސެކިއުޓަ ޖެނެރަލްގެ މަސްއޫލިއްޔަތު ތަކާއި ބާރު ތަކުގެ ތެރޭގައި، އެމާއްދާގެ (ޅ) ގައި '' ޖިނާޢީ ކުށެއްކަމަށް ތުހުމަތުކުރެވޭ އެއްވެސް ޢަމަލެއް އެއްވެސް ފަރާތަކުން ހިންގައިފި ކަމުގެ ޝަކުވާއެއް ހުށަހަޅައިފިނަމަ ނުވަތަ މިނޫންގޮތަކުންވެސް މިފަދަ ކަމެއްގެ މައުލޫމާތު ލިބިއްޖެ ހިނދެއްގައި، އެކަމެއް ތަޙްޤީޤުކުރުމުގެ އަމުރު ނެރުން ރަނގަޅުކަމަށް އޭނާއަށް ފެންނަ ކަންކަމުގައި އެ އަމުރު ނެރުން'' ހިމެނިފައިވާތީ 2018 ވަނަ އަހަރުގެ ރިޔާސީ އިންތިޚާބާ ގުޅިގެން އެޕާޓީން ފުލުހަށް ހުށައަޅައިފައިވާ މައްސަލަތަކުގެ ތަޙްޤީޤު ކުރިއަށް ނުދާތީ އެ މައްސަލަތައް ތަޙްޤީޤު ކުރުމުގެ އަމުރެއް ނެރެދެއްވަން އެދުނީ ކަމަށް ޕީޕީއެމުން ބުނެފައިވެއެވެ.
