ކޮންމެ އަހަރަކުވެސް މާޗް8 ވަނަ ދުވަހު ޕާކިސްތާންގައި އަންހެނުން ހިނގާލުމެއް ބާއްވާނެއެވެ. އެދުވަހުގެ ހިނގާލުމަކީ އައުރަތު މާޗްގެ ނަމުން މަޝްހޫރު ހަރަކާތެކެވެ. މި ދުވަހަކީ އަންހެނުން އެމީހުންގެ ހައްގަށް ވާހަކަ ދައްކާ އަންހެނުންގެ ދުވަހެވެ. ދުވަހުގެ އެންމެ ޚާއްސަކަމަކީ ކޮންމެ އަހަރަކުވެސް މުއްލާއިންނާ އަންހެނުންނާ ދެމެދުގެ ކޯޅުމެވެ. މުއްލާއިން އަންހެނުން ބުރުގާ އަޅާތޯއާއި އަދި އެމީހުން ތިބީ ޖިންސް ލައިގެންތޯއާއި ގަޔަށް ބާރު ހެދުން ލައިގެންތިބޭތޯ ބަލައި އެކަމަށް ވާހަކަ ދައްކައި ހަދައެވެ.
މިއަހަރު އަނެއްކާވެސް އާދަޔާ ޚިލާފް މިދުވަސް ވެދާނެ ހެން ހީވެއެވެ. ސަރުކާރުގެ ފައިދާއަށް އިމްރާން ޚާންގެ ސަރުކާރުން މިދުވަސް ޖަހައިގެންފާނެ ކަމަށް އަންހެނުންގެ ހައްގަށް ވާހަކަ ދައްކާ މީހުން ދެކެއެވެ.
އިމްރާން ޚާންގެ ރެލިޖަސް އެފެއާޒް މިނިސްޓަރު ނޫރުލް ހައްޤު ޤާދިރީ ވަނީ އައުރަތު މާޗް ދުވަހަކީ ބުރުގާގެ ދުވަސްކަމުގައި ފާހަގަ ކުރުމަށް ޚާންއަށް މަޝްވަރާ ދެއްވާފައެވެ.
ތިންފަހަރަށް ކައިވެނި ބައްލަވައިގެންނެވި އިމްރާން ޚާނަކީ ދީނީ ގޮތުން ކޮންސަރވެޓިވް ޚިޔާލުގެ ބޭފުޅެކެވެ.
