އެމެރިކާއިން ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅައިފިއެވެ. ޔޫރަޕުން މިއަދު ބާއްވާ ސަމިޓްގައިވެސް އިތުރު ފިޔަވަޅުތައް އިއުލާން ކުރާނެއެވެ.
އެމރިކާއިން އެޅި ފިޔަވަޅުތަކާއެކު އެނގިގެން ގޮސްފައިވަނީ އެމެރިކާއިން ޕޫޓިންއާއި އޭނާގެ އާއިލާއާ ދެކޮޅަށް ދަތިކުރުމުޖގެ ފިޔަވަޅު އަޅާފައި ނުވާކަމެވެ. އަދި ޔޫކްރެއިން ހަނގުރާމައިގެ ތެރެއަށް އެމެރިކާއިން ނުވަންނާނެ ކަމަށެވެ. ނަމަވެސް ނޭޓޯގެ މެމްބަރަކަށް ހަމަލައެއް އަމާޒުވެއްޖެނަމަ އެއީ އެންމެނަށް ދެވުނު ހަމަލައެއް ކަމަށް ބަލައި ރައްދު ދޭނެ ކަމަށެވެ.
އެމެރިކާއިން ސުވިފްޓް ކޯޑު ކަނޑާލާފައެއްވެސް ނުވެއެވެ.
ޔޫކްރެއިން އަކީ ނޭޓޯގެ މެމްބަރެއް ނޫނެވެ. ރަޝިޔާ ރުޅިއައިސްގެން އުޅެނީ ޔޫކްރެއިން ނޭޓޯއަށް ވަންނަން ދިމާކޮށްގެން އުޅޭތީއެވެ.
އެމެރިކާއިން އެޅި ފިޔަވަޅުތައް ރަޝިއާގެ ބޮޑު ފަސް ބޭންކަކަށް އަމާޒުކޮށްފައި ވެއެވެ. އަދި ރަޝިޔާ ސަރުކާރު ބޭންކު ސްބަރބޭންކް އަދި ވީޓީބީގެ އިތުރުން ރަޝިއާގެ އެންމެ އިސް މީހުންނާއި އެމީހުންގެ އާއިލާތަކަށް އަމާޒުކޮށް ދަތިކުރުުގެ ފިޔަވަޅު އަޅާފައި ވެއެވެ.
ރަޝިޔާގެ އެންމެ ބޮޑު ލޯނު ދޭ ބެންކު ކަމަށްވާ ސްބަރބެންކް އަށް އެމެރިކާގެ ބޭންކުތައް މެދުވެރިކޮށް ދެން ފައިސާ ޓްރާންސްފާ އެއް ނުކުރެވޭނެ އެވެ.
ދަތިކުރުމުގެ ފިޔަވަޅުތަކުގެ ބޭނުމަކީ ރަޝިއާއަށް ޑޮލަރު، ޔޫރޯ، ޕައުންޑް އަދި ޔެން ބޭނުން ކޮށްގެން މުއާމަލާތު ކުރުމުގެ ގާބިލްކަން ލިމިޓް ކުރުން ކަމަށް ބައިޑަން ވިދާޅުވި އެވެ.
ވައިޓް ހައުސްއިން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ތެރޭގައި، ކޮމާޝަލް އިލެކްޓްރޯނިކްސް އާއި ކޮމްޕިއުޓަރުން ފެށިގެން ސެމީ ކޮންޑަކްޓަރުތަކާއި މަތިންދާބޯޓުގެ ބައިތައް ފަދަ ހައްސާސް ހުރިހާ ބާވަތެއް ދުނިޔޭގެ އެކި ކަންކޮޅުތަކަށް އެކްސްޕޯޓް ކުރުން މަނާކުރުން ވެސް ހިމެނެއެވެ.
ބައިޑަން ވިދާޅުވީ އިތުރު ފިޔަވަޅުތައް ރާވާލުމަށް ނޭޓޯއިން މިއަދު ބައްދަލުކުރާނެ ކަމަށާއި އެމެރިކާއިން ރަޝިޔާއާއެކު ހަނގުރާމައެއް ނުކުރާނެކަމަށް ތަކުރާރުކޮށް އޭނާ ވިދާޅުވިއެވެ. އެހެން ނަމަވެސް، ބައިޑަން ވިދާޅުވީ، އެމެރިކާއިން ނޭޓޯ މުއާހަދާގެ މާއްދާ 5 ގެ ވައުދުތައް ފުއްދާނެ ކަމަށާއި، އޭގައި ނޭޓޯގެ މެމްބަރު ގައުމުތަކުން އެއްބަސްވަނީ ޔޫރަޕް ނުވަތަ އުތުރު އެމެރިކާގައި އެއިން ގައުމަކާ ދެކޮޅަށް ހަތިޔާރު އެޅި ހަމަލާއެއް ދިނުން އެއީ އެ އެންމެންނާ ދެކޮޅަށް ދޭ ހަމަލާއެއްގެ ގޮތުގައި ބަލާށެވެ. ޔޫކްރެއިންއަކީ ނޭޓޯގެ މެމްބަރަކަށް ނުވުމުން، އެ ޙިމާޔަތްތައް ޔޫކްރެއިންއަކަށް ނުލިބޭނެއެވެ.
ބައިޑަން ވިދާޅުވީ މިއީ ޔޫރަޕްގެ ހުރިހާ އެންމެންނަށް ވެސް ނުރައްކާތެރި ވަގުތުކޮޅެއް ކަމަށެވެ. އަދި ޖަރުމަނުވިލާތަށް ފޮނުވުމަށް ތައްޔާރީ ހާލަތުގައި އެމެރިކާ ސިފައިން ބޭތިއްބުމުގެ ހުއްދަ ބައިޑަން ވަނީ ދެއްވާފައެވެ.
ރަޝިޔާ އެކަހެރިކުރުމަށް ހުޅަނގުން ކުރާ މަސައްކަތުގައި ބައިވެރިވުމަށް ޗައިނާއަށް ބާރުއަޅުއްވާނެތޯ ނުވަތަ ނޫންތޯ ސުއާލު ދެންނެވުމުން ބައިޑެން އެއްޗެއް ވިދާޅެއް ނުވެއެވެ.
ޔޫރަޕްގައި ރަޝިޔާގެ އަވަށްޓްރި ގައުމުތަކުން ބޭނުން ވަނީ އަވަހަށް ހަރުކަށި ދަތިކުރުމުގެ ފިޔަވަޅުތައް އަޅާށެވެ. ނަމަވެސް ދުރުގައި ތިބި ސައިޕްރަސްއާއި ސްޕެއިން ފަދަ ގައުމުތަކުން ބޭނުންވަނީ ލަސްލަހުން ދަތުކުރުމުގެ ފިޔަވަޅު އަޅަމުން ގެންދާށެވެ. އިތުރު ތަފްސީލުހާމަވާނީ މިއަދު އެވެ.
ބައިޑެން ވަނީ ހާލަތުގެ ނާޖާއިޒު ފައިދާ ނަގައގެން ތެލުގެ އަގު ބޮޑު ނުކުރުމަށް ތެޔޮ އުފައްދާ ގައުމުތަކަށް ގޮވާލައްވާފައެވެ. ޖަޕާނުން ދަނީ ތެލުގެ ބާޒާރު ގަޑުބަޑު ވިޔަ ނުދިނުމަށް އެގައުމުގެ ރިޒާވްގައި ހުރި ތެޔޮ މަޑުމަޑުން ދޫކުރުމަށް ނިންމާފައެވެ.
