ރަޝިޔާއިން ޔޫކްރެއިންއަށް ކޮންމެ ހިނދެއްގައިވެސް އަރައިގަނެފާނެ ކަމުގެ އިންޒާރު އެމެރިކާއިން ދަނީ ދެމުންނެވެ. ޔޫކްރެއިންގައި ތިބި އެމެރިކާގެ ރައްޔިތުން ވަގުތުން ފޭބުމަށް ވެސް އެމެރިކާއިން ވަނީ ގޮވާލާފައެވެ.
ވައިޓްހައުސްއިން ހުކުރު ދުވަހު ބުނީ ރަޝިޔާއިން ވައިގެ މަގުން ބޮމުގެ ހަމަލާއެއް ދީފިނަމަ، ދަތުރުފަތުރު ކުރަން އުނދަގޫވާނެ ކަމަށެވެ.
ރަޝިޔާއިން ޔޫކްރޭންގެ ބޯޑަރު ކައިރީގައި ލައްކައަކަށްވުރެ ގިނަ ސިފައިން ޖަމާކުރި ނަމަވެސް މޮސްކޯއިން ވަނީ ޔޫކްރެއިންއަށް އަރައިގެންފާނެ ކަމަށް ބުނާ ވާހަކަތައް ދޮގުކޮށްފައެވެ.
އިނގިރޭސިވިލާތް، އޮސްޓްރޭލިއާ، ކެނެޑާ އަދި ނެދަލޭންޑްސް ފަދަ ޤައުމުތަކުން ވަނީ އެ ޤައުމުތަކުގެ ރައްޔިތުން ވީ އެންމެ އަވަހަކަށް ޔޫކްރޭނުން ފުރައިގެން ދިއުމަށް އިލްތިމާސްކޮށްފައެވެ.
މީޑިއާ ރިޕޯޓްތައް ބުނާގޮތުން ރަޝިޔާއާއި އެމެރިކާއިންވެސް ދަނީ ޔޫކްރެއިންގެ ވެރިރަށް ކިއޭވްއިން އެގައުމުތަކުގެ ޑިޕްލޮމެޓިކް ސްޓާފުން ބޭރުކުރަމުންނެވެ. އެސޯސިއޭޓެޑް ޕްރެސްއިން ރިޕޯޓްކޮށްފައިވާ ގޮތުގައި، ޕޮލެންޑް ބޯޑަރު ކައިރީގައި އޮންނަ ދުރު ހުޅަނގު އައްސޭރިއަށް އެމެރިކާގެ އެމްބަސީގެ މުވައްޒަފުން ބަދަލުވާނެ އެވެ. ނަމަވެސް އިނގިރޭސިވިލާތުން ޔޫކްރެއިންއަށް ކަނޑައަޅާފައި ހުންނަވާ އެމްބަސެޑަރ މެލިންޑާ ސިމަންސް ކުރެއްވި ޓްވީޓެއްގައި ވިދާޅުވީ އޭނާއާއި ކީ ޓީމެއް ކިއޭވްގައި އަދިވެސް ގާއިމްވެ ތިބި ކަމަށެވެ.
ޑިޕްލޮމެޓިކް ވަސީލަތްތައް ބޭނުންކޮށްގެން ރަޝިޔާއާއި ޔޫކްރެއިންގެ ނުތަނަވަސްކަން ފިނިކުރުމުގެ މަސައްކަތް ހޮނިހިރު ދުވަހު ވެސް ކުރިއަށް ގެންގޮސްފައި ވެއެވެ. އެމެރިކާގެ ރައީސް ޖޯ ބައިޑަންއާއި ފަރަންސޭސި ރައީސް އެމަނުއެލް މެކްރޮން ރަޝިޔާގެ ރައީސް ވްލަޑިމިއަރ ޕޫޓިންއާ ފޯނުން ގުޅުއްވައި ވާހަކަފުޅު ދެއްކެވުމަށް ވަނީ ހަމަޖެހިފައެވެ. ނަމަވެސް މޮސްކޯއިން ވަނީ ހުޅަނގުގެ ގައުމުތަކުން ޓެރަރިޒަމަށް ހިތްވަރުދޭ ކަމަށް ތުހުމަތުކޮށްފަ އެވެ.
އެމެރިކާގެ ގައުމީ ސަލާމަތާ ބެހޭ މުޝީރު ޖެކް ސުލިވަން ވިދާޅުވީ، މިހާރު ރަޝިޔާގެ ނުރައްކާ އޮތީ ފުދޭ ވަރަކަށް ބޮޑުވެފައި ކަމަށެވެ.
ޔޫކްރެއިންއަށް ރަޝިޔާއިން ހަމަލާއެއް ދީފާނެ ކަމުގެ އިންޒާރުގެ ވާހަކަ ފެތުރުމުގައި އިސްކޮށް ހަރަކާތްތެރިވަނީ އެމެރިކާއެވެ. ނަމަވެސް މި ފަހަރު ފާހަގަކޮށްލެވޭ އިތުރުވުމެއް އެބައޮތެވެ. ރަޝިޔާ ސިފައިން ޖަމާކުރުމުގެ މަސައްކަތް ހުއްޓުމެއްނެތި ކުރިއަށް ގެންދާކަން ފާހަގަ ވެއެވެ.
އެމެރިކާގެ ގައުމީ ސަލާމަތާބެހޭ މުޝީރު ޖެކް ސުލިވަން ވިދާޅުވީ، ދާދިފަހުން ހެދި އިންޓެލިޖެންސް އެސެސްމަންޓްތަކުގެ ސަބަބުން ރައީސް ބައިޑަން ވަނީ ހުކުރު ދުވަހު ގާތް އެކުވެރިންނާއެކު ބައްދަލުވުންތަކެއް ބާއްވަވާފައެވެ. އަދި ރައީސް ޕޫޓިން ވަރަށް އަވަހަށް ހަމަލާގެ އެންމެ ފަހުގެ އަމުރު ނެރުއްވަފާނެ ކަމަށް ގަބޫލުކުރައްވާ ކަމަށެވެ.
ބައިޑަންގެ ޗީފް މިލިޓަރީ އެޑްވައިޒަރު ޖެނެރަލް މާކް މިލީ ވަނީ ރަޝިއާ، ކެނެޑާ، އިނގިރޭސިވިލާތް އަދި ޔޫރަޕްގެ ފަރާތްތަކަށްވެސް އާދަޔާ ހިލާފު ގިނަ އަދަދެއްގެ ފޯނު ކޯލުތަކެއް ކުރައްވާފަ އެވެ. ބައެއް ފަރާތްތަކުން ތުހުމަތުކުރާ ގޮތުގައި އެމެރިކާ ސަރުކާރުން ދައްކާ ބަހަނާތަކުން މި މައްސަލަ އިތުރަށް ހޫނުވުމަށް ކޮންމެވެސް ވަރެއްގެ ދައުރެއް އަދާކުރެއެވެ. ނަމަވެސް ޖެކް ސުލިވަން ވިދާޅުވީ ވޮޝިންޓަންއިން މައުލޫމާތު ހިއްސާކުރުމުގައި ވީހާވެސް ބޮޑަށް ދެފުށް ފެންނަ ގޮތަކަށް ކަންކަން ކުރުމަށް ނިންމާފައިވާ ކަމަށާއި، އެއީ އެގައުމުގެ މަސްލަހަތަށް އެންމެ ރަގަޅުގޮތް ކަމުގައެވެ.
ހުކުރު ދުވަހު ކްރައިމިއާގައި ރަޝިޔާގެ ކަނޑުގެ ސިފައިންގެ ތަމްރީންތަކެއް ކުރިއަށް ގެންދިޔައިރު، ޔޫކްރެއިންގެ އުތުރުން އޮންނަ ބެލަރޫސްގައި 10 ދުވަހުގެ އަސްކަރީ ތަމްރީންތަކެއްވެސް ބާއްވާފައި ވެއެވެ. ޔޫކްރޭން އިން ތުހުމަތުކުރާ ގޮތުގައި ރަޝިޔާއިން އެގައުމުގެ ކަނޑުގެ އައްސޭރިއަށް ވަނުމަށް ހުރަސް އަޅަމުންދެއެވެ.
ރަޝިޔާއިން ބުނެފައިވަނީ އެ ގައުމުގެ ސިފައިން އެމީހުންގެ ދާއިމީ ބޭސްތަކަށް އެނބުރި އަންނާނީ ތަމްރީނުތައް ނިމުމުން ކަމަށެވެ.
މިހާރު އުފެދިފައިވާ ނުތަނަވަސްކަން އުފެދިފައި މިވަނީ ރަޝިޔާއިން ޔޫކްރެއިންގެ ދެކުނުގައި އޮންނަ ކްރައިމިއާ ހިފިތާ އަށް އަހަރު ފަހުންނެވެ. ކްރައިމިއާ ހިފި ފަހުން، ޔޫކްރެއިންގެ ސިފައިން ވަނީ ރަޝިއާގެ ބޯޑަރު ކައިރީގައިވާ އިރުމަތީ ސަރަހައްދުތަކުގައި ރަޝިއާއިން ވާގިވެރިވެގެން ހަނގުރާމަ ކުރާ ޓެރަރިސްޓް ޖަމާއަތްތަކާ ދެކޮޅަށް ހަނގުރާމަކޮށްފައެވެ.
ކުރީގެ ރޫސީވިލާތުގައި ހިމެނުނު ގައުމުތައް ނޭޓޯގައި ބައިވެރިވުމަށް ރަޝިޔާއިން ދެކޮޅު ހަދައެވެ. އަދި މިއިން ގައުމެއް ބައިވެރި ކުރުމަށް ޔޫރަޕުން މަސައްކަތް ކުރާނަމަ އެއީ ރަތް ރޮނގު ހުރަސްކުރުންކަމަށްވެސް ރަޝިޔާއިން ބުނެއެވެ.
