ޔޫރަޕިއަން ޔޫނިއަންއާއި އެފްރިކަން ޔޫނިއަންގެ ހަވަނަ ސަމިޓް ބެލްޖިއަމްގައި ބާއްވައިފިއެވެ. އެފްރިކާގެ ލީޑަރުންނާއި އީޔޫގެ ލީޑަރުން ބޭއްވި ބައްދަލުވުމުގެ ފުރަތަމަ ބައިގައި އެއްގަޑިއިރު ވަންދެން ދުނިޔޭގެ މަސްރަހުގައި ހިނގަމުންދާ މައްސަލަތަކާ މެދު ބަހުސް ކުރެވުނެވެ.
މި ސަމިޓް ބާއްވާފައި ވަނީ އެފްރިކާއާއި ޔޫރަޕް 2030އަށް އެއް މާރެސްއަކަށް ދިއުމުގެ ނަމުގައެވެ.
ޔޫރަޕިއަން ކައުންސިލްގެ ރައީސް ޗާލްސް މިޝެލްއާއި އެފްރިކަން ޔޫނިއަންގެ ރައީސް މާކީ ސަލް ގުޅިގެން ނެރުއްވި ބަޔާނެއްގައި ވިދާޅުވެފައި ވަނީ ދެ ފަރާތުން ގުޅިގެން މަސައްކަތްކޮށް އެއްފަރާތުން އަނެއްފަރާތަށް ކަންކަން ޙިއްސާ ކުރަން ޖެހޭ ކަމަށެވެ.
މި ސމިޓް ބާއްވާފައި ވަނީ ވަށް މޭޒު ޖަލްސާތަކެއްގެ ގޮތުގައެވެ. އެކި ބައިތަކަކަށް ބަހައިލައިގެން ޖުމުލަ ހަތް ޖަލްސާގެ ގޮތުގައެވެ.
ދުނިޔޭގެ ބޮޑެތި ބާރުތަކުގެ މެދުގައި އެފްރިކާއަށް ނުފޫޒު ފޯރުވުމަށް އައު ބުރެއް ވަނީ ފެށިފައެވެ. ގުދުރަތީ ވަސީލަތްތަކުން މުއްސަނދި މި ބައްރުގައި ކޮންމެ ބަޔަކުވެސް އެބައެއްގެ ނުފޫޒު އޮންނަން ބޭނުން ވެއެވެ.
ޔޫރަޕްގެ ޖަމާއަތުން ވަނީ ޗައިނާގެ ނުފޫޒު ކުޑަ ކުރުމަށް އެފްރިކާއަށް ސަމާލުކަން ދީގެން ޚާއްސަ މަސައްކަތެއް ފަށާފައެވެ. ޔޫރަޕުން ބުނާ ގޮތުގައި ޔޫރަޕްގެ މަސައްކަތަކީ އެފްރިކާގެ ގައުމުތައް ދަރަނީގެ ދަނތުރައިގައި ނު ޖެއްސުމަށާއި ގައުމުތަކުގެ މިނިވަންކަމާއި ސިޔާސަތު ދަމަހައްޓައި ތަރައްގީއަށް ބާރުއަޅާ މަޝްރޫއުތަކެއް ފެށުން ކަމަށެވެ.
