ޕާކިސްތާނުގެ ގައުމީ އެއާލައިން ޕީއައިއޭ، ޔޫރަޕްގެ މަންޒިލްތަކަށް އަވަހަށް ދަތުރުތައް ފަށާނެކަމަށް ބެލެވިފައި އޮތްވާ އަނެއްކާވެސް ލަސްތަކެއް ދިމާވެއްޖެއެވެ. ބެލެވޭ ގޮތުގައި ޔޫރަޕާއި ޔޫކޭއަށް ޕީއައިއޭގެ ދަތުރުތައް ދެން އޮންނާނީ މި އަހަރުގެ ހޫނު މޫސުމުގެ ފަހުންނެވެ.
ޔޫރަޕިއަން ޔޫނިއަން އޭވިއޭޝަން ސޭފްޓީ އޭޖެންސީ (އީސާ) އިން ވަނީ ޕާކިސްތާން އިންޓަނޭޝަނަލް އެއާލައިންސް (ޕީއައިއޭ) އަށް އީޔޫ އިއްތިހާދުގެ އެއާޕޯޓްތަކަށް ވަނުން މަނާ ކޮށްފައެވެ. ޔޫކޭއިންވެސް ވަނީ މިފިޔަވަޅު އަޅާފައެވެ. އީސާއިން ބުނެފައިވާ ގޮތުގައި ޕީއައިއޭއަށް ހުއްދަ ދިނުމުގެ ކުރިން އެ އިދާރާއިން އަމިއްލައަށް އޮޑިޓެއް ކުރަން ބޭނުންވާ ކަމަށެވެ.
ޕީއައިއޭ އަށް އީޔޫއާއި އިނގިރޭސިވިލާތަށް ދަތުރުކުރުން މަނާކުރީ ޕާކިސްތާނުގެ ގިނަ ޕައިލެޓުންތަކެއްގެ ސެޓިފިކެޓަކީ ވަގު ސެޓިފިކެޓްތަކެއް ކަމަށް ޕާކިސްތާންގެ ސިވިލްއެވިއޭޝަން އިދާރާއިން ޝައްކު ކުރުމުންނެވެ. އަދި މި އިދާރާގެ ތުހުމަތު ތެދުކަމަށްވެސް ފަހުން ހޯދި ހޯދުންތަކުން ދެއްކިއެވެ.
އދ. ގެ އޭވިއޭޝަން އޭޖެންސީ އައިކާއޯއިން ވެސް ޕާކިސްތާނާ މެދު ފިޔަވަޅު އެޅިއެވެ. ނަމަވެސް އައިކާއޯއިން ވަނީ ދާދިފަހުން އެ ފިޔަވަޅުތައް އަނބުރާ ގެންގޮސްފައެވެ.
ޕީއައިއޭއަށް ފުރިހަމަ މިނިވަންކަމާ އެކު ޔޫރަޕަށް ދަތުރުކުރެވޭނެ ގޮތް ހަދަން މަދުވެގެން ހޫނު މޫސުމާ ހަމައަށް މަޑުކުރަން ޖެހޭނެއެވެ. ސަބަބަކީ އީސާއަކީ ޕްރޮސީޖާތަކާއި ރޫލްސް އޮފް އެންގޭޖްމަންޓް އަދި ކޮމްޕްލަޔަންސްގައި ވަރަށް ހަރުކަށި އުސޫލުތަކެއް ގެންގުޅޭ އިދާރާއަކަށް ވާތީއެވެ. ޕާކިސްތާނުގެ ކަމާ ބެހޭ ފަރާތްތަކުން ބުނާ ގޮތުން މިކަން ޕާކިސްތާނަށް ފަސޭހަކަމަކަށް ނުވާނެއެވެ.
