އަފްޣާނިސްތާނުގެ ޑެޕިއުޓީ އެމްބެސެޑަރު އަބްދުލް ހާދީ ނިޖްރާބީ ވިދާޅުވާ ގޮތުގައި އަފްޣާނިސްތާނުން އެމެރިކާގައި ހިންގާ ސިޔާސީ އަދި ޑިޕްލޮމެޓިކް ހަރަކާތްތައް އެމެރިކާގައި ހުއްޓާލުމަށް އެމެރިކާގެ ޚާރިޖިއްޔާއިން ނިންމައިފިއެވެ. ވޮޝިންޓަންގައި ހުންނަވާ އަފްޣާނިސްތާނުގެ އެމްބަސެޑަރ ވެސް ވަނީ މަގާމުން ވަކިވެވަޑައިގެންފައެވެ. އެމެރިކާގެ ޚާރިޖީ ވުޒާރާއިން އެމްބަސީއަށް އަޅާފައިވާ އާ ހުރަސްތަކަކީ އެކަމަނާ އިސްތިއުފާ ދެއްވި ސަބަބު ކަމަށްވެއެވެ.
ވޮޝިންޓަންގައި ހުންނަ އަފްޣާނިސްތާނުގެ އެމްބަސީއަށް އެމެރިކާގެ ސްޓޭޓް ޑިޕާޓްމަންޓުން ފޮނުވި ސިޓީއެއްގައި ޑިޕްލޮމެޓިކް ހަރަކާތްތައް ހުއްޓާލުމަށް އެދިފައި ވެއެވެ. މިސިޓީގައި ވަނީ ގޭގައި ތިބެގެން މަސައްކަތް ކުރިއަށް ގެންދިއުމުގެ ހުއްދަ އޮންނަނީ ހަމައެކަނި އެމްބަސެޑަރަށްކަމަށެވެ. ނަމަވެސް ސިޔާސީ އަދި ޑިޕްލޮމެޓިކް ހަރަކާތްތަކަށް ހުއްދައެއް ނޯންނާނެ ކަމަށެވެ.
ކުރީގެ ޑިޕްލޮމޭޓުންނާއި ސިޔާސީ ތަޖްރިބާކާރުން ދެކެވަޑައިގަންނަވާ ގޮތުގައި، އަފްޣާނިސްތާނުން ބޭރުގައި ހުންނަ އަފްޣާނިސްތާނުގެ ޑިޕްލޮމެޓިކް މިޝަންތަކުގެ މަސައްކަތް ހުއްޓުމުން ދުނިޔޭގެ އެކި ކަންކޮޅުތަކުގައި އަފްޣާނިސްތާނާ ދެމެދު ދުރުކަމެއް އުފެދިގެން ދާނެއެވެ. މިކަމުގެ ސަބަބުން އާ ސަރުކާރަށް ވަރަށް ބޮޑު މައްސަލައަކަށްވެ ތާލިބާން ބަލައި ގަތުމުގައި ނެގެޓިވް ދައުރަކަށް ވެގެންދާނެއެވެ.
އެމްބެސެޑަރ ރާޒއަކީ ފާއިތުވީ 6 މަސްދުވަހުގެ ތެރޭގައި މަގާމުން ދުރަށް ވަޑައިގެންނެވި އަފްޣާނިސްތާނުގެ ތިންވަނަ އިސް ޑިޕްލޮމޭޓެވެ. މީގެ ކުރިން ޗައިނާ އާއި ތުރުކުމެނިސްތާނުގައި ތިއްބަވާ އަފްޣާން ސަފީރުން ވަނީ މަގާމުން އިސްތިއުފާ ދެއްވާފައެވެ.
އަފްޣާނިސްތާނުގެ ޑިޕްލޮމެޓިކް މިޝަންތަކަށް ވަނީ އިގުތިސޯދީ މައްސަލަތަކެއް ކުރިމަތިވެފައެވެ.
ވޮޝިންޓަންގައި ހުންނަ އަފްޣާނިސްތާނު އެމްބަސީގެ އޮފިޝަލުން ވިދާޅުވީ، އެމްބަސީގެ އެކައުންޓްތައް ފްރީޒް ކުރިތާ ހަތަރު މަހަށް ވުރެ ގިނަ ދުވަސް ވެފައިވާ ކަމަށެވެ.
ތަޖިކިސްތާން، ތުރުކުމެނިސްތާން، އިޓަލީ، ޕޮލެންޑް އަދި އީރާނުގައި ހުންނަ އަފްޣާނިސްތާނުގެ އެމްބަސީތަކަށްވެސް މިފަދަ އިޤްތިޞާދީ ގޮންޖެހުންތަކާ ކުރިމަތިލާންޖެހިފައިވާކަމަށް އެ ޤައުމުތަކުގައި ހުންނަ އަފްޣާނިސްތާނުގެ އެމްބަސީތަކުން ބުނެއެވެ.
