ޕާކިސްތާންގެ ސަރުކާރު ވައްޓާލުމަށް އިމްރާން ޚާންގެ ކުރީގެ ގާތް ބޭފުޅަކު އިދިކޮޅު ފަރާތްތަކާ ވާހަކަ ދައްކައިފިކަމަށް އިތުބާރު ހުރި މަސްދަރަކުން މީޑއާއަށް މައުލޫމާތު ދީފިއެވެ. ޕާކިސްތާންގެ "ދަ ނިއުސް" އަށް މައުލޫމާތު ދެމުން އެފަރަތުން ބުނީ އިމްރާން ޚާންގެ ސަރުކާރު ވައްޓާލުމާ ބެހޭ ގޮތުން މަޝްވަރާ ކުރުމަށް މީގެ ދުވަސްކޮޅެއް ކުރިން ޖަހާނގީރު ތާރީންއާއި ޝަހްބާޒް ޝަރީފް ބައްދަލުކުރެއްވި ކަމަށެވެ. ބޮޑުވަޒީރު އިމްރާން ޚާންގެ އިތުބާރު ނެތްކަމުގެ މައްސަލަ ވެއްދުމަށް އިދިކޮޅު ފަރާތްތަކުން ވަނީ އިޢްލާން ކޮށްފައެވެ.
މީޑިއާއިން ގުޅުމުން މި ކަމާބެހޭ އެއްވެސް ކޮމެންޓެއް ތާރީން ދެއްވާފައެއް ނުވެއެވެ. ޝެހްބާޒް ޝަރީފާ ބައްދަލުކުރެއްވިކަން ކަށަވަރު ކޮށްދިނުމެއް ނެތި ނުވަތަ ދޮގު ކުރުމެއް ނެތި، ޖަހާނގީރު ތާރީން ވިދާޅުވީ، އޭނާ ކުރިން އުޅުނު ޕާޓީން ވަނީ ސިޔާސީ ގޮތުން އޭނާއަށް ބޭނުން ނިންމުމެއް ނިންމަން އިޚުތިޔާރު ދީފައެވެ.
ތާރީން ވިދާޅުވީ ސިޔާސީ ބޭފުޅަކަށް ވުމުން އެހެން ސިޔާސީ ބޭފުޅުންނާ މުއާމަލާތް ކުރުމަކީ އޮންނަން ވާނެ ކަމެކެވެ. އަދި އެފަދަ މުއާމަލާތްތަކަކީ ސިޔާސީ ކަންކަމުގެ ތެރޭގައި ހިމެނޭ ކަމެއް ކަމަށްވެސް ވިދާޅުވި އެވެ.
ތާރީން ވިދާޅުވީ ގައުމުގެ އިގްތިސާދީ ހާލަތާއި ބާޒާރުގައި އަގުތައް އަތް ނުފޯރާފަށަށް އުފުލެމުންދާތީ ރައްޔިތުން މާޔޫސްވެފައިވާ ކަމަށެވެ. އޭނާ ވިދާޅުވީ އޭނާގެ ބައިވެރިން ދެކެނީ ޕާކިސްތާން ރައްޔިތުންގެ ހިތްދަތިކަމާ މެދު ފަރުވާކުޑަކޮށްގެން ތިބެވޭކަށް ނެތް ކަމަށެވެ. ޕާލަމެންޓްގައި ތާރީންއަށް ތާއީދު ކުރާ މެމްބަރުންގެ އަދަދު 30 އަށް ވުރެ ގިނަ އެވެ.
ކުރިން އިމްރާން ޚާންގެ ޕާކިސްތާން ތަހްރީކޭ އިންސާފު ޕާޓީގައި އުޅުއްވި ތާރީންއާ އޭނާއަށް ސަޕޯޓް ކުރާ އެމްޕީން ލާހޯރުގައި މިދިޔަ ހަފްތާގައި ދެފަހަރު ބައްދަލުކޮށްފައި ވެއެވެ.
ޝާހްބާޒް ޝަރީފާ ތާރީން ބައްދަލު ކުރެއްވުމުން ޕާކިސްތާން މުސްލިމް ލީގް ނަވާޒަށް ތާރީންގެ ސަޕޯޓް އޮތްކަން ދޭހަވެއެވެ.
