ސިންގަޕޫރުގައި މީހަކު ޖަންގަލީގައި ޖިފުޓިއެއްގައި 30 އަހަރު ވަންދެން އުޅެފާނެ ކަމަށް ގަބޫލުކުރާނީ ކާކު ހެއްޔެވެ؟ ހަރޮށި ބިނާތަކާއި މުއްސަނދިކަމުގައި ނަންކިޔޭ ސިންގަޕޫރުގައި އޯހް ގުން ސިންހ ނަމަކަށް ކިޔާ މީހަކު ވަނީ 30 އަހަރު ވަންދެން ޖަންގަލީގައި ޖިފުޓީގައި އުޅެފައެވެ.
އޯހްއަކީ އުމުރުން 79 އަހަރުގެ މީހެކެވެ. އެކަމަކު އޭނާގެ އުމުރުގެ ބައިކުޅަ ބަޔާއެއް ވަރުގެ މީހުންނަށް ވުރެންވެސް މާބޮޑަށް އޭނާ ހުންނަނީ ދިރިއުޅުމާ މެދު ހިތްހަމަ ޖެހިފައެވެ. ނުތަނަވަސްކަމެއް ނެތެވެ. ހިނިތުންވުމާއެކު ވިދާބަބުޅާ ލޮލެއް އޭނާގެ މޫނުމަތިން ފެނެއެވެ.
އޭނާ އުޅެނީ އިންޑޮނޭޝިއާއިން މީހަކާ ކައިވެނިކޮށްގެންނެވެ. 17 އަހަރުގެ އަންހެން ކުއްޖެއްވެސް މިކައިވެންޏަށް ލިބިފައި ވެއެވެ.
އޯހްގެ ވާހަކައަކީ ސިންގަޕޫރުގައި އެންމެން ދައްކައި އުޅޭ ވާހަކައެވެ. އޭނާގެ ހާލަތުގެ ޚަބަރު އެނގުމުން މީހުން ވަނީ ސަރުކާރަށް މިވަރުގެ ކަމެއް ނޭނގި ދިޔައީ ކީއްވެތޯ ސުއާލުކޮށްފައެވެ.
އޭނާގެ ވާހަކަ ދުނިޔެއަށް ބޭޒާރުވީ އޭނާ ތަރުކާރީ ވިއްކަން ބާޒާރުގައި އުޅުނު އިރު ކަސްޓަމަރަކާ އޭނާއާ ދެމެދު ސިންގަޕޫރުގެ އެންމެ ޑޮލަރަކާ ހެދި އުފެދުނު ދެބަސްވުމެއްގައެވެ. މި ދެބަސްވުމުގެ ތެރޭން އޯހް ލައިސަންސް ނުނަގާ މަގުމަތީގައި ތަރުކާރީ ވިއްކާކަމަށް ބުނެ އެމީހާ ރިޕޯޓް ކުރުމުން މަސްއޫލުވެރިން އައިސް އޯހްގެ ތަރުކާރީ ކޮޅު ހިފެހެއްޓިއެވެ. އެވަގުތު އިއްތިފާގަކުން އެތާ ހުރި އިންސާނީ ހައްގަށް މަސައްކަތް ކުރާ އަންހެނަކު ކުރި ވީޑިއޯ މީސްމީޑިއާގައި ވައިރަލްވެގެން ދިޔައީއެވެ. ފަހުން އިތުރަށް ސަރުކާރުން އާންމުންނަށް އޯހްގެ ސްޓޯރީއަކީ އިތުރަށް އާދަޔާ ޚިލާފް ސްޓޯރީއެއް ކަމަށް ބުނެ އޭގެ ތަފްސީލު ތައް ދިނީއެވެ.
މިސްޓަރ އޯހް އުޅެ ބޮޑުވީ އޭނާގެ އާއިލާއާއެކު ސޮންޖީ ޓިންގާ ނަމަކަށް ކިޔާ ވިލެޖެއްގައެވެ. 1980ގެ އަހަރުތަކުގައި މި ވިލެޖްގެ ގެތައް ސަރުކާރުން ތަޅާލީ އުސް އިމާރާތްތައް ހެދުމަށެވެ. ސަރުކާރުން ގިނަ މީހުންނަށް އާ ގެދޮރު ދިނެވެ. އެކަމަކު މިސްޓަރ އޯހް އަށް ތަނެއް ނުލިބުނެވެ. އޭނާއަށް ދިރިއުޅެން ޖެހުނީ އޭނާގެ ބޭބެއަށް ސަރުކާރުން ދިން އެޕާޓްމަންޓްގައި އެ އާއިލާއާއެކުގައެވެ. ނަމަވެސް އެންމެ ފަހުން އޭނާ އެ ގެއިން ނިކުމެގެން ދިޔައީ އެއާއިލާއަށް ތަކުލީފު ޖައްސަން ބޭނުން ނުވާތީއެވެ.
އޭނާ ބުނާ ގޮތުގައި އޭނާއަށް ޖަންގަލީގައި އެހާ އަރާމުގައި އުޅެވުނީ އޭނާގެ ޖިފުޓި މައްޗަށް ހިޔާ އެޅޭގޮތަށް ހެދިފައި ހުރި ސައްކެޔޮ ގަހުގެ ސަބަބުންނެވެ.
އޭނާ ކިޔައި ދޭ ގޮތުގައި އެކަނިވެރިކަމަކީ ދުވަހަކުވެސް އޭނާއަށް މައްސަލައެއް ނޫނެވެ. އޭނާ ބަގީޗާގައި ދަނޑުވެރިކަން ކުރުމުގައި އަވަދި ނެތި އުޅުނީއެވެ.
އޯހް ދޭތެރޭން ވަގުތީ ވަޒީފާތައް ހޯދައި އެތަންތާނގައި މަސައްކަތް ކޮށް އާމްދަނީ ހޯދިއެވެ. އޭނާ އިންޑޮނޭޝިއާ އަންހެނަކީ ކައިވެނި ކުރީ ހަފްތާގެ ބަންދުގައި ކައިރީގައި އޮންނަ އިންޑޮނޭޝިއާގެ ޖަޒީރާއަކަށް ގޮސް އުޅުމުގެ ތެރޭގައެވެ. ފަހުން ކޮވިޑާ ގުޅިގެން ސަރަހައްދު ބަންދު ކުރުމުން އޭނާއަށް ދަތުރު ނުކުރެވުނީއެވެ. ނަމަވެސް އަންހެނުންނާއި ދަރިފުޅަށް އޭނާ މަހަކު 500 ސިންގަޕޫރު ޑޮލަރު ފޮނުވައި ހެއްޖެވެ.
އޯހްގެ ސިންގަޕޫރު އާއިލާއަށްވެސް އޭނާ ދިރިއުޅޭ ގޮތެއް ނޭނގެއެވެ. ހަމައެފަދައިން އޯހްގެ އަންހެނުންނާއި 17 އަހަރުގެ އަންހެން ދަރިފުޅު ވެސް ބުނަނީ އޭނާ ދިރިއުޅެނީ ކިހިނެތްކަމެއް އެމީހުންނަށް ވެސް ނޭނގޭ ކަމަށެވެ. އޭނާ އެމީޙުން ގާތު ބުނެފައި ވަނީ އޭނާ ދިރިއުޅެނީ ބަގީޗާއެއްގައި ކަމަށެވެ.
މިއަހަރުގެ ފެބުރުވަރީ މަހު، އޯހްގެ ސަރަހައްދު ތަމްސީލު ކުރާ އެމްޕީގެ ޓީމުގެ އެހީގައި، އޭނާއަށް ދިރިއުޅެން އާ ގެއެއް ލިބިއްޖެއެވެ.
އެމްޕީ ލިއާންގް ބުނީ އޯހްއަށް އެހީތެރިކަން ފޯރުކޮށްދިނުމުގައި އޭނާގެ ޓީމް ދެމި ތިބޭނެ ކަމަށާއި، އޭނާއަށް ދިގު މުއްދަތުގެ އިޖުތިމާއީ އެހީތެރިކަން ހޯދައިދީ، އިންޑޮނޭޝިއާގައި ދިރިއުޅޭ އޭނާގެ އަނބިމީހާ އާއި އަންހެން ދަރިފުޅާ އަލުން ގުޅުވައި ދިނުމަށް އެހީތެރިވެދޭނެ ކަމަށެވެ.
މިހާރު އޭނާ ދިރިއުޅެނީ އެހެން ފިރިހެނަކާ އެކު އެއް ބެޑްރޫމްގެ އެޕާޓްމަންޓެއް ޝެއަރ ކުރާ ގޮތަށެވެ. މިއީ ސައިޒުގެ ގޮތުން ކުޑަ އަދި ފަރުނީޗަރު ވެސް މަދު އެޕާޓްމަންޓެކެވެ.
އޯހްއަށް ވަނީ ފްރިޖަކާއި ޓީވީއަކާއި ފެން ކައްކާ ޖަގެއް ލިބިފައެވެ. އަދި އޭނާގެ ފާޚާނާގައި ހީޓަރެއްވެސް ހުރެއެވެ. އޯހް ބުނަނީ އަރާމުގައި ފެން ވަރާލެވެނީ އަދި ކިޔާއެވެ.
ތިރީސް އަހަރުގެ ތެރޭގައި އަލަށް ފުރަތަމަ ފަހަރަށް އޯހްއަށް ޓީވީ ބަލާލަންވެސް ފުރުސަތު ލިބުނީ މި އެޕާޓްމަންޓްގައެވެ. އެނާއަށް ސާމާނު ހަދިޔާ ކުރީ ދަރުމަވެރިންނެވެ.
މިހާރު އޯހް މަސައްކަތް ކުރަނީ ބިދޭސީ ލޭބަރުން އެއްތަނުން އަނެއްތަނަށް އުފުލައިދޭ ޑްރައިވަރެއްގެ ގޮތުގައެވެ. އަދި ބައެއް ފަހަރު އޭނާ ގަސް ހެދުމުގެ މަސައްކަތުގައިވެސް އުޅެއެވެ.
އޭނާ އައު އަހަރު އާއިލާއަކާއެކު އިހުތިފާލްކުރީ 30 އަހަރު ފަހުން ފުރަތަމައަށް މިއަހަރުގައެވެ.
ކުރިން ނުލިބި ހުރި ތަފާތު ވައްތަރުގެ ކާނާތައް ލިބުމުން އޯހްއަށް ހަމަ ކެވެނީއެވެ. އޭނާގެ މިހާރުގެ ޝަކުވާއަކީ ގިނަ އިން ކެވޭތީ އެކަމުގެ ޝަކުވާއެވެ.
އޯހް ބުނަނީ 30 އަހަރަށް ވުރެ ގިނަ ދުވަސްވީ ފަހުން ފުރަތަމަ ފަހަރަށް ޓީވީ ބަލަން އިނދެވޭތީ ވަރަށް އުފާވާ ކަމަށެވެ.
