އިންޑިއާގެ ދާޚިލީ މައްސަލަތަކުގައި އަމިއްލަ އެދުމެއް އޮވެގެން ބަސްނުބުމަށް އިންޑިއާއިން އެދެފިއެވެ. ކަރްނާޓަކާ ސްޓޭޓްގެ ތައުލީމީ މުއައްސަސާތަކުގައި ހެދުން އެޅުމާ ބެހޭ ގޮތުން ކުރިމަތިވެފައިވާ މައްސަލާގައި އިންޑިއާގެ ޚާރިޖީ ވުޒާރާގެ ތަރުޖަމާނަށް ސުވާލު ދެންނެވުމުން ވިދާޅުވީ އެ މައްސަލައަކީ ޝަރީއަތުގައި އޮތް މައްސަލައެއް ކަމަށެވެ. އަދި ބައެއް ގައުމުތަކުން އަމިއްލަ އެދުމެއް އޮވެގެން އެމައްސަލާގައި ފާޑު ކިޔަމުންދާތީ އެކަން އޭނާ ކުށްވެރި ކުރެއްވިއެވެ.
"އަޅުގަނޑުމެންގެ ދުސްތޫރީ އޮނިގަނޑާއި ނިޒާމުތަކާއި އަދި އަޅުގަނޑުމެންގެ ޑިމޮކްރެޓިކް ސުލޫކާއި ސިޔާސީކަންކަން ހަމަޖެހިފައި އޮންނަނީ، މައްސަލަތަކާ ދޭތެރޭގައި ވިސްނައި، އެކަންކަމަށް ހައްލު ހޯދާ ގޮތަށް. އިންޑިއާގެ ކަންކަން ރަނގަޅަށް ދަންނަ މީހުންނަށް މި ހަގީގަތް ސާފުވާނެ. އަޅުގަނޑުމެންގެ އެތެރޭގެ މައްސަލަތަކުގައި އެއްވެސް ފަރާތަކުން އަމިއްލަ އެދުމާ ލައިގެން ވާހަކަ ދައްކައި ހަދާކަށް ބޭނުމެއް ނޫން" އިންޑިއާގެ ޚާރިޖީ ވުޒާރާގެ ތަރުޖަމާން އަރިންދަމް ބަގްޗީ ވިދާޅުވި އެވެ.
