ޕާކިސްތާންގެ ލަރްނާކާގެ މަރުކަޒީ ޖަލުގައި ގައިދީން ޖަލު އޮފިސަރުން ހިފަހައްޓައިގެން ހަޅުތާލު ކުރަމުންދާތާ މިހާރު ހަފްތާއަކަށް ވުރެން ގިނަ ދުވަސް ވެއްޖެއެވެ.
ކުރީ ހަފްތާގެ ބުރާސްފަތި ދުވަހު ރަހީނުކުރި ހަތް ފުލުހުންގެ ތެރެއިން ފަސް ފުލުހަކު ވަނީ މިނިވަން ކޮށްފައެވެ. ފުލުހުން ބުނާ ގޮތުގައި ޖަލުގައި ހަމަނުޖެހުން އުފެދިގެން އުޅެނީ ޖަލުގެ އިސްމަސްއޫލުވެރިންގެ ކޮރަޕްޓް އަމަލުތަކާ ހެއްޖެވެ.
ޖުލައި 7، 2021 ގައި ސިންދު ހޯމް ޑިޕާޓްމަންޓުން މަރުކަޒީ ޖަލުގެ ސުޕްރިންޓެންޑެންޓް ލިއާއަތު ޕިރްޒާދާ ސަސްޕެންޑް ކުރުމުން ހަމަނުޖެހުން އުފެދުނީއެވެ. ޕީރްޒާދާގެ ވެރިކަމުގައި ގައިދީން ތިބީ އުފަލުގައެވެ.
ޕީރްޒާދާގެ ބެލުމުގެ ދަށުން ލަރްކާނާ ޖަލުގެ ގައިދީންނަށް މޯބައިލް ފޯނާއި، މަސްތުވާ ތަކެއްޗާއި، ބަނގުރަލާއި، ހަތިޔާރު ފަދަ މަނާ ތަކެތި މިނިވަންކަމާއެކު ބޭނުން ކުރުމަށް ހުއްދަ ދީފައި އޮތެވެ.
މި ޖަލުގައި މަނާތަކެއްޗަކީ މުދަލާއި ޚިދުމަތް ހޯދުމަށް އެއްބަޔަކު އަނެއް ބަޔަކަށް މުއާމަލާތު ކުރާ ވަސީލަތެވެ. ލަރްކާނާ ސެންޓްރަލް ޖަލަކީ މިކަންކަމުގައި އާދަޔާ ޚިލާފް ޖަލެކެވެ.
ލަރްނާކާ ޖަލުގެ އާބާދީއަކީ 1033 މީހުންނެވެ. މި ޖަލުގެ ކެޕާސިޓީއަކީ 650އެވެ.
މިމީހުންގެ ތެރޭގައި ހިމެނެނީ މަރުގެ ހުކުމް ތަންފީޒު ކުރަމުންދާ 111 މީހަކާއި އުމުރު ދުވަހުގެ ޖަލު ހުކުމެއް ތަންފީޒު ކުރަމުންދާ 344 މީހަކާއި 94 ކުށްވެރިއަކާއި ޝަރީއަތް ނިމެންދެން ވާނުވާގައި ބަންދުކޮށްފައި ތިބި 482 ގައިދީއަކާއި ދެ ބިދޭސީއެކެވެ.
ލަރްކާނާ މަރުކަޒީ ޖަލުގައި ތިބި ގައިދީންގެ އަތުގައި މަދުވެގެން 1500 މޯބައިލް ފޯނު އޮންނާނެ ކަމަށް ލަފާ ކުރެވެއެވެ. ބޭރުގައި ތިބޭ މީހުންނާއި އެމީހުންގެ ރަހުމަތްތެރިންނާ ގަވާއިދުން މުއާމަލާތް ކުރަމުން ދެއެވެ.
ޝަރީއަތުގެ އަޑުއެހުމަކަށް ހާޒިރުވާން އަންގައިފިނަމަ، އެމީހުން އުޒުރުވެރިވެއެވެ. ޖަލު އޮފިޝަލުންނަށް ރިޝްވަތު ދީ ނުވަތަ މަޖުބޫރުކޮށްގެން މަސްތުވާތަކެތީގެ ވިޔަފާރި ކުރުމަކީ މި ޖަލުގައި އާދައިގެ ކަމެކެވެ.
މިދިޔަ މަހު ޖަލުތަކާ ބެހޭ އިދާރާތަކުން ވަނީ 25 ގައިދީ އަކާ ދެކޮޅަށް ގަވާއިދާ ޚިލާފަށް އުޅެގެން މައްސަލަ ރަޖިސްޓްރީކޮށްފަ އެވެ. އަދި ގައިދީންނަށް މަސްތުވާތަކެއްޗާއެކު ސަޕްލައި ކޮށްދިނުމުގެ ތުހުމަތުގައި އެތައް ފުލުހުންނެއް ސަސްޕެންޑް ކޮށްފައި ވެއެވެ.
