ޕާކިސްތާނުގެ ޕަންޖާބު ޕްރޮވިންސްގެ ވިލެޖެއްގައި ކީރިތި ޤުރުއާނަށް އިހާނެތިކޮށް ހިތިކަމުގެ ތުހުމަތުގައި ހަވަރު އެއްވެ، މެދު އުމުރުގެ ފިރިހެނެއްގެ ގަޔަށް ބަޑިޖަހައި މަރައިފައެވެ.
މި ވިލެޖުގައި މި ހާދިސާ ހިނގީ، މަޣްރިބް ނަމާދަށް ފަހު އެތައް ސަތޭކަ ބަޔަކު އެއްވެގެންނެވެ. މި މީހުން މިކަން ކޮށްފައި ވަނީ މީހަކު ގުރުއާނުގެ ބައެއް ސަފުހާތައް ވީދާލައި، ރޯކޮށްލި ކަމުގެ ރިޕޯޓްތަކެއް ލިބުމާ ގުޅިގެންނެވެ.
މީހުން ވަނީ ތުހުމަތު ކުރެވުނު މީހާ ގަހެއްގައި ބަނދެފައި ބަހައްޓައި ދަނގަޑު ބުރިއާއި ލަޓިބުރިތަކުން އޭނާގެ ގައިގައި ތަޅައިފައެވެ. އޭނާ މަރުވެފައި ވަނީ އަނިޔާކުރަމުން ދިއުމުގެ ތެރޭގައެވެ.
ޕާކިސްތާންގެ ޑޯން ނޫހުން ރިޕޯޓްކޮށްފައިވާ ގޮތުގައި އެމީހާ ވަނީ އޭނާގެ ކުށެއް ނެތް ކަމަށް ބުނެފައެވެ. ނަމަވެސް އޭނާގެ ވާހަކަ އަޑު އަހާކަށް ހަވަރުން އޮތީ ތައްޔާރަކަށް ނޫނެވެ.
މަންޒަރު ދުށް މީހުން ބުނާ ގޮތުގައި މީހުން އަނިޔާކުރަމުން ދިޔައިރު، ފުލުހުން އައިސް އެމީހާ ސަލާމަތް ކުރިއެވެ. ނަމަވެސް މީހުން ފުލުހުންގެ އަތުން އެމީހާ ޖަހައިގަނެގެން ގޮސް އަނިޔާކޮށް މަރާލީއެވެ. މިމީހާއަށް އޮށް ގަލުންވެސް ބަޔަކު ހަމަލަ ދިނެވެ.
ޕާކިސްތާންގެ ސިއާލްކޯޓްގައި ފައިބެ ޑިސެމްބަރު މަހު މިފަދަ ހާދިސާއެއް ހިނގާފައި ވެއެވެ. އެހާދިސާގައިވެސް މީހުން ވަނީ ބެލުމަކާ ނުލައި ޔޯލަވާކައިގެ މައްޗަށް ބިނާ ކޮށް ފެކްޓްރީއެއްގައި މަސައްކަތް ކުރި ސްރީލަންކާ މީހަކު ދިރިހުއްޓާ މަރާލާފައެވެ. މިމީހާ މަރާލުމަށްފަހު މީހުން ދިޔައީ ހުކުރު ނަމާދަށެވެ.
ޕާކިސްތާނަކީ ހަމައެއް ލަމެއް ނުބަލައި މިފަދަ މައްސަލަތަކުގައި މީހުން ޖަޒުބާތުގައި ޖެހޭ ގައުމެކެވެ. 1947 ވަނަ އަހަރުން ފެށިގެން ޕާކިސްތާނުގައި ދީނަށް ފުރައްސާރަކުރުމުގެ ޖުމްލަ 1415 މައްސަލައެއް ރިޕޯޓްކޮށްފައިވާ ކަން، ތިންކް ޓޭންކެއް ކަމަށްވާ ސެންޓާ ފޯ ރިސާޗް އެންޑް ސެކިއުރިޓީ ސްޓަޑީޒް އިން ބުންޏެވެ.
މި ޖަމާއަތުން ބުނާ ގޮތުން 1947 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް ދީނަށް ފުރައްސާރަކުރުމުގެ ސަބަބުން ޝަރީއަތަކާ ނުލައި ޖުމްލަ 18 އަންހެނަކާއި 71 ފިރިހެނަކު މަރާލާފައިވެ އެވެ. އަދި މިފަދަ ހުރިހާ ކޭސްތަކެއް ރިޕޯޓް ނުކުރެވޭކަމަށް ބަލާއިރު އަސްލު ކޭސްތައް މާ ގިނަ ކަމަށް ގަބޫލު ކުރެވެއެވެ.
