އެމެރިކާގެ ނިއު ޖާޒީއިން އެޓްލާންޓިކް ހުރަސްކޮށް ދަތުރުކުރި ފްލައިޓެއްގެ ތެރޭގައި އަންހެނަކު ރޭޕްކުރި ކަމަށް ތުހުމަތު ކުރެވޭ ފަސިންޖަރަކު ލަންޑަންގެ ހީތްރޯ އެއާޕޯޓުން، ހައްޔަރުކޮށްފިއެވެ.
އެ އަންހެން މީހާ ބޯޓުގެ ކްރޫއަށް މައްސަލަ ހުށަހެޅީ، ރޭނގަނޑުގެ ވަގުތެއްގައި ގަދަކަމުން އޭނާއާއެކު ފިރިހެނަކު ބޯޓުގައި ޖިންސީ ގުޅުން ހިންގި ކަމަށެވެ. ދެ ފަސިންޖަރުންވެސް ދަތުރުކުރީ ބިޒްނަސް ކްލާހުގައެވެ. އެހެން ފަސިންޖަރުން ތިބީ ނިދާފައެވެ. ކުރޫންގެ އެންގުމަށް ފުލުހުން ވަނީ ހީތްރޯ އެއާޕޯޓަށް މީހުން ފޭބުމުގެ ކުރިން ބޯޓަށް އަރައި ފިރިހެން މީހާ ހައްޔަރުކޮށްފައެވެ.
ޔުނައިޓެޑް އެއާލައިންސްގެ މި ފްލައިޓް ހީތުރޯއަށް ޖައްސާފައި ވަނީ ޖީއެމްޓީ ގަޑިން ހެނދުނު 6:39 ގައެވެ.
ފުލުހުން މިއަދު ނެރުނު ބަޔާނެއްގައި ބުނީ އެ މައްސަލައިގެ ތަހުގީގުތައް ކުރިއަށް ދާއިރު، ކަފާލާތުގެ ދަށުން އެ މީހާ ދޫކޮށްލާފައިވާ ކަމަށެވެ.
