ދުނިޔޭގެ ޖިހާދީ ޖަމާއަތުން 2022 ވަނަ އަހަރު ބޮޑު ނުރައްކަލެއް ކުރިމަތިކުރަމުންދާނެ ކަމަށް އެމެރިކާގެ ސަލާމަތީ ތަޖުރިބާކާރުންގެ ޓެރަރިސްޓް އެސެސްމަންޓްތަކުން ދައްކައިފިއެވެ.
އެމެރިކާގެ ފޮރިން ޕޮލިސީ ރިސާޗް އިންސްޓިޓިއުޓަށް ލިޔުއްވަމުން ނޭޝަނަލް ސެކިއުރިޓީ ޕްރޮގްރާމްގެ ސީނިއާ ފެލޯ ކޮލިން ޕީ ކްލާކް ވިދާޅުވީ، އިސްލާމިކް ސްޓޭޓްގެ ހަނގުރާމަވެރިންނާއި އެމީހުންގެ އާއިލާތައް އަދިވެސް ސޫރިޔާގެ އެކި ކަންކޮޅުތަކުގައި ޑިޓެންޝަން ކޭމްޕްތަކާއި ޖަލުތަކުގައި ބައިތިއްބާފައި ތިބުމަކީ ސަލާމަތީ ގޮތުން ވަރަށް ބޮޑު ގޮންޖެހުމެއް ކަމަށެވެ.
އިސްލާމިކް ސްޓޭޓް އާއި ޖިހާދީ ޕްރޮޕެގެންޑާ ހުޅަނގުގެ ގައުމުތަކުގައި މިހާރަށް ވުރެ ފުޅާ ދާއިރާއެއްގައި ކުރިއަސް ގެންގޮސް ހުޅަނގުގެ ގައުމުތަކުގައި ހައްދުފަހަނައަޅާފައިވާ ހަރުކަށި ފިކުރުގެ މީހުން ދޭ ހަމަލާތަކުގެ ނުރައްކަލަކީ ފުލުހުންނާއި އިންޓެލިޖެންސް އިދާރާތަކަށް އޮތް ގޮންޖެހުމެއް ކަމަށް ރިޕޯޓުގައި ބުނެފައިވެ އެވެ.
"ޓްރެންޑްސް އިން ޓެރަރިޒަމް: ވަޓްސް އޮން ދަ ހޮރައިޒަން އިން 2022؟"ގެ ނަމުގައި އެމެރިކާގެ ސަލާމަތީ މާހިރުން ކުރި ތަހުލީލެއްގައި ބުނެފައި ވަނީ ޖިހާދީ ޖަމާއަތްތަކުން 2022 ވަނަ އަހަރު ވަރަށް ބޮޑަށް އެމީހުންގެ އޮޕަރޭޝަންތައް ލާމަރުކަޒު ކުރާނެ ކަމަށެވެ. އަދި މިކަމަކީ އިރާގާއި ސީރިއާގައި އިސްލާމިކް ސްޓޭޓްއާ ދެކޮޅަށް އެމެރިކާއާއި އެކުވެރި ގައުމުތަކުން ޓެރަރިޒަމާ ދެކޮޅަށް ހިންގާ ކެމްޕޭން ކާމިޔާބު ވުމުގެ ނަތީޖާއެއް ކަމަށެވެ.
ކްލާކް ލިޔުއްވި ރިޕޯޓްގައި ވާގޮތުން އިސްލާމިކް ސްޓޭޓުން ވަނީ އެޖަމާއަތާ ގުޅުން ހުރި އެކިތަންތަނަށް އެމީހުންގެ ސާމާނައި ރިސޯސްތައް ބަދަލުކޮށްފަ އެވެ.
2022 ވަނަ އަހަރު އިސްލާމިކް ސްޓޭޓް ސެންޓްރަލް އެފްރިކާ ޕްރޮވިންސް (އައިއެސްސީއޭޕީ) އާއި އިސްލާމިކް ސްޓޭޓް ޚުރާސާން (އައިއެސްކޭ) ވެގެންދާނީ އިސްލާމިކް ސްޓޭޓްގެ އެންމެ ނުރައްކާތެރި ޖަމާއަތްތައް ކަމަށްވެސް ބުނެފައި ވެއެވެ. އަދި މި ޖަމައާއަތްތަކުން 2021 ވަނަ އަހަރުން ފެށިގެން ވަރުގަދަ ކުރަމުން އަންނަކަން ފާހަގަ ކޮށްފައި ވެއެވެ.
ފޮރިން ޕޮލިސީ ރިސާޗް އިންސްޓިއުޓުން ފާހަގަކުރާ ގޮތުގައި ސަބް-ސަހާރަން އެފްރިކާގެ އެކި ހިސާބުތަކުގައި އިސްލާމިކް ސްޓޭޓްއާ ގުޅުން އޮންނަ ޖިހާދީ ޖަމާއަތްތަކުން ދަނީ އިހުނަށް ވުރެން ބޮޑަށް ބާރުގަދަ ކުރަމުންނެވެ.
ފާހަގަ ކުރެވޭ ބައެއް ހާދިސާތައް ހިމަނަމުން ރިޕޯޓްގައި ބުނެފައި ވަނީ، ޔުގެންޑާގައި ދިން ހަމަލާތަކުގެ ޒިންމާ ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރްސީ) ގައި ހުންނަ އައިއެސްސީއޭޕީގެ ގޮފިން އުފުލައިފައިވަ ކަމަސެވެ. އަދި މޮޒަމްބީކްގައި ހުންނަ އިސްލާމިކް ސްޓޭޓްގެ ގޮފިން ވަނީ ޓެންޒޭނިއާގެ ސަރަހައްދު ހުރަސްކޮށް ހަމަލަތަކެއް ދީފައެވެ.
ޓެރަރިޒަމާ ދެކޮޅަށް މުޅި ދުނިޔެ ކުރަމުންދާ ހަނގުރާމައަށް ދެދައުރަށްވުރެ ގިނަ ދުވަސްވެފައިވާ އިރު، ކްލާކް ވިދާޅުވީ، އެމެރިކާއާއި އެކުވެރި ގައުމުތަކުން ދަނީ ޓެރަރިސްޓް ޖަމާއތްތައް އޮޕަރޭޓް ކުރާ ތަންތަން ދޫކޮށް އެތަންތަނުން ސިފައިން ދުރަށް ޖައްސަމުންނެވެ. މީގެ ސަބަބަކީ ދުނިޔޭގެ ބޮޑެތި ބަރުތަކުގެ މެދުގައި ވަދަވެރިކަން އުފެދުމައެކު އެހެން ކަންކަމަށް ސަމާލުކަން ދޭން ޖެހުމެވެ. އަދި މިހާލަތުގައި ޓެރަރިސްޓުންނާ ދެކޮޅަށް އޮޕަރޭޝަންތައް ހިންގުމުގެ ޒިންމާ ގައުމުތަކުގެ ސަރުކާރުތަކަށް ދޫކުރަމުން އަންނަ ކަމަށެވެ.
