ސްރީލަންކާގެ ރައްޔިތުންނަށް އެއްގޮތް ޑިޖިޓަލް އައިޑެންޓިޓީ ކާޑްތައް ހެދުމަށްޓަކައި އިންޑިއާއިން ސްރީލަންކާއަށް މާލީ އެހީ ދިނުމަށް އެއްބަސްވެއްޖެއެވެ.
ސްރީލަންކާގެ ކެބިނެޓުން ވަނީ "ޔުނިޓަރީ ޑިޖިޓަލް އައިޑެންޓިޓީ ފްރޭމްވޯކް" ކުރިއަށް ގެންދިއުމަށް ނިންމައި ގައުމީ ފެންވަރުގެ ޕްރޮގްރާމެއްގެ ގޮތުގައި މި ފްރޭމްވޯކް ތަންފީޒު ކުރުމަށް ސަރުކާރުން އިސްކަން ދޭނެ ކަމަށް ބުނެފައެވެ.
ސްރީލަންކާގެ ޔުނިޓަރީ ޑިޖިޓަލް އައިޑެންޓިޓީ ފްރޭމްވޯކް ބިނާ ކޮށްފައި ވަނީ ބަޔޯމެޓްރިކް ޑޭޓާގެ މައްޗަށެވެ. މި ފްރޭމްވަރކް މޮޑެލް ކުރަނީ އިންޑިއާގެ އަދާރް ކާޑާއެއްގޮތަށެވެ. މިކަމުގެ ފަންނީ އެހީތެރިކަން ހޯދުމަށްވެސް ސްރީލަންކާއިން ވަނީ އިންޑިއާގައި އެދިފައެވެ.
އިންޑިއާއިން އާންމު ސަރުކާރު ބޭނުމަށް ތައްޔާރުކުރާ އައިޓީ ވިއުގަތަކަކީ އޯޕަން ސޯސް ވިއުގަތަކެކެވެ. އަދި މި ކޯޑްތައް ހުންނަނީ އެއްވެސް ގައުމަކުން އެދެފިނަމަ، ފަސޭހައިން އެ ގައުމެއްގެ ވިއުގައިގައި ބޭނުން ކުރެވޭ ގޮތަށް ތައްޔާރުކޮށްފައި ކަމަށް އިންޑިއާއިން ބުނެއެވެ.
2019 ވަނަ އަހަރުގެ ޑިސެމްބަރު މަހު ރައީސް ގޯޓާބަޔަ ރާޖަޕަކްސައާއި އިންޑިއާގެ ބޮޑުވަޒީރު ނަރެންދުރަ މޯދީއާ ދެމެދު ބޭއްވުނު ބައިލެޓްރަލް މަޝްވަރާތަކަށްފަހު ސްރީލަންކާގެ އައިޑެންޓިޓީ ކާޑު ހެދުމުގެ މަޝްރޫއަށް އިންޑިއާއިން އެހީވުމަށް ވަނީ ހުށަހަޅާފައެވެ.
މި އަހަރުގެ ކުރީކޮޅުން ފެށިގެން އިންޑިއާއިން ވަނީ ސްރީލަންކާއަށް 1.4 ބިލިއަން ޑޮލަރުގެ އިގްތިސޯދީ އެހީ ފޯރުކޮށްދީފައެވެ. ސްރީލަންކާއަށް ބޭނުންވާ ކާބޯތަކެއްޗާއި ބޭސް އަދި ތެލުގެ ދަތިކަން ކުރިމަތިވެފައިވާ މި ދަނޑިވަޅުގައި އެބާވަތްތައް އެތެރެކުރުމަށް އިންޑިއާއިން ވަނީ އެހީތެރިކަން ފޯރުކޮށްދީފައެވެ.
