މޮރޮކޯގެ އުތުރުގެ ޝަފްޝާއޫންގެ ތަމްރޫތު ވިލެޖްގައި، ވަޅެއްގެ އަޑީގައި ތާށިވެފައި ފަސް ދުވަސް ހޭދަކުރި ފަސް ރަބީޢުގެ ރައްޔާންގެ ޖަނާޒާ އިއްޔެ ބާއްވައިފިއެވެ. ރައްޔާންގެ މައިބަފައިންނަށް ދުނިޔޭގެ ވެރިންނާއި ފަންނުކާރުންނާއި ކުޅިވަރުގެ ތަރިން ވަނީ ތަޢުޒިޔާ ކިޔާފައެވެ.
ރައްޔާންގެ މައިންބަފައިންނަށް ހެޔޮއެދޭ ފަރާތްތަކުން ދަނީ އެހީތެރިކަން ފޯރުވައި ދެމުންނެވެ. މޮރޮކޯގެ ކުރީގެ ބައިނަލްއަގްވާމީ ކުޅުންތެރިޔާ ޢަބްދުއްރައްޒާގް ޙަމްދަﷲ ވަނީ އާއިލާއަށް ފުރިހަމައަށް ތައްޔާރުކުރެވިފައިވާ ގެއެއް ބިނާ ކޮށްދިނުމަށް ވައުދުވެފައެވެ. މޮރޮކޯގެ ކުރެހުންތެރިޔާ ދުނިއާ ބަތުމާ ވަނީ ރައްޔާންގެ މައިންބަފައިންނަށް ބޮޑު އަދަދެއްގެ ފައިސާ ހަމަޖައްސައިދޭނެ ކަމަށް އިޢްލާން ކޮށްފައެވެ. މޮރޮކޯގެ ވެބްސައިޓެއްކަމަށްވާ ހިބާ ޕްރެސް އިން ވަނީ، ތުއްތު ރަޔާން ސަލާމަތް ކުރަން މަސައްކަތް ކުރި ދުވަސްތަކުގައި، އެ ކުންފުނީގެ ޔޫޓިއުބް ޗެނަލަށް ލިބުނު ފައިސާ ވަޅު ކޮނުމުގެ އޮޕަރޭޝަންގައި އުޅުނު މީހުންނައި މެޝިނަރީ އޮޕަރޭޓް ކުރި މީހުންނަށް ހަދިޔާކުރަން ނިންމާފައެވެ.
ޤަތަރުގައި ބައެއް ހަރޮށިބިނާތައް އަލިކޮށް، ރައްޔާންގެ ފޮޓޯތައް އެބިލްޑިންގތަކަށް ރޭ އަޅުވާފައި ހުއްޓެވެ. އަދި ޤަތަރުގެ ރެސްޓޯރެންޓަކުން ވަނީ ދެ ދުވަހުގެ އާމްދަނީ ރައްޔާންގެ ނަމުގައި ސޮދަޤާތް ކުރަން ނިންމާފައެވެ.
ބޭރު ގައުމުތަކުގެ އެމްބަސީތަކުންވެސް ވަނީ މޮރޮކޯގެ ރައްޔިތުންނަށް ތަޢުޒިޔާ ކިޔާފައެ
މިސްރުގެ އަލްއަޒުހަރުގެ އިމާމުލްއަކްބަރާއި މިސްރުގެ މުފްތީއާއި ކެތޮލިކް އިސްފާދިރީ ޕޯޕް ފްރޭންސިސްވެސް ވަނީ މަޣުރިބު މީހުންގެ އެކަކުއަނެކެއްގެ މައްޗަށް އޮތް ހަމްދަރްދީއަށް ތަޢުރީފުކުރައްވަމުން ތައުޒިޔާ ވިދާޅުވެފައެވެ.
ތުއްތު ރަޔާންގެ ހިތްދަތި ވަކިވުމުން، ދުނިޔޭގެ ރަށްފުށުގެ ހިސާބުތަކުގައި ދިރިއުޅޭ ކުޑަކުދިންނަށް ކުރިމަތިވެދާނެ ނުރައްކާތަކާމެދު ހޭލުންތެރިކަން ވަނީ އިތުރު ވެގެން ގޮސްފައެވެ. ބޮޑެތި މީހުން ފަރުވާތެރިވާން ޖެހޭ މިންވަރަށް ފަރުވާތެރި ނުވުމުން، އެކަމުގެ ޝިކާރައަކަށް، ހިތްދަތި ގޮތަކަށް ކުޑަކުދިން ވެގެން ހިނގައިދާނެކަން މިހާދިސާއިން އެނގިގެން ގޮސްފައިވާ ކަމަށް ދުނިޔޭގެ މީސްމީޑިއާގައި އެތައް ހާސްބަޔަކު ދަނީ އަޑު އުފުލައި ވާހަކަ ދައްކަމުންނެވެ.
