ތާލިބާންގެ ވެރިކަމުގައި އަފްޣާން މީޑިއާއަށް ދިމާވެފައިވާ މާލީ އަދި މިނިވަންކަމުގެ ދަތިތަކާހުރެ އެގައުމުގައި ކުރިއަށް އޮތް ހަ މަސްދުވަސް ފަހުން މީޑިއާއެއް ދިރި ނޯންނާނެ ކަމުގެ އިންޒާރު ދީފިއެވެ.
ތާލިބާނުން ކާބުލްގެ ކޮންޓްރޯލް އަތުލި ފަހުން މީޑިއާއަށް ކުރިމަތިވި އިގުތިސާދީ ގޮންޖެހުމާ މެދު ކަންބޮޑުވުން ފާޅުކޮށް އަފްޣާނިސްތާނުގެ ޖާނަލިސްޓްސް އެންޑް މީޑިއާ އޯގަނައިޒޭޝަންސް ފެޑެރޭޝަން (އޭޖޭއެމްއޯއެފް) އިން ބުނީ މީޑިއާގެ މާލީ މައްސަލަތަކަށް ވަގުތުން ވަގުތަށް ސަމާލުކަން ދޭން ޖެހޭ ކަމަށެވެ. ނޫންނަމަ، ކުރިއަށް އޮތް ހަ މަސް ދުވަހުގެ ތެރޭގައި އެއްވެސް މީޑިއާއެއް އެ ގައުމުގައި ހަރަކާތްތެރިނުވާނެ ކަމަށެވެ.
އޭޖޭއެމްއޯއެފްގެ އޮފިޝަލުން ވިދާޅުވީ މިދިޔަ އަހަރުގެ އޮގަސްޓް މަހުގެ މެދުތެރޭގައި އަފްޣާނިސްތާންގެ ސިޔާސީ މަސްރަހު ބަދަލުވުމާ ގުޅިގެން މީޑިއާތައް ވަރަށް ނާޒުކު ހާލަތަކަށް ގޮސްފައިވާ ކަމަށާއި މާލީ ގޮތުން ބޮޑެތި ގޮންޖެހުންތަކެއް ކުރިމަތިވެ، މައުލޫމާތު ހޯދައި ލިބިގަތުމުގެ ދަތިކަން ވެސް އިންތިހާއަށް ކުރިމަތިވެފައިވާ ކަމަށެވެ.
މިހާރު ބައެއް މީޑިއާ ބަންދުވެ، ރިޕޯޓަރުންނަށް ވަޒީފާ ގެއްލި ފައިވެއެވެ. އަދި ބައެއް ރިޕޯޓަރުން އެހެން ވަޒީފާތަކަށް ބަދަލުވެފައި ވެއެވެ. އަދި އެހެން ބައެއް ނޫސްވެރިންނަށް ވަޒީފާއެއްވެސް ނެތް ކަމުގައި ބުނެފައި ވެއެވެ. ނޫސްވެރިންނަށް މާލީ ދަތިތަކާ ކުރިމަތިލާން ޖެހި، އާއިލާތަކަށް ކާންނުދެވޭ ކަމަށްވެސް ބުނެފައި ވެއެވެ.
ތުލޫޢު ނިއުސްއިން ރިޕޯޓްކޮށްފައިވާ ގޮތުގައި ނޫސްވެރިންގެ ފެޑެރޭޝަނުން ނެރުނު ބަޔާންގައި ތާލިބާނުންނަށް އިލްތިމާސްކޮށްފައިވަނީ މީޑިއާއަށް ގެއްލުން ދިނުމުގެ އަމަލުތައް ތަހުގީގުކޮށް ރިޕޯޓަރުންނަށް މައުލޫމާތު ހޯދައި ލިބިގަތުމުގެ ފުރުސަތު ހޯދައިދިނުމަށް އެހީތެރިވެދޭ ކޮމިޓީގެ ހަރަކާތްތައް އަލުން ފެށުމަސް ފުރުސަތު ދިނުމަށެވެ.
އަފްޣާނިސްތާނުގައި ހިނގަމުންދާ އިންސާނީ ކާރިސާއަށް ހައްލެއް ހޯދުމަށް އީޔޫއިން ވައުދުވި 600 މިލިއަން ޑޮލަރުގެ ފައިސާއިން މީޑިއާއާއި ރިޕޯޓަރުންނަށް އެހީތެރިވުމަށް ވައުދުވެފައި ވެއެވެ.
