ދިވެހި ފުލުހުންގެ ތަހުގީގުތައް މިހާރަށްވުރެ ޒަމާނީވާން އެބަޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މަޖިލީހަށް އިއްވެވި ރިޔާސީ ބަޔާނުގައެވެ. ރައީސް ވިދާޅުވީ ފުލުހުންގެ ޚިދުމަތް ފުޅާކުރުމަށް ބޭނުންވާ އިތުރު ފުލުހުންނާއި، ތަމްރީނާއި ވަސީލަތް، ސަރުކާރުން ފޯރުކޮށްދެއްވާނޭ ކަމަށެވެ. އެކަން އެގޮތަށް ކުރައްވަން ނިންމެވީ ދިވެހި ފުލުހުންގެ ޚިދުމަތަށް ރައްޔިތުންގެ އިތުބާރާއި ޔަޤީންކަން އިތުރުކޮށްދެއްވުމަށް ކަމަށް ރައީސް ވިދާޅުވިއެވެ.
"ރައްޔިތުންގެ އަރާމު ނިދީގެ ޙައްޤުގައި ހޭލާ ތިބެނީ ދިވެހި ފުލުހުން. މުދަލާއި ހަށިފުރާނައިގެ ރައްކާތެރިކަމުގައި އަބަދުވެސް ރައްޔިތުންނާ އެންމެ ގާތުގައި ތިއްބަވާ ދިވެހި ޤައުމީ ފައުޖަކީ ދިވެހި ފުލުހުން،" އެމަނިކުފާނު ވިދާޅުވިއެވެ.
މިހާރުވެސް ބައެއް ރަށްރަށުގައި ފުލުހުންގެ އަދަދު މަދުކަމުން އެކަމުގެ ޝަކުވާ އެފަދަ ރަށްރަށުން ގެންދަވަނީ ކުރަމުންނެވެ. އެހެންކަމުން ފުލުހުން އިތުރު ކޮށްދެއްވާނޭ ކަމަށް ރައީސް ވިދޅުވުމުން އެފަދަ ރަށްރަށުގެ މީހުންނަށް ވަނީ އުންމީދެއް ލިބިފައެވެ.
