ރަޝިއާ އާއި ދުނިޔޭގެ އެކި ކަންކޮޅުތަކުން ގިނަ މުއްސަނދިންނާއި ކުންފުނިތަކުން އިނގިރޭސިވިލާތުގެ މާލީ ދާއިރާތަކާއި އަދި ޕްރޮޕަޓީ މާކެޓުތަކުގައި އިންވެސްޓް ކުރެ އެވެ. ޓްރާންސްޕޭރެންސީ އިންޓަނޭޝަނަލް އިން ބުނާ ގޮތުން އިނގިރޭސިވިލާތުގައި އިންވެސްޓްކޮށްފައިވާ 5 ބިލިއަން ޕައުންޑަށް ވުރެ ގިނަ މުދަލަކީ އެ މުދާ ހޯދި ގޮތާމެދު ޝައްކު ކުރެވޭ މުދަލެވެ. މި ފައިސާގެ ބައިކުޅަ އެއްބައި އައިސްފައި ވަނީ ރަޝިއާއިން ކަން އެފަރާތުން ވަނީ ފާހަގަކޮށްފަ އެވެ.
ޔޫކޭ ހޯމް މިނިސްޓްރީންވެސް ބުނާ ގޮތުން އިނގިރޭސިވިލާތުގައި ރަޝިއާއާ ގުޅުން ހުރި ނަހަމަ ގޮތުގައި ހޯދާފައިވާ ކަމަށް ބެލެވޭ ފައިސާގެ ބޮޑު މިންވަރެއް ތިލަ ކުރެވިފައިވާ ކަމަށް ހޯމް އޮފީހުގެ ރިޕޯޓެއްގައި ބުނެފައިވެއެވެ.
މި ފައިސާއަކީ، ލަގްޒަރީ ޕްރޮޕަޓީއާއި ކާރާއި ދަރިންގެ ސްކޫލް ފީ ފަދަ ކަންކަމަށް ކަމަށް ހޭދަ ކޮށްފައިވާ ފައިސާތަކެވެ. ބައެއް ފަހަރު މީހާގެ ބުރުސޫރަ ރީތިކޮށް މާތްކޮށް ދެއްކުމަށްޓަކައި ސަގާފީ މުއައްސަސާތަކަށް ވެސް ހަދިޔާގެ ގޮތުގައި މި ފައިސާ ޚަރަދުކޮށްފައި ވާކަން ފާހަގަ ކޮށްފައި ވެއެވެ.
