ޗައިނާއިން ހަލުވިކަމާއެކު ސޮލޮމަން އައިލެންޑްސްގައި ނުފޫޒު ފުޅާކުރަމުންދިއުމާ ގުޅިގެން، ވޮޝިންޓަނުން ސޮލޮމަން އައިލެންޑްސްގައި އަލުން އެމްބަސީއެއް ގާއިމްކުރުމަށް އެމެރިކާއިން ނިންމައިފިއެވެ. މިއީ ޗައިނާގެ ނުފޫޒާ ކުރިމަތި ލުމަށް ހުޅުވާ އެމްބަސީއެކެވެ.
ޕެސިފިކް ކަނޑުގެ މި ޖަޒީރާ ގައުމުގައި އާ އެމްބަސީއެއް ހުޅުވުމަށް އެމެރިކާގެ ޚާރިޖީ ވަޒީރު އެންޓޮނީ ބްލިންކެން އިޢްލާން ކުރައްވަން ހަމަޖެހިފައި މިވަނީ، އެމެރިކާއިން ސޮލަމަން އައިލެންޑްސްގައި ޑިޕްލޮމެޓިކް ތަމްސީލު ކުރުމުގެ ފެންވަރު ދަށްކުރިތާ 29 އަހަރު ފަހުންނެވެ.
ޗައިނާއިން ދަނީ ސޮލަމަން އައިލެންޑްސްގައި ނުފޫޒު ގަދަ ކުރަމުންނެވެ. މިދިޔަ ނޮވެމްބަރު މަހު 800،000 މީހުންގެ މިޖަޒީރާތަކުގައި ހަމަނުޖެހުންތަކެއް ހިނގިއެވެ. މުޒާހަރާގެ ބައިވެރިން ޕާލަމެންޓަށް ގަދަކަމުން ވަދެގަނެ، ތިން ދުވަސް ވަންދެން ހަމަނުޖެހުން ހިންގާފައި ވެއެވެ. މިމީހުން ހަމަނުޖެހުން އުފެއްދީ ޗައިނާއިން ސޮލަމަން އައިލެންޑްސްގައި ނުފޫޒު ވަރުގަދަކުރަމުންދާތީ ކަމަށް ބުނެއެވެ. ޗައިނާ މީހުން ހިންގާ ފިހާރަތަކަށްވެސް ހަމަލަތައް އަމާޒު ކުރިއެވެ.
1993ގައި އެމެރިކާއިން ސޮލަމަން އައިލެންޑްގެ އެމްބަސީ ބަންދު ކުރުމަށްފަހު އެމެރިކާއާ ގުޅޭ ކަންކަން ބަލަހައްޓަމުން ދަނީ ޕަޕުއާ ނިއުގިނީގައި ހުންނަ ކޮންސިއުލޭޓަކުންނެވެ.
