އިންޑިއާއަށް ކަނޑުގެ ސަރަހައްދު ބެލެހެއްޓުމަށް ޚާއްސަ ގައުމީ މެރިޓައިމް ސެކިއުރިޓީ ކޯޑިނޭޓަރު އިންޑިއާއިން މިއަދު އައްޔަން ކޮށްފިއެވެ. އިންޑިއާގެ އަމިއްލަ ކަނޑުގެ ސަރަހައްދު ހިމާޔަތްކޮށް، އިންޑިއާ ކަނޑާއި ބޭ އޮފް ބެންގޯލް ސަރަހައްދަށް ޚާއްސަ ސަމާލުކަމެއް ދެމުންދާ މި ދުވަސްވަރުގައި ކަނޑުގެ ސަލާމަތަށް ޚާއްސަ މަސްއޫލުވެރިއަކު އައްޔަން ކުރުމުން މެރިޓައިމް ސެކިއުރިޓީއަށް އިންޑިއާއިން ދޭ މުހިންމުކަން ފާހަގަވެއެވެ.
ކަނޑުޖގެ ސަރަހައްދުން މިފަހަކަށް އައިސް އިންޑިއާއަށް ދީފައިވާ އެންމެ ބޮޑު ހަމަލައަކީ މުމްބާއިއަށް ޕާކިސްތާނުން އައި ޓެރަރިސްޓުން ދިން ހަމަލައެވެ.
މިއަދު ހަމަޖެއްސި ނޭޝަނަލް މެރިޓައިމް ސެކިއުރިޓީ ކޯޑިނޭޓަރަކީ އިންޑިއާއިން މިމަގާމު އުފެއްދިފަހުން މިކަމަށް އައްޔަން ކުރި ފުރަތަމަ މަސްއޫލުވެރިޔާއެވެ.
އިންޑިއާއަކީ، ގައުމުގެ ދެބިތުން މާސިންގާ ކަނޑުގެ ސަރަހައްދެއް ބަލަހައްޓަން ޖެހޭ ގައުމެކެވެ. 7516 ކިލޯމީޓަރުގެ ދިގު އައްސޭރިފަށެއް އެއް އޮންނަ އިރު، އޭގެ ތެރޭގައި ޖަޒީރާ ސަރަހައްދުތަކެއްވެސް ދެ ފަރާތުގައި ހިމެނެއެވެ. އަދި ދެ މިލިއަން އަކަ ކިލޯމީޓަރުގެ އެކްސްކްލޫސިވް އިކޮނޮމިކް ޒޯނެއްވެސް އިންޑިއާއިން ބަލަހައްޓަން ޖެހެއެވެ.
ނޭޝަނަލް މެރިޓައިމް ކޯޑިނޭޓަރގެ މަގާމަށް އައްޔަން ކުރައްވާފައި ވަނީ އޮނަސާޅީސް އަހަރު ވަންދެން ކަނޑީގެ ސިފައިންގެ ތެރޭގައި ޚިދުމަތް ކުރެއްވުމަށްފަހު މިދިޔަ ޖުލައި މަހު ރިޓަޔަރ ކުރެއްވި ބޭފުޅެކެވެ. ކުރީގެ ވައިސް އެޑްމިރަލް ޖީ އަޝޯކް ކުމާރު، މަސައްކަތް ކުރައްވަމުން ގެންދަވާނީ ނޭޝަނަލް ސެކިއުރިޓީ އެޑްވައިޒަރ އަޖިތު ޑޯވަލްގެ ދަށުންނެވެ.
މިދިޔަ އަހަރުގެ ނޮވެމްބަރު މަހު އިންޑިއާ ކެބިނެޓް ކޮމިޓީ އޮން ސެކިއުރިޓީ އިން މިމަގާމު އުފެއްދުމަށް ރުހުން ދީފައި ވެއެވެ.
މި މަގާމުގެ އިތުރު މަސްއޫލިއްޔަތުގެ ތެރޭގައި އިންޑިއާގެ މެރިޓައިމް ސެކިއުރިޓީއާއި އެނާޖީ ސެކިއުރިޓީ ވަރުގަދަ ކުރުމުގެ އިތުރުން ނޫ އިގްތިސޯދާއި ޓެކްނޮލޮޖީގެ ބޭނުންތައް ފުޅާކުރުމުގެ މސައްކަތް ހިމެނެއެވެ.
އަދި ކުމާރުގެ އިތުރު ޒިންމާތަކުގެ ތެރޭގައި ކަނޑުގެ ސަލާމަތާ ގުޅޭ ދާއިރާގެ ސިޔާސަތުތަކާއި ޕްލޭންތައް އެކުލަވާލުމާއި ކަމާ ގުޅުން ހުރި އަމިއްލަ ފަރާތްތަކާ ގުޅިގެން މަސައްކަތް ކުރުންވެސް ހިމެނެއެވެ.
