ހުންއައުމާއި، ހަށިގަނޑުގައި ރިއްސުން ފަދަ ކަންކަމަށް އާންމު ގޮތެއްގައި ބޭނުންކުރާ ޕަނަޑޯލް، ކެލްޕޯލް، ޑިސްޕްރޯލް އަދި ފެބްރޯލް ފަދަ ބޭސްތަކުގެ ދަތިކަން ޕާކިސްތާނުގައި ދަނީ ކުރިމަތިވަމުންނެވެ.
ކެމިސްޓުންނާއި މެނުފެކްޗަރާސް އެސޯސިއޭޝަނުން ބުނާ ގޮތުގައި މި ބޭސްތަކުގެ ސަޕްލައިއަށް އަސަރުކޮށްފައި ވަނީ މި ބޭސްތައް އުފެއްދުމަށް ބޭނުންވާ ރޯ ލޮނު އެތެރެކުރުމަށް މި އަހަރުގެ ޖެނުއަރީ މަހު ސަރުކާރުން 17 ޕަސަންޓަށް ޖީއެސްޓީ ނަގަން ނިންމުމާ ގުޅިގެންނެވެ.
ފިނޭންސް މިނިސްޓްރީން ބޭސް އުފައްދާ ކުންފުނިތަކަށް ޓެކްސް ރިފަންޑް ދޭނެ ކަމުގެ ޔަގީންކަން ދީފައިވީ ނަމަވެސް، އެ ކުންފުނިތަކުން ދެކެނީ މިއީ މިނިސްޓްރީގެ ހޮޅި ވައުދެއް ކަމަށެވެ.
މި ބޭސްތަކަކީ ހުން އައުމާއި، އަރިދަފުސް ރޯގާ އަދި ކަރުގައި ރިއްސުން ފަދަ އަލާމާތްތައް ހުންނަ ކޮވިޑް-19 ގެ ޕޭޝަންޓުންނަށް ފަރުވާ ދިނުމަށް ވެސް ބޭނުން ކުރާ ބޭސްތަކެކެވެ. ޕާކިސްތާނުން މި ވަގުތު ދަނީ ކޮވިޑްގެ 5 ވަނަ ރާޅެއް ތަހައްމަލު ކުރަމުންނެވެ.
