ޖައްވީ ހަތިޔާރާއި ސައިބަރ ސްޕޭސް ހަތިޔާރާއި ނިއުކްލިއަރ ޓެކްނޮލޮޖީއާ އެއްކޮށްގެން ހިންގާ އޮޕަރޭޝަންތަކާ ދިމާއަށް ޗައިނާއިން ވަނީ މިސްރާބު ޖަހާފައެވެ.
ޗައިނާގެ ސްޓްރެޓެޖީއަކީ އަމަލީ ގޮތުން ހަރަކާތްތެރި ދިފާއެއް ބިނާ ކުރުމުގެ ސްޓްރެޓެޖީއެކެވެ. މި ސްޓްރެޓެޖީގައި ނުރައްކަލާ ކުރިމަތި ލުމަށް އިސްވެ ހަމަލަ ދިނުން ހިމެނޭކަމަށް އާ ބައިނަލްއަގުވާމީ ދިރާސާއެއްގައި ބުނެފި އެވެ.
ސްޓޮކްހޯމް އިންޓަނޭޝަނަލް ޕީސް ރިސާޗް އިންސްޓިޓިއުޓް (އެސްއައިޕީއާރްއައި) އިން ނެރުނު ރިޕޯޓެއްގައި ވާގޮތުން މި ސްޓްރެޓެޖީގެ ސަބަބުން ސަރަހައްދީ ސަލާމަތަށް ނުރައްކާ ވެގެން ދާނެއެވެ.
"ޗައިނާގެ ވިސްނުމާއި ޓެކްނޮލޮޖީއަށް އަންނަ ބަދަލުތަކުން ދައްކުވައިދެނީ އެގައުމުގެ ދިފާއީ ވިސްނުން ކުރިއަށް ވުރެ ބޮޑަށް ކުރިއަރައިގެން ގޮސްފައިވާ ކަމަށެވެ.
މިދިޔަ މަހުގެ ފަހުކޮޅު ޝާއިއުކޮށްފައިވާ މި ރިޕޯޓުގައި ބުނެފައި ވަނީ ޗައިނާއިން ވަނީ އިންޓަކޮންޓިނެންޓަލް ބެލިސްޓިކް މިސައިލް ލޯންޗް ކުރާ އިތުރު ޕްލެޓްފޯމްތަކާއި އެންޓި ސެޓެލައިޓް ހަތިޔާރުން ފެށިގެން ގޮސް އަސްކަރީ ގޮތުން ގިނަ ކަންކަމަށް ގާބިލުވެފައިވާކަން ދައްކާފައެވެ.
ޗައިނާގެ ދިފާއީ ބާރު ހަލުއި މިނެއްގައި ކުރިއަރައިގެން ދިޔައީ ރައީސް ޝީ ޖިންޕިންގެ އިސްނެންގެވުމާއި، ޗައިނާގެ އިގުތިސާދީ ތަރައްގީއާއި އެމެރިކާއިން އަސްކަރީ އަދި ސިޔާސީ ފިއްތުންތައް ބޮޑުކުރުމުން ކަމަށް ޗައިނާގެ ދިފާއީ ފަރާތްތަކުން ބުނެއެވެ.
މީގެ ސަބަބުން ޗައިނާއިން ފަޒާގެ ހަތިޔާރާއި ސައިބަރ ސްޕޭސް އަދި ނިއުކްލިއަރ ސްޓްރެޓެޖީތައް ބޭނުންކުރުން އިތުރުވުމަކީ އެކަށީގެންވާ ކަމެއް ކަމަށާއި، މިކަމުގެ ސަބަބުން ދުނިޔޭގެ ސަލާމަތަށް ބުރޫއަރާނެ ކަމަށް އެމެރިކާއާއި ރަޝިޔާފަދަ ގައުމުތަކުންވެސް ބުނެއެވެ.
ސިޕީއާރްއައިގެ ރިޕޯޓުގައި ބުނެފައިވަނީ ޗައިނާއިން ފަހަކަށް އައިސް ކުރާތަން ފެންނަ އަސްކަރީ ޓެސްޓުތަކާއި ސިފައިން ނެ ބައިތިއްބާ ތަންތަން ގިނަވުމުގެ ސަބަބުން ޗައިނާގެ އަސްކަރީ މިސްރާބު މިހާރަށްވުރެ ރަނގަޅަށް ދިރާސާކުރުމަށް ފުރުސަތު ލިބިގެން ދެއެވެ.
އެމެރިކާއިން ވަނީ ޗައިނާއާއި ރަޝިޔާއާއެކު ތިން ފަރާތުން ހަތިޔާރު ކޮންޓްރޯލް ކުރުމުގެ މަޝްވަރާތަކުގައި ބައިވެރިވުމަށް ގޮވާލާފައެވެ.
އެމެރިކާގެ ދިފާއީ ވުޒާރާއިން ލަފާކުރާ ގޮތުގައި 2030 ވަނަ އަހަރު އަންނަންވާއިރަށް ޗައިނާ ސިފައިންގެ ރޮކެޓް ފޯސްގައި 1000 ނިއުކްލިއާ ވޯހެޑް ހުރެދާނެ އެވެ. ނަމަވެސް ބެއިޖިން އިން ބުނަނީ 350 ނިއުކްލިއާ ވޯހެޑް ހުރި ކަމަށެވެ.
މިއާ ޚިލާފަށް އެމެރިކާގައި 5،550 އަދި ރަޝިއާގައި 6،255 ނިއުކްލިއާ ވޯހެޑް ހުރި ކަމަށް ޗައިނާއިން ލަފާ ކުރެއެވެ.
ދުނިޔޭގައި މިދިޔަ އަހަރު 13،000 އަށް ވުރެ ގިނަ އެކްޓިވް ނިއުކްލިއާ ހަތިޔާރު ހުރި ކަމަށް އަންދާޒާ ކުރެވޭއިރު އޭގެ ތެރެއިން 90 ޕަސެންޓަކީ އެމެރިކާ އާއި ރަޝިއާއިން އޮޕަރޭޓް ކުރާ ނިއުކްލިއާ ހަތިޔާރުކަމަށް ތަފާސްހިސާބުތަކުން ދައްކައެވެ.
ޗައިނާއިން ބުނާ ގޮތުގައި ޗައިނާގެ ހަތިޔާރަކީ ދިފާއީ އެއްޗެކެވެ، ހަމަލައެއް ދީފިނަމަ، ދެވަނަ ފަހަރަށް ހަމަލައެއް އަމާޒު ނުކުރެވޭވަރަށް އެފަރާތެއް އިނދެޖައްސާލުމަކީ ޗައިނާގެ ދިފާއީ ވިސްނުން ކަމުގައި ބުނެއެވެ.
